Yakobo 4 - Kishambala New Testament 2005

Tamaa zatihosa.

¹ Nkumbizi zenyu mkishindaomana zianduka na hi? So kwa kuti nyemi zemiheheleza zaomana mwe madangoya miliyenyu?

² Muna luzisho, miya nkamuviinkwa; mwakomana, kangi mwatendelana wizu, miya hata vivyo nkamuvihulila. Mwaomana, mwatowana, miya nkamuvionela, kwa kuti nkamulombeza.

³ Mwalombeza, miya hata vivyo nkamuviinkwa, kwa kuti mulombeza vibada, kuti mwakunda, muvibinde na nyemi zemiheheleza.

⁴ Inywi watesi, nkamtaila kuti: Kukundisha inu shi ni kumshwika Mulungu? Lushe mwekunda kuγaluka mtana ywa inu shi, akiγalusha munkulu ywa Mulungu.

⁵ Hambu muγamba: Ugondengwa ulonga hule du kuti: Mpeho ayoikaza mwenyu yakuza wizu, miya mbazi azotifila ni nkulu kuzinka.

⁶ Kwa ivyoho kwalongwa: Mulungu awaikila watili nkani, miya wadodo awafa mbazi.

⁷ Lushe mwitikei Mulungu, mumwikile Sataui nkani! Ne ndivyo aminyilike. Mtimilei Mulungu! Ne ndivyo amilimile.

⁸ Inywi wahuza, ṅazai mikono! Kangi inywimwena mashamaili, ṅazai myoyo! Onai sungu na ukiwa, mulile!

⁹ Kusheka kwenyu kuγalamuke kulila, nyemi yenyu iγalamuke lusoyoyo!

¹⁰ Kipunguzizei ha Zumbe! Ne ndivyo nezeamikuze.

Tishelahane.

¹¹ Mshelongelane vibada, wanduγu! Mwemlongela mnduγu vibada ao mwelahana na mnduγu ywakwe, alongela mulomongwa vibada, kangi alahana na mulomongwa; miya ukilahana na mulomongwa nkuuγoshola,

¹² kangi shivyo walahana nawo. Mwelavya mulomongwa na mwelaha nawo ni muṅwe, uyu ne mwedaha kuhonya na kukoma; miya iwe u ndai ukilahana na ṅwiyawo?

Tishekitogole wenye.

¹³ Vikibinda kuna weγamba: Lelo ao keloi titahita kwe muzi msiku, tiikale mumo vuli gima, tichuluzize mumo, tiγenyeze mali.

¹⁴ Kangi viya vya keloi nkamuvitaila. Nkalamo yenyu ni ihi? Mu kishimishi cheikala hadodo ani, vikibinda chihekiaγila.

¹⁵ Mwangaγamba: Ati Zumbe akunda, titaikala ugima, titadaha kuγoshola visiku na visiku.

¹⁶ Miya lushe mwakitogola wenye haṅwe na kuhikuka; ntogolo yoshe ye ivyoho ni nibada.

¹⁷ Muntu akitaila kuγoshola vitana, ati nkaviγoshola, vitamγalukila masa.