Yakobo 3 - Kishambala New Testament 2005

Mibanile ya lulimi.

¹ Wanduγu wangu, msheleke, wangi wakiγaluka wafuzi! Hambu tailai kuti: Masa yetu ni makulu kuzinka!

² Hambu toshe tiyakabana vingi; ati muntu nkabana na kulonga, uyu ni muntu mwezifya, hambu adaha kuvota hata ṅwili woshe.

³ Mafalashi tiyagela vihampa mwe vyanwavyawe, kangwe yatiitike, tiyagwize mili yaweyoshe, ndiho tikunde.

⁴ Kangi olelai, melikebu zivyokula, zivyoγesiγwa ni mpeho nkulu! Kangi zigwiziγwa ni kabala kadodo koshe, ndiko yuja mtakutoza akunde.

⁵ Vivyoho lulimini kazintu kadashi, kangi lwaisiiza kuhemba. Olela, moto uvyonyuha, kangi mzitu uvyokula, ujauwookwa ndiwo!

⁶ Hata lulimi ni moto, ni ngulu ngima ye ubada, mwe madango yetu yoshe lulimi ne lwekandanya ṅwili woshe, lwaokela vyoshe viumbiγwevyo, kangi ṅwenye lukoleziγwa ni moto wa kuzimu.

⁷ Hambu nyama zoshe, ati ni mazama ya tunduwi, ati ni madeγe, ati ni nyoka, ati ni mazama ya bahali, zadahwa, kangi zizabinda kudahwa ni minyanyi ya wantu,

⁸ miya lulimi nkakuna muntu mwedaha kuluvota, ni kazintu kashikodila kubana, kagisizeko ushungu wekoma.

⁹ Tamtogola nalo Mulungu, Tate yweshu, kangi nalo talana wantu waumbiγwewo na shula ya Mulungu.

¹⁰ Kanwa ni chicho kiṅwe chelonga mbuli za ntogolo na mbuli za lukanko; wanduγu wangu, ivi nkaviagiza hata.

¹¹ Hambu kuna shoko yelavya mwe mpoγwela ṅwenga mazi yelama na mazi yenyeγela?

¹² Wanduγu wangu, mkuyu nkauvyala maula, kangi mzabibu nkauvyala nkuyu; liata he munyu nkahalawa mazi ye mulile.

Viuγo vyeanduka ulanga.

¹³ Mkiyuγo mwena unyanyi ni yuhi kwenyu? Neazifye myangile yakwe, ndima zakwe zoshe ziγosholwe na uhozu wena viyuγo!

¹⁴ Miya ati muna wizu ushiwotama na nkumbizi mwe myoyo yenyu, lushe mshekitogole, kangi vya kweli msheviγalushe vya ulongo!

¹⁵ Icho sicho kiyuγo cheanduka ulanga, miya ni cha kiinushi, ni cha kimuntu, ni cha kimzimu.

¹⁶ Hambu hena wizu na nkumbizi, ne hena uhuza na ndima mbada zoshe.

¹⁷ Miya kiyuγo cheanduka ulanga hosi china shoni, vikibinda china mwivano na uhozu, chashundika, chaγenyeza utungu na kuwo tana, nkachina mbuli nyingi, nkachina mambeza.

¹⁸ Miya kuwo ja utanda jihandwa mishi ya mpolele kwa waja wetenda mpolele.