Waloma 9 - Kishambala New Testament 2005

Sungu za Paulo kuti Waisilayeli nkawahokelwa.

¹ Kilisito ni mwona kuti: Nilonga kweli, silonga ulongo; mwona mtuhu ni moyo wangu kwa nguvu ya mpeho ṅazi,

² kuti: Lusoyoyo lwangu ni lukulu, kuti: Moyo wangu washindalumila.

³ Hambu anga nizauunda kulanwa haṅwe na kuushiγwa kwa Kilisito kwa mbuli ya wanduγu wangu, nivyelwewo nawo kimuntu.

⁴ Kweli ni Waisilayeli, ni wanangwa, wana utana wawe, wazainkwa vilaγa na milomo na mivikile yeagiza na misuhi,

⁵ wana wababa, hata Kilisito aanduka kimuntu mwe inu mbali; uyu ni Mulungu, ni mkulu ike, atogolwe kale na kale! Amini.

Msuhi wa Mulungu.

⁶ Nikilonga ivyoho, so kwa kuti mbuli ya Mulungu itebanika, hambu weanduka kwa Isilayeli siwo woshe Waisilayeli.

⁷ Kangi kwa kuti ni mbeleko ya Abulahamu, siwo woshe wanangwa, hambu kuigondiγwe: Ndiye aitangwe mbeleko yako ni Isaka ike du,

⁸ ni kuγamba: Wana wa kimuntu siwo wana wa Mulungu, miya ni wana wa msuhi du watalwa, kuti ni mbeleko.

⁹ Hambu mbuli ya msuhi ni ija ya kuγamba: Mishi ija nezeniize, Sala aitozize ṅwana.

¹⁰ Kangi so uyu ike, hata Lebeka akizainkwa ifu ni yuja muṅwe,

¹¹ tate yweshu Isaka, aho wana washizati wavyalwe, washizati waγoshole vitana ao vibada,

¹² azalongwa iyo mbuli ya kuγamba: Mkulu atamtumikila nduγuye, kangwe viya, Mulungu aikilevyo aho akizashaγula, viikale,

¹³ vishetongele miγoshwele ya wantu, vitongele mwitango wa kweli du, sa vivyogondwa kuγamba: Yakobo nizamkunda, miya Esau nizamshuka.

Vyoshe vianduka kwa mbazi ya Mulungu.

¹⁴ Lushe tiγambe ze? Mulungu atebana? Sivyo.

¹⁵ Hambu amγamba Mose: Niyekunda, namkunda kweli, niyefila mbazi, namfila mbazi kweli!

¹⁶ Lushe nkavina kukunda na kukihima kwa muntu, miya vina mbazi ya Mulungu.

¹⁷ Hambu ugondengwa wamlonga Falawo kuti: Ne nikuikilevyo, kangwe nilavilize nguvu zangu kwako, kangwe zina jangu jibilikilwe mwe ngulu ngima.

¹⁸ Shivyo: Ayekunda, amfila mbazi; ayekunda, amtoγesha moyo.

¹⁹ Utanilandula: Hana masa ani lushe? Hambu kikundile chakwe mwedaha kuchiikila nkani ni ndai?

²⁰ Ṅwiyangu, u ndai iwe ukikunda kukanana na Mulungu? Kiumbo chadaha kumγambila mwufi: Nini ukiniγoshola iviho?

²¹ Mwufi nkana ufuṅwa wa kufanyanyiza ulongo wakwe jijo tonge iṅwe kintu kibada haidu kintu kitana?

²² Kweli Mulungu azakunda kuonyesha maya, azakunda kulaviliza nguvu zakwe, kangi azavizizimiziza na uzizimizi ungi vyumbo vya maya viikiγwevyo, vibanike.

²³ Vituhu azalaviliza ungi wa utana wakwe na viya vyumbo vya mbazi,

²⁴ ateγavyo kale, vitame, sa avyotiitanga ishwi Wayuda, hata wamzimu.

²⁵ Saavyolonga na kanwa cha Hoseya: Washiwo mbali yangu, nitazawaitanga mbaliyangu; nishikundawo, nitazawakunda; haja wantu walongwaho kuti:

²⁶ Nkamu mbali yangu inywi, ne ndiho nezewaitangilwe wana Mulungu mwe moyo.

²⁷ Yesaya alongela Waisilayeli akiγamba: Ati ungi wa wana Isilayeli waisiiza sa mshangalaγala wa bahab, miya wevunilwa ni weshiγala du.

²⁸ Zumbe atazavibontola akiγoshola mbuli yakwe na kudwisha kunu shi.

²⁹ Hata hatuhu Yesaya alonga kuti: Ati Zumbe ywa ntimizi nkatishiγazize nkolo, anga tizaγaluka sa Sodoma, anga tizafanana na Gomola.

³⁰ Lushe tiγambe ze? Kwa kuti wamzimu, ndiwo wakishetongela utanda, wazaγuwa ulanda, ni uja utanda weanduka mwe kutozesha.

³¹ Miya Waisilayeli, ndiwo wakitongela mulomo wa utanda, nkawabuliza unu mulomo wa utanda. Kwa mbuli ani?

³² Kwa kuti nkawakundile kutozesha, wazakunda kuγoshola vyawe du, jiya iwe ja kukikwila watakikwila mumo,

³³ sa vivyogondwa kuγamba: Olela, naika kuja Siyoni iwe, ndimo wantu wakikwile, na kungu, ndijo wantu waihilwe ndijo, miya ndiye ajitozeshe, nkezeabunkuke.