Waloma 8 - Kishambala New Testament 2005

Kuanga kimpeho.

¹ Lushe nkakuna masa kwa waja wena Kilisito Yesu;

² hambu mulomo wa mpeho ya nkalamo ye mwe Kilisito Yesu uzanikombola mwe mulomo wa uhuza na wa kifa.

³ Viya mulomongwa ushidahilevyo kubontola kwa mbuli ya unyonge wa ṅwili wa kimuntu, Mulungu azavibontola akimtuma ṅwanae ṅwenye mwe shula ya ṅwili wa kihuza kwa mbuli ya uhuza, ne avyo, laha uhuza kunu shi,

⁴ kangwe utanda wa mulomongwa ubontoke kwa ishwi tishiwoanga kimuntu, teanga kimpeho.

⁵ Hambu waja wa kimuntu watongonyeza viya vya kimuntu, miya waja wa kimpeho watongonyeza viya vya kimpeho.

⁶ Hambu ntongonyezi za kimuntu bontokelo ni kufa, miya ntongonyezi Za kimpeho bontokelo ni nkalamo na utondolo.

⁷ Hambu ntongonyezi za kimuntu ni za nkulu na Mulungu, nkaziitika mulomo wa Mulungu, kangi nkazidaha kuitika.

⁸ Ne vyeleka, awa wa kimuntu nkawadaha kumtamila Mulungu.

⁹ Miya inywi nkamu wa kimuntu, miya mu wa kimpeho, ati mpeho ya Mulungu yaikala umo ndai mwenyu; ati muntu nkana mpeho ya Kilisito, uyu siye ywakwe.

¹⁰ Miya ati Kilisito muna naye, kweli ṅwili wabanika kwa mbuli ya uhuza, miya mpeho yatenda nkalamo kwa mbuli ya utandangwa.

¹¹ Ati mpeho ya yuja, ndiye akimwinula Yesu kwa wafilewo, yaikala uko ndai kwenyu, yuja ndiye akimwinula Kilisito Yesu kwa wafilewo, hata yenyu mili nezeaiuze moyo, ikibanika, kwa kuti mpeho yakwe iikala uko ndai kwenyu.

Ti wana Mulungu.

¹² Lushe kwa inu mbuli, wanduγu, nkati mwe udeni wa mili yetu, tiange kimuntu.

¹³ Hambu mkianga kimuntu, mwafa; miya mkikoma kwa nguvu ya mpehongwa ndima za mili yenyu mtakalama.

¹⁴ Wehimilwa ni mpeho ya Mulungu, awa ni wana Mulungu.

¹⁵ Hambu nkamwinkiγwe vituhu mpeho ya kipuna, kangwe mwogohe, miya mzainkwa mpeho ya kiṅwana, ne tiyoitanga nayo: Tate ene, tiyekundisha!

¹⁶ Iye mpeho yalongela mpeho zetu uwona, kuti ti wana Mulungu.

¹⁷ Miya ati ti wana, ti wapazi, kweli ti wapazi wa Mulungu wepala haṅwe na Kilisito; ati talumizwa haṅwe naye, nezetigimbikwe haṅwe naye.

Utanda ndiwo ulawile tiwoalila.

¹⁸ Hambu nafanyanya kuti: Milumilwe ya mishi inu ya ivi lushe nkaifanana na uja utana, tiwounga kufumbwilwa;

¹⁹ hambu vyumbo vyoshe vyazizimiza vikiafiza mlawilo wa wana Mulungu.

²⁰ Hambu ivi vyumbo viikiγwe, vibanike, so kuti vitekunda wenye, miya ni kwa mbuli ya yuja aviinkileye, kangwe vialile ivyoho,

²¹ kwa kuti ivi vyumbo vyohena vitazakombolwa mwe upuna wa kuhamka, viγuwe vyohe chiya kiṅwana vyale che mulile cha wana wa Mulungu.

²² Hambu tataila, kuti vyumbo vyosheni vyadiha vikilumilwa haṅwe na ishwi mpaka ivi lushe.

²³ Kangi so ivyoho du, hata ishwi wenye tilimbulewo mpehongwa, hata ishwi wenye tadiha uko ndai mwe myoyo tikiafiza chiya kiṅwana haṅwe na ukombozi wa ṅwili.

²⁴ Hambu tihonyiγwe ni kialilo; miya kialilo cheoniγwa sicho kialilo; hambu muntu avyoona avialila zeze?

²⁵ Miya tikialila tishivyoona, lushe taafiza na kuzizimiza.

²⁶ Vivyoho hata mpehongwa yatiambiza mwe unyonge wetu, hambu wenye nkatitaila mivikile yeagiza, miya mpeho ṅwenye yatilongela na madihodiho yashiyodahikana kulongwa.

²⁷ Miya yuja mwebunkula myoyo ataila ntongonyezi za mpeho, kwa kuti yalongela waṅazi Kimulungu.

Tezangwa ni Mulungu, takanilwa ndiye.

²⁸ Tataila kuti: Wemkunda Mulungu vyoshe vyawabontokela na halana; ni waja, ndiwo wakiitangwa kwa kikundile chakwe cha kale!

²⁹ Hambu ndiwo akiwataila kale, ne azangilewo kale, wafanane na shula ya pwanae, kangwe ṅwenye aγalukile wanduγuze wangi ṅwana ywa nteluka.

³⁰ Kangi ndiwo akiwazanga kale, ne aitangewo; kangi aitangewo wohena ne ainkilewo utanda, kangi ainkilewo utanda ne ainkilewo utana wohe.

³¹ Lushe ivi vyoshe tiviγambe ze? Ati tina Mulungu, ndiye atidahe, ni ndai?

³² Kangi nkalimbike ṅwanae, miya azamlavya kwa mbuli ya ishwi tosheni, ashetinke naye vyosheni vya mbazi?

³³ Ndiye afyalime wazangiγwewo ni Mulungu, ni ndai? Mulungu ne mwewakanila.

³⁴ Ndiye awalahe, ni ndai? Kilisito Yesu afileye, kangi ainulweye, mwe kulume kwa Mulungu, ne mwetilongela ishwi.

³⁵ Ndivyo vitiahule mwe lukundisho lwa Kilisito ni mbwai? Ukiwa ao wasiwasi ao lushukizo ao sala ao shakaza ao nkondo ao shime?

³⁶ Sa vivyogondwa kuγamba: Kwa mbuli ya iwe tashindakoṅwa, tatalwa sa ngoto zehita kwa koṅwa.

³⁷ Miya mwe ivi vyoshe taisa kuvota kwa mbuliyayuja mwetikundisha.

³⁸ Hambu natailisha kuti: So kifa, so ugima, sowalau, so ufuṅwa, so nguvu, sovya lelo, sovya nyuma,

³⁹ so vya ulanga, so vya kuzimu, haidu vyumbo ani vituhu vyedaha kutiahula mwe lukundisho lwa Mulungu lulawilelo mwe Kilisito Yesu, Zumbe ywetu.