Waloma 7 - Kishambala New Testament 2005

Tizaufiila uhuza.

¹ Nalonga kwa wantu wetaila mulomongwa: Nkamtaila, wanduγu, kuti: Mulomongwa watoza uzumbe na muntu mishi yoshe, ai moyo?

² Hambu mvyele mnyumba, mγoshi ywakwe ai moyo, ana ṅwiko kwa mbuli ya mulomongwa; miya mulume akifa, lushe nkana ṅwiko wa mγoshi.

³ Mγoshi ywakwe ai moyo, akianga na mγoshi mtuhu ataitangwa buγe, miya mγoshi ywakwe akifa, lushe azashungulwa ni mulomongwa, lushe so buγe akiγaluka ywa mγoshi mtuhu.

⁴ Vivyoho, wanduγu wangu, inywi nenywi mzaukomelwa mulomongwa ni ṅwili wa Kilisito, kangwe mγaluke wa mtuhu, ndiye akiinulwa kwa wafilewo, kuunga timvyaile Mulungu kuwo.

⁵ Hambu aho ndiho tikianga kimuntu, uhalami woshe wa uhuza ukiheheleziγwa ni mulomongwa, uzakihima nguvu mwe madango ya mili yetu, kuunga tivyaile kifa kuwo.

⁶ Miya lushe tizaushiγwa he mulomongwa aho tikifiila viya, ndivyo tikitoziγwa navyo, kangwe titumike lushe na myangile mihya ya kimpeho, ija ya kale ya kiṅwiko tikiitowa hulu.

Nguvu ya mlomongwa.

⁷ Lushe tiγambe ze? Mulomongwa ni uhuza? Sivyo!, miya uhuza anga siutaile, ati nkahana mulomongwa. Hata luzisho anga siluene, ati mulomongwa nkauγambile: Ushetende luzisho!

⁸ Miya uhuza uzaandusha haja he mlaγilizo ukiinula luzisho lwoshe mwe moyo wangu, hambu hashiho mulomongwa, uhuza ufanana na kimba.

⁹ Imi kale ne nikiikala kishimulomongwa; mulaγilizo uholawila, ne uhuza uhouya moyo, miya ṅwenye nizafa.

¹⁰ Ivyoho mlaγilizongwa ulawilewo, kangwe unikalamye, uzamanyika kuti: Ni wuwo wenikoma.

¹¹ Hambu uhuza uzaandusha haja he mlaγilizo, uzanihufya, ne uvyobinda kunikoma nawo.

¹² Vivyoho mulomongwa ṅwenye ni mṅazi, hata mlaγilizo ni mṅazi, waagiza, watama.

¹³ Kumbe ni viya vitana vyenikoma? Sivyo! Miya uhuza, kangwe ubunkuke, kuti ni uhuza, waleka, tikoṅwe ni viya vitana, kangwe uhuza uisiize uhuza kwa mbuli ya mlaγilizongwa.

Nguvu ya uhuza we mwe ṅwili.

¹⁴ Hambu tataila, kuti mulomongwa ni wa kimpeho, imi ṅwenye ni ywa kimuntu, niitaγiγwe na kwe uhuza.

¹⁵ Hambu sitaila, nivyoγoshola, hambu nivyokunda siviγoshola, miya nivyoihilwa ndivyo naviγoshola.

¹⁶ Ati nishivyokunda naviγoshola, naivana na mulomongwa, kuti ni mtana.

¹⁷ Lushe si miyo nekabana, miya ni uja uhuza weniikaila uko ndai.

¹⁸ Hambu nataila, kuti uko ndai kwangu, ni kuγamba mwe ṅwili wangu nkakuikala mbuli ntana; ati ni kukunda, nina nako, miya ati ni kuγoshola viya vitana, lushe sina nako.

¹⁹ Hambu viya vitana nivyokunda siviγoshola, miya viya vibada nishivyokunda naviγoshola.

²⁰ Ati nishivyokunda naviγoshola, lushe si miyo neviγoshola, miya ni uja uhuza weniikaila uko ndai.

²¹ Lushe imi nekunda kuyoshola viya vitana, naona nguvu yenikundila viya vibada;

²² hambu mulomo wa Mulungu u uko ndai mwe moyo, niitamilwe ndiwo;

²³ miya naona mulomo mtuhu mwe ṅwili wangu ushiwoivana na mulomo wa moyo wangu, ni uja wenikundila nralomo wa uhuza, weikala mwe madango ya ṅwili wangu.

²⁴ A! Imi ni muntu mkiwa! Nikataona ndai, akanivunila mwe unu ṅwili wa kifa?

²⁵ Mulungu atogolwe kwa mbuli ya Zumbe ywetu Yesu Kilisito! Lushe imi ṅwenye mtumikila mulomo wa Mulungu na moyo, miya ṅwili wangu utumikila mulomo wa uhuza.