Waloma 6 - Kishambala New Testament 2005

Kubatizwa mwe kifa cha Kilisito Yesu.

¹ Lushe tiγambe ze? Titimile uhuza vivyoho, kangwe mbazi zidaheγenela?

² Sivyo! Ishwi ndiwo tiifiile uhuza, titadaha zeze kuzaanga nawo? Hambu nkamtaila kuti: Toshe tibatiziγwewo

³ na mwe Kilisito Yesu tibatizwe mwe kifa chakwe?

⁴ Vivyoho tiizikiγwe haṅwe naye, kwa kuti tiihatizwe mwe kifa, kangwe ishwi neshwi tiange na nkalamo mpya, sa Kilisito avyoinulwa kwa wafilewo ni utana wa ishe.

⁵ Hambu ati tifanyanyiγwe kifa haṅwe naye, ne ndivyo tifanyanyiγwe naye kufufuka kohe,

⁶ hata tataila, kuti muntu ywetu ywa kale aikomiγwe haṅwe naye, kuunga ṅwili wa uhuza uhunkuke, kangwe tishezatumikila uhuza vituhu.

⁷ Hambu afileye ainkwa utanda ṅa kuushiγwa uhuza.

⁸ Ati tiifile haṅwe na Kilisito, tatozesha, kuti nezetione nkalamo haṅwe naye, kwa kuti tataila kuti:

⁹ Viya Kilisito afufulwevyo kwa wafilewo nkazafa, kifa nkachina ufuṅwa naye lushe.

¹⁰ Viya afilevyo ne azavifiila uhuza kamkaṅwe, miya avyo moyo avimtendela Mulungu moyo.

¹¹ Vivyoho hata inywi kifanyanyizei wenye, kuti mwifiile uhuza, mumwikaile Mulungu mwina Kilisito Yesu.

¹² Lushe uhuza ushezaγuwa uzumbe mwe mili yenyu yeunga kubanika, mkiitika kihelehele chakwe, kangi mshezaleka,

¹³ madango ya mili yenyu yakiγalukila uhuza mata ya uhezi, miya wenye kiinkilei kwa Mulungu, kuti mzauya moyo kwa wafilewo, kangi lekai, madango ya mili yenyu yamγalukile Mulungu mata ya utanda!

¹⁴ Uhuza nkezeutende uzumbe na inywi, kwa kuti nkamlahwa na mulomo, miya mulahwa na mbazi.

Nkati wapuna wa uhuza, miya wa utanda.

¹⁵ Lushe vi zeze? Tibane vivyoho, kwa kuti nkatilahwa na mulomo, miya tilahwa na mbazi? Sivyo!

¹⁶ Nkamtaila kuti: Muyekiinkila na kwakwe kumtumikila kipuna, ne mu wapuna wa yuja, muyetumikila? Ati ni uhuza, muhita kwa fa, ati ni kuitika, muhita kwa inkwa utanda.

¹⁷ Mulungu atogolwe kuti: Ne mwi wapuna wa uhuza, miya mwahitula myoyo mkiitika ziya mbuli muhinyiγwezo!

¹⁸ Ne muvyokombolwa mkiγaluka lushe wapuna wa utanda.

¹⁹ Nalonga kimuntu kwa mbuli ya unyonge wa mili yenyu. Sa ndivyo mkiinkila madango ya mili yenyu kutumikila usaba na upapala ṅwenye vivyoho, ne ndivyo mwinkile lushe madango ya mili yenyu kutumikila utanda, kangwe yaṅaziγwe! Hambu mishi ija,

²⁰ muhotumikila uhuza, ne mwishina utanda hata.

²¹ Lushe haja ne mwina kuwo ani? Jamibuza shoni lushe, hambu bontokelo jakwe ni kufa.

²² Miya mishi inu, viya muvyokombolwa mwe uhuza, muvyomtumikila Mulungu, muna kuwo mkikiṅaza, bontokelo jakwe ni nkalamo ya kale na kale.

²³ Hambu upokezi wa uhuza ni kufa, miya mbazi, Mulungu azotifiila mwe Kilisito Yesu, Zumbe ywetu, ni nkalamo ya kale na kale.