Waloma 5 - Kishambala New Testament 2005

Kuwo ja utanda.

¹ Kwa kuti tiinkiγwe utanda kwa mitozesheze yetu, ne tizaivanyiγwa na Mulungu ni Zumbe Yesu Kilisito;

² tikimtozesha, ne tihozuγwilwa iyo mbazi, tiyoγoloka nayo, ne tihoitogola kuti: Yatinka kialilo cha utana wa Mulungu.

³ Kangi tishefe kulogola aha du, netitogole, hata tikiona ukiwa!

⁴ Hambu tataila kuti: Ukiwa watinka uzizimizi, uzizimizi waleka titoγe, kangi kunu kutoγa kwatinka kialilo,

⁵ kialilo chaleka, tishevivilwe, kwa kuti myoyo yetu iigezilwe lukundisho lwa Mulungu ni mpeho ṅazi tiinkiγweyo.

⁶ Hambu tike wanyonge, ne Kilisito afileho kwa mbuli ya wemubela Mulungu.

⁷ Muntu aona ntoγo kukoṅwa kwa mbuli ya mtanda ṅwiyae; kwa mbuliya ṅwiyae amγoshwelaye vitana, minga muntu atakunda kufa.

⁸ Mulungu kikundishize chakwe ṅwenye, achotikundisha nacho, achilaviliza na aho kuti: Kilisito azafa kwa mbuli ya ishwi, tike wahuza.

⁹ He ivi lushe, tiinkiγweho utanda kwa mpome yakwe nkatitavunilwa ndiye masa ya mayangwa?

¹⁰ Hambu timtemekelwe Mulungu ni kufa kwa ṅwanae, tike wankulu wakwe, lushe ivyo tatemekelwavyo, titahoufyiγwa ni nkalamo yakwe.

¹¹ Kangi so ivyoho du, titazakiombola na Mulungu kwa mbuli ya ṅwanae Yesu Kilisito, ndiye akitiγalukila temo.

Adamu azaleta uhuza, Kilisito azaleta ugima.

¹² Kwa viya uhuza uvyoingiziγwa mwe shi ni muntu muṅwe, kangi kifa chivyyoingiziγwa ni uhuza, ne kifa chiwabwilevyo wantu woshe, kwa kuti wantu woshe waabana.

¹³ Haja mulomongwa ulawileho, uhuza ne ui haho kunu shi, kuti du hashiho mulomongwa, uhuza nkautalwa.

¹⁴ Miya hata vivyo, vikiandiila kwa Adamu, vikihita kwa Mose, kifa chiitozize uzumbe hata kwa waja washibanilewo wakizinka mulomongwa, sa Adamu abanavyo; uyu ne fanyanyi ya yuja, ndiye akiunga kuiza.

¹⁵ Kangi kubana kulivyo, so kufilwa mbazi kulivyo; hambu kwa mbuli ya kubana kwa muntu muṅwe awa wangi waafa, miya mbazi za Mulungu tizifilwe bule na yuja muntu muṅwe Yesu Kilisito, zizaisiiza kwa awa wangi.

¹⁶ Kangi izi mbazi sizo viya ni za mhuza muṅwe, hambu masaya muṅweyazahosa shi ngima, miya izo mbazi zakanila mbuli nyingi za kubana.

¹⁷ Hambu kwa mbuli ya kubana kwa muntu muṅwe kifa chiγwilevyo uzumbe kwa yuja muṅwe, lushe wehokela ziya mbazi nkulu za kuinkwa utanda bule du, ne wavyoγuwa uzumbe kwa mbuli ya yuja muṅwe Yesu Kilisito kuja kwe nkalamo.

¹⁸ Vituhu sa wantu woshe wavyohosiγwa kwa mbuli ya uhuza wa muṅwe, ne wantu woshe wavyohonyiγwa wakiinkwa utanda wa nkalamo kwa mbuli ya utanda wa muṅwe.

¹⁹ Sa awa wangi wavyoγaluka wahuza kwa mbuli ya upapala wa muntu muṅwe, ne awa wangi wavyoγaluka watanda kwa mbuli ya kuitika kwa muntu muṅwe.

²⁰ Miya mulomongwa uzaingila gati, kangwe kubana kuγenele; miya uhuza uhoγenela, ne mbazi zihoisiiza kuhaγenela,

²¹ kangwe sa viyaho uhuza utozizevyo uzumbe kwa nguvu ya kifa, vivyoho mbazi zitoze uzumbe kwa nguvu ya utanda mpaka kwe nkalamo ya kale na kale kwa mbuli ya Yesu Kilisito, Zumbe ywetu.