Waloma 16 - Kishambala New Testament 2005

Mhokelei Febe.

¹ Namilaγiliza lumbu jetu Febe mwetumikila bumbangwa je uko Kenkeleya,

² mumhokele mwe Zumbe, sa vivyoagiza waṅazi, mumwambize mbuli zosheni, azoagiziγwa ni nywiyo, hambu uyu ne akiγolokela wangi, hata imi ṅwenye.

Niluγushizai waṅazi.

³ Niluγushizai Pulisika na Akila weγoshola haṅwe na imi ndima ya Kilisito Yesu!

⁴ Awa wazakiinkila wenye mwe kufa, nishekoṅwe imi, lushe inu mbuli siwatogola ike, ni haṅwe na Wakilisito woshe we kwa wamzimu gati.

⁵ Niluγushizai hata jiya bumba je mwe nyumba yawe! Niluγushizai Epeneto, niyemkundisha! Uyu ne aandiileye kumtozesha Kilisito mwe shi ya Asiya.

⁶ Niluγushizai Maliya! Hambu azaona lulali lungi kwa mbuli ya ishwi.

⁷ Niluγushizai Andoniko na Yuniya, awa weyangu watana nishungiγwewo nawo! Walangwa vyedi, kuti wohe ni ntuṅwa ntana, kangi wazanilongwela kumtozesha Kilisito.

⁸ Niluγushizai Ampuliya, niyemkundisha mwe Zumbe!

⁹ Niluγushizai Ulibano! Ni mndima ṅwiyangu mwe Kilisito. Niluγushizai Sitaki, niyemkundisha!

¹⁰ Niluγushizai Apele mwemanyika kuti: Ni Mkilisito mkweli; niluγushizai waja wa Alisitobulo!

¹¹ Niluγushizai mulika ṅwiyangu Helodiyoni! Niluγushizai waja wa Nalikiso, weanga na Zumbe!

¹² Niluγushizai Tilifena na Tilifosa! Waona lulaii kwa mbuli ya Zumbe. Niluγushizai Pelisi, niyemkundisha! Hambu uyu mvyelengwa azaja lulali lungi kwa mbuli ya Zumbe.

¹³ Niluγushizai Lufo ashaγulweye ni Zumbe! Niluγushizai nine ywakwe na ywangu!

¹⁴ Niluγushizai Asinkilito, Fulego, Helime, Patiloba, Helima haṅwe na weshu weanga nawo!

¹⁵ Niluγushizai Filologo na Yuliya na Neleyo na lumbuje na Olimpa na waṅazi woshe we haṅwe nawo!

¹⁶ Luγushanai na kufyosana kiṅazi! Mabumba yoshe ya Kilisito yamiluγusha.

Msheazaγanyiγwe.

¹⁷ Namihimila, wanduγu, mwoleleshe waja wemiγenyezeza mbuli haṅwe na kumiihiza, wakihinya vyawe, sivyo muhinyiγwevyo, awa waashei!

¹⁸ Hambu we ivyoho nkawamtumikila Zumbe, watumikila mafu yawe, wazifya kulonga mbuli nyingi vitana, ne wavyoufya myoyo ya waja washinawo mambeza.

¹⁹ Kuitika kwenyu kuzamanyika koshe koshe, kwa mu mbuli natamilwa ni nywiyo, miya nakunda, mtende viyuγo, mzifye mbuli, kangi mtende ubabashi wa myoyo, mshebane.

²⁰ Miya Mulungu mwetiikaza mpeho inga amtiγinte Satani kinyanyi shi he milundi yenyu. Mbazi ya Zumbe ywetu Yesu Kilisito iikale na inywi!

Timoteyo amiluγusha.

²¹ Mwaluγushiγwa ni mndima ṅwiyangu Timoteyo na Lusiyo na Yasoni na Sosipatilo, woshe ni wanduγu wangu.

²² Namiluγusha imi Telitiyo nigondileye inu baluwa niina Zumbe. Mwaluγushiγwa ni Gayo, ni ṅwenyezi ywangu, kangi ni ṅwenyezi ywa bumba gima.

²³ Mwaluγushiγwa ni Elasito, zumbe ywa muzi, na ṅweshu Kwalito.

²⁴ Mbazi ya Zumbe ywetu Yesu Kilisito iikale na inywi nyosheni! Amini.

Mulungu atogolwe.

²⁵ Mulungu ne mwedaha kumishikiza kwa nguvu ya ubilikizi wedi wa Yesu Kilisito, niwobilikila, kwa kuti nizafumbwilwa viya vishivyolongwa kale hoshe,

²⁶ vyefumbulwa mishi mu ni baluwangwa za wateγanyi kwa mulomo wa Mulungu ywetu mkalami, kangwe mbali zoshe zihinyiγwe kuitika haṅwe na kutozesha.

²⁷ Uyu Mulungu mwena viyuγo ike atogolwe kale na kale kwa mbuli ya Kilisito Yesu! Amini.