Waloma 13 - Kishambala New Testament 2005

Itikai ufuṅwa.

¹ Kila muntu aitike ufuṅwa wemzinka ukulu! Hambu nkakuna ufuṅwa ushiwoanduka kwa Mulungu, ufuṅwa woshe we haha uiikiγwe ni Mulungu.

² Lushe mweikila ufuṅwa nkani, aikila utanda wa Mulungu nkani, kangi awa wankani watazalahwa masa.

³ Hambu wazumbe nkawagwiza woγa, ukizifya mbuli, miya ukibana; ati washekunda kuogoha ufuṅwa, zifya mbuli zako! Ne ndivyo utogolwe ndiwo.

⁴ Hambu ufuṅwa umtumikila Mulungu kwa mbuli ya vitana vyako, miya ukibana, ogoha! Hambu nkautoza shime bule du, hambu umtumikila Mulungu, umuja masa kimaya kila muntu mwebana.

⁵ Kwa inu mbuli taagiziγwa ni kuitika, so kwa mbuli ya yaja masa ya kimaya, miya kwa mbuli ya myoyo yetu.

⁶ Kangi ne vyeleka, mkiinkila kodi, kwa kuti waja ni wafuṅwa wa Mulungu, wehimila iyo ndima na kuzizimiza. Mulihei kila muntu vyemtala!

⁷ Yuja ṅwenye kodi munkei kodi yakwe! Yuja ṅwenye ngelu munkei ngelu yakwe! Yuja mwegwiza woγa mwogohei! Yuja mweagiza kugimbikwa mgimbikei!

Kundishanai.

⁸ Mshezatenda deni na muntu, kushima ija ya kukundishaua! Hambu mwekundisha ṅwiyae azabinda kubontola mulomongwa;

⁹ hambu vyalongwa kuγamba: Ushetende kilanga! Ushekome! Ushebawe! Ushemshinge ṅwiyawo ukilonga uwona wa lulimi! Ushetende luzisho! Kangi ati hana mlaγilizo mtuhu, vyoshe vyahangiiza inu mbuli ṅwenga ya kuγamba: Umkundishe ṅwiyawo, sa uvyokikundisha ṅwenye!

¹⁰ Ukimkundisha ṅwiyawo nkudaha kumγoshwela vibada; vyaleka, kukundishana ni kubontola mulomongwa.

Tiange na langaila.

¹¹ Γosholai ivyoho mkitaila mishi inu, kuti ha vilukila mwe usisiza hazakinta! Hambu ivi lushe uvunizi uzamibwila hehi kuzinka aho mkizaandiila kutozesha.

¹² Kilo chacha, mushi u hehi, lushe ija miγoshwele ya lwiza tiitowe hulu, tizwike mata ya langaila!

¹³ Tiange na kuzifya utanda, viya ni mushii, tishejilishe haṅwe na kunywelesha, tishetende kilanga na luzisho, tishetende nkumbizi na wizu,

¹⁴ miya muvutei Zumbe Yesu Kilisito! Pikilai mili yenyu, komo ishetende tamaa!