Waloma 12 - Kishambala New Testament 2005Kiinkilei kwa Mulungu. 1 Namihimila, inywi wanduγu wangu, kwa mbuli ya utungu wa Mulungu, mγalushe mili yenyu ṅombe ṅazi za mviko ze moyo zemtamila Mulungu, ivi viγaluke mviko wenyu weivana na viyuγo vya kweli. 2 Mshekifanyanye na inu shi! Miya hitukai mkiγuwa ntongonyezi ntuhu, kangwe mdahetaila Mulungu avyokunda, kuti ni vitana, vyaziha vina bontokelo. Tendai moyo mdodo. 3 Kwa mbuli ya mbazi nifilwezo namilonga inywi nyosheni: Muntu ashefanyanye kuzinka haja heagiza kufanyanya! Miya afanyanye du, ndivyo atende viyuγo, kila muntu sa Mulungu amupangilevyo mitozesheze yakwe! 4 Sa viya vya ṅwili vilivyo: Mwe ṅwili muṅwe tina madango mangi, miya madango yoshe nkayana ndima ṅwenga. 5 Vivyoho ishwi wangi ti ṅwili muṅwe, kwa kuti ti wa Kilisito, vituhu kila muntu na ṅwiyae ni madango. 6 Kangi tiinkiγwevyo ni vingi, kila muntu sa avyofilwa mbazi; ati muntu ana miteγanyize yakwe, aiivanye na mitozesheze yakwe; 7 ati muntu ana ndimangwa, aitumikile, ati ni mfuzi, shuti akifuze ṅwenye; 8 ati ni kushunda, shuti ṅwenye ashundike; ati muntu apangila weyae, aviγoshole na viyuγo; ati ni mγolokezi, akihime; ati muntu afila weyae mbazi, shuti atunilwe ndivyo! Kundishanai. 9 Kukundishana kwenyu kusheγaluke kwa ulongo! Towai viya vibada hulu, mtongele viya vitana! 10 Kundishanai kinduγu kwa myoyo, mvotane kinduγu na kushimilana! 11 Kihimei, mshezuzulike! Nyinyihalai kimpeho, 12 mumtumikile Zumbe! 13 Tamilwai ni kialilo chenyu! Zizimizai vye ukiwa! Kazai kuvika! Ukosi wa waṅazi uγaluke wenyu! Waγeni wafikizei na kusheṅuna! Ṅazai mesho wemiifya! 14 Zifyai kulonga, mshekanke! 15 Tamilwai haṅwe na waja wetamilwa! Lilal haṅwe na waja welila! 16 Myoyo ya inywi nyoshe iγaluke muṅwe! Mshefanyanye viya vikulu, miya viya vinyonge, mwiγalane navyo! 17 Wenye mshekifanyanyize, kuti mu wakiyuγo! Vibada musheviinwuzize muntu vibada, wantu woshe mndewafanyanyiza mbuli ntana! 18 Kwa mbuli ya inywi, ati vyadahikana, ivanai na wantu woshe! Weyangu, mshekilahizize wenye! 19 Miya mhakanye mayangwa! Hambu kuigondiγwe: Mlahizo ni wangu, imi nezenimilahizize, ne Zumbe avyolonga. 20 Ati mnkulu ywako ana sala, munke vya ja! Ati ana nkilu, munke vya nywa! Hambu ukiγoshola ivyoho, viya utaumbika makala ya moto mwe mutwi wakwe. 21 Ushevotwe ni mbuli mbada, miya vibada uvivote na viya vitana! |
New Testament in Kishambala © Bible Society of Tanzania, 2005.
Bible Society of Tanzania