Waloma 11 - Kishambala New Testament 2005

Hata mwe Waisilayeli kuvunilwa shiγailo du.

¹ Lushe niγambe: Mulungu atebenta mbali yakwe? Sivyo, hambu hata imi ni Mwisilayeli, nianduka kwa Abulahamu, mwe kolwa ja Benyamini.

² Mulungu nkabentile mbali yakwe, azangileyo kale, hambu nkamtaila, ugondengwa uvyolonga na kanwa cha Eliya, uyu avyomkemela Mulungu kwa mbuli ya Waisilayeli akiγamba:

³ Zumbe, wabilikizi wako wazawakoma, mavikilo yako wazayachakula, imi nizashiγala ike, kangi nami wanilonda, wanikome.

⁴ Miya alandulwe zeze? Nizakiinkila wantu makulija mfungate, ni awa washimgintilewo Baali mazwi.

⁵ Vivyoho hata mishi inu ya ivi lushe kuna shiγailo jishaγulwejo kwa mbazi.

⁶ Ati washaγulwe kwa mbazi, lushe so kwa mbuli ya miγoshwele yawe, hambu anga mbazi so mbazi, ati washaγulwe kwa mbuli ya miγoshwele yawe, lushe so kwa mbazi, hambu anga miγoshwele nkaina upokezi.

⁷ Lushe vi zeze? Waisilayeli walondilevyo nkawavibwile, washaγulwewo du ne wavibwilewo, waja watuhu wazatoγeshiγwa myoyo,

⁸ sa vivyogondwa: Mulungu azawainka mpeho ya usisiza, mesho yasheone, mashikilo yasheive, mpaka unu mushi wa lelo.

⁹ Kangi Dawidi aγamba: Meza yawe iwaγalukile tasi na mteγo, wagwilwe, walahiziγwe;

¹⁰ mesho yawe nezeyatuntushe, kangwe yashezaona, nezewakungwe miγongo kale na kale.

Wamzimu waitangwa.

¹¹ Lushe niγambe: Watekikwila, kangwe wakine? Sivyo! Miya kuaγilwa kwawe kuzaleka, uhonya ukiizila wamzimu, kangwe waja wenye wagelwe wizu, wakihime!

¹² Lushe kuja kuaγilwa kwawe kukihonya inu shi, kuja, kubanika kwawe kukihonya wamzimu, kuitika kwawe kwa woshe nkezekuisiize kuhonya?

¹³ Nimilonga, inywi wamzimu; kwa kuti imi ni ntuṅwa ya wamzimu, naisa kutogola unu ufuṅwa wangu,

¹⁴ ati nadaha kugela wanduγu wangu wa kimuntu wizu, wakihime, kangwe kuṅwe niwahonye.

¹⁵ Hambu kubentwa kwawe kukileka, inu shi itemekwe, kuhokelwa kwawe kutende mbwai, ati so nkalamo ya haja, ndiho haina kifa?

¹⁶ Ati mulimbulo ni mṅazi, hata nkande zoshe ni ṅazi; ali nkolo ni ṅazi, hata matambi ni maṅazi;

¹⁷ ati matambi kuṅwe yazabondwa, miya iwe ndiwo ui mshuza, uzaingiziγwa na haja, uzapangilwa nkolo ya uja mchungwa yevyaza vitana,

¹⁸ iwe utahikukila lushe yaja matambi? Ati wahikuka, kangi si weyo wetoza nkolo, miya nkolo itekutoza iwe.

¹⁹ Lushe utaγamba: Yaja matambi ya zanibondelwa imi, kangwe niingiziγwe na haja hawe?

²⁰ Ni vyedi; yaja yazabondeka, kwa kuti nkayatozeshe, iwe watoγa mumo, kwa kuti watozesha. Ushehikuke! Miya ingilwa ni woγa!

²¹ Hambu Mulungu akishelimbika yaja matambi ya cha mumo, hata iwe nkeakulimbike!

²² Olela lushe uhozu na shundwe za Mulungu! Shundwe kwa waja waukilewo, miya kwako uolele uhozu wa Mulungu, ati waikaila uhozu vivyoho! Ati sivyo, hata iwe nezeushengwe.

²³ Kangi waja, ati washeikala na kushetozesha kwawe vivyobo, watazaingiziγwa; hambu Mulungu ana nguvu ya kuwaingiza vingi.

²⁴ Ati iwe uvyelwewo ni mshuza uzashengwa mumo, kangi uzaingiziγwa mwe mchungwa ushiwo nkolo yako, awa weanduka mwe inu nkolo wana ntoγo ani ya kuuziγwa na mumo?

Waisilayeli wafilwa mbazi.

²⁵ Hambu sikunda, wanduγu, mkishetaila ichi kihili, kangwe mshehikuke, kuti: Waisilayeli kuṅwe wazatoγeshiγwa myoyo, mpaka ungi wa wamzimu ukibinda kuingila.

²⁶ Vikibinda mbali ngima ya Waisilayeli itavunilwa, sa vyagondwavyo kuγamba: Muja Siyoni mtazalawa mvunizi, ne ndiye aushilize wana Yakobo upapala.

²⁷ Nawaikila ichi kilaγa kwangu kuti: Nezeniwaushilize uhuza wawe.

²⁸ Kwa viya wavyobela ulaungwa, ni wankulu kwa mbuli ya inywi, miya kwa viya washaγulwavyo, ni waombozi kwa mbuli ya waishe zawe,

²⁹ hambu Mulungu nkadaha kuihilwa ni mbazi, afilezo wantu akiwaitanga.

³⁰ Sa inywi: Kale ne mkimupapalika Mulungu, miya lushe mzafilwa mbazi kwa mbuli ya upapala wawe.

³¹ Vivyoho hata awa mishi inu wazapapalika, kangwe wohe nezewafilwe mbazi kwa viya, mufilwevyo mbazi.

³² Hambu Mulungu azaleka, woshe wamupapalike, kangwe awafile woshe mbazi.

Sila za Mulungu ni za kumaka.

³³ Kweli kwakula uzuli na viyuγo na mitailile ya Mulungu! Ndiye agombole masa, ayolaha, ni ndai? Ndiye adose sila zakwe ua kuzibontola, ni ndai?

³⁴ Hambu ataileye mifanyanyize ya Zumbe, ni ndai? Ao afanyanyeye mbuli haṅwe naye, ni ndai?

³⁵ Ao amunkileye kintu, achiuziziγwe, ni ndai?

³⁶ Hambu vyoshe vianduka kwakwe, viγosholwa ndiye, vitaliza na kwakwe. Uyu alogolwe kale na kale! Amini.