Wakolose 3 - Kishambala New Testament 2005Titimile viya vye mwe lwingu. 1 Ati mzafufulwa haṅwe na Kilisito, londai viya vya lwingu! Ne Kilisito ahoikala kulume kwa Mulungu. 2 Tongonyezal viya vya lwingu, mshetongouyeze vya Inu shi! 3 Hambu mzafa, nkalamo yenyu ifishiγwe haṅwe na Kilisito kwa Mulungu. 4 Aho ndiho Kilisito, nkalamo yenyu, nezealawile, ne ndiho nezemulawile mwe utana haṅwe naye. 5 Komai lushe vya mili yenyu ya kiinushi: Kilanga, uhuza, kihelehele, luzisho lubada, tamaa ya mali yefanana viya ni kutumikila mizimu! 6 Hambu ivi ne vyemkweza Mulungu maya. 7 Kale hata inywi mzaanga navyo aho mkiikala navyo. 8 Miya lushe hata inywi shuti muvitowe hulu viya vyoshe, maya na nkunguka na ubada na lukanko na mbuli mbada, ndizo mkilonga. 9 Msheufyane! Mwizulile muntu ywenyu ywa kale na miγoshwele yakwe! 10 Mwizwikile yuja muhya auziγweye uhya, atende viyuγo, kwa viya avyofanana na yuja amteγileye. 11 Ne nkahana aho Mgiliki na Muyuda, kushengwa na kusheshengwa, mubabashi na Msikita, mtuṅwa na ṅwana vyale, miya vyoshe mwe mbuli zoshe ni Kilisito. Vyoshe vitende ntogolo. 12 Inywi waṅazi, mshaγulwewo ni Mulungu, mwekundishiγwa ndiye, tendai utungu wena mbazi, ukuwi, 13 udodo wa myoyo, uhozu, uzizimizi, mzizimize kila muntu ṅwiyae, mwushilizanye, ati muntu ana mbuli na ṅwiyae! Sa Zumbe avyomiushiliza vyenyu, vivyoho γosholai hata inywi! 14 Miya kuzinka ivi vyoshe tendai lukundisho! Hambu ne lwebontoleza na kuivanya. 15 Mpolele ya Kilisito ifanyanyize myoyo yenyu! Hambu ne mwitangilweyo na uja ṅwili muṅwe, mγaluke wantu welavya ntogolo. 16 Lekai, mbuli ya Kilisito iγaluke uzuli wenyu, muwoikaila mkikihinya haṅwe na kukishunda na viyuγo, mkimwimbila Mulungu mwe myoyo yenyu mazumo na maimbo na mawila ya kimpeho, kwa kuti mzafilwa mbazi! 17 Vyoshe, ndivyo mγoshole, ati ni vya longa, ati ni vya ndima, vyoshe viγosholei mwe zina ja Zumbe Yesu mkimlaviliza Mulungu Tale ntogolo navyo! Utanda wa unyumba. 18 Inywi wavyele, itikai waγoshi wenyu, sa vivyomiagiza, kwa kuti mu wa Zumbe! 19 Inywi waγoshi, kundishai wavyele wenyu, mshewafile maya! 20 Inywi wana, itikai wavyazi wenyu mwe mbuli zoshe! Hambu ne vyemtamila Zumbe. 21 Inywi waishe, msheshongeleze wana wenyu, kangwe washefe maya! 22 Inywi watuṅwa itikai wababa zenyu wa kimuntu mwe mbuli zoshe, so kuγamba: Mzifye mwiolelwe ndiwo, viya mtakunda kutamila wantu, miya muitike na myoyo yelonda mbuli ṅwenga du na kumwogoha Zumbe! 23 Vyoshe muvyoγoshola viγosholei kwa moyo, viya mshetaviγoshwela wantu, miya viya mtevimγoshwela Zumbe! 24 Tailai kuti: Mtazaviuziziγwa ni Zumbe, mkizahokela kwakwe kifungwa. Mtumikilei Zumbe Kilisito! 25 Hambu mwebana atazanziziγwa abanilevyo; nko nkakuna ywa koma na ywa limbika. |
New Testament in Kishambala © Bible Society of Tanzania, 2005.
Bible Society of Tanzania