Wakolose 2 - Kishambala New Testament 2005

¹ Hambu nakunda, mtaile nkondo, niyona nayo kwa mbuli ya inywi na ya Walawodikiya na ya woshe washienewo cheni changu na ṅwili wangu,

² kangwe myoyo yawe ishangalaziγwe, igelwe nguvu na lukundisho, wamote uja uzuli woshe, muntu awona nawo akiγenyeza viyuγo, wataile icho kihili cha Mulungu na cha Kilisito.

³ Hambu mwe uyu feitende choshe cha viyuγo na eha utalizi chiifishiγwe mumo.

Musheazaγanyiγwe, angai na Yesu.

⁴ Ivi nivilonga, kangwe kusheoneke mimtu mwemiazaγanya akihemba kulonga.

⁵ Hata ṅwili wangu ukiikala hale na inywi, miya moyo wangu u kwenyu; natamilwa nikiiva utanda wenyu, muvyokihima kumtozesha Kilisito.

⁶ Lushe sa mumhokelevyo Zumbe Kilisito Yesu, angai naye!

⁷ Mwikize mazindo mumo, mzengwe, mgelwe nguvu ni ija mitozesheze mufuziγweyo, mwisiize kulavya ntogolo!

⁸ Olelai, kusheoneke mwemitaha na mbuli za utalizi na za ushimolezi wa wantu zena lwufyo lwa bule du! Hambu ni za kiinushi, so za Kikilisito.

⁹ Hambu mwe uyu mwikala vyoshe vya Kimulungu kiṅwili;

¹⁰ aho mwina naye ne muhovigisa viya vyoshe, hambu uyu ni mkulu kuzinka uzumbe na ufuṅwa woshe;

¹¹ mwina naye, ne muhoshengwa ṅwaliko ushiwoshengwa na mikono, hambu mtekizula ṅwili wa kimuntu we uhuza, ne kushengwa Kikilisito.

Tizazikwa haṅwe na Kilisito tizafufulwa haṅwe naye.

¹² Aho mkibatizwa mzazikwa haṅwe naye, kangi mzafufulwa naye kwa nguvu ya kumtozesha Mulungu amwinuleye kwa wafilewo.

¹³ Inywi ne mwifile kwa mbuli ya kubana, mili yenyu ne iishishengiγwe ivyoho, miya yuja azamiuza moyo haṅwe naye, azamifa mbazi na masa yoshe.

¹⁴ Azafuta ija baluwa igondiγweyo milomo, tibanileyo, ndiyo ikitigela masa, azaiusha aho gati, akiikontela mwe muti;

¹⁵ azabusha wazumbe na wafuṅwa, azawabunkula cha sale, walivyo, azawaasa kimitahe.

¹⁶ Lushe muntu ashemilahe kwa mbuli ya kuja na ya kunywa ao kwa mbuli ya kushegimbika mishi, ati ni ya ṅwezi kongo, ati ni ya msabato.

¹⁷ Hambu ichi ni kizuli du cha viya, ndivyo vikiunga kulawila, miya ṅwili ṅwenye ni wa Kilisito.

¹⁸ Muntu ashemihoke tuvo jenyu akimikundila kukionyaonya kikiwa na kuvika walau; hambu akialila viya, ashienevyo, ahahikuka bule du kwa mbuli ya ntongonyezi zakwe za kimuntu.

¹⁹ Miya nkatozesha uja mutwi; kangi ne weleka, ṅwili woshe wegelwa nguvu wetoγeshiγwa ni nkonyoko na nyuge ukule na mikulile ya Kimulungu.

²⁰ Ati mzafa haṅwe na Kilisito mkitowa hulu viya, inu shi ivyotoγeshiγwa navyo, nini mkikunda kugelwa miko vituhu, viya mkeanga na inu shi?

²¹ Mkiγangwa: Ushetoze, ushedomele, ushedowe visiku, kangi viya vyoshe viiikiγwe,

²² vitoziγwe ni wantu, vihanike; ivi ni vitigo na miko ya kimuntu.

²³ Izi mbuli zegondwa kuti: Ni za utalizi kwa viya, wavyokionyaonya, viya watamwitika Mulungu, watakipunguza mwe myoyo yawe, viya watanyima mili yawe vyeagiza, kangi ni ndima ya bule, hambu vikibinda waγoshola luzisho lwoshe lwa mili yawe.