Wafilipi 3 - Kishambala New Testament 2005

Mwina Zumbe oleleshai wabada.

¹ Vikiheza, wanduγu wangu, tamilwai kuti muna Zumbe! Kumigondela mbuli ṅwenga du nkaviniihila, kangi vyamishikiza.

² Γojeshai makuli! Γojeshai wandima wabada! Γojeshai wehakishengela!

³ Hambu makungwi ni shwiyo temvika Mulungu kimpeho, tekiombola na Kilisito Yesu, tishiwokidesa na mili yetu.

⁴ Kangi ati nakunda, imi nami nadaha kukidesa na ṅwili wangu; muntu mtuhu akikunda kukidesa na ṅwili wakwe, imi nitamzinka:

⁵ Aho nikivyalwa nikibinda mishi mnane, ne nihoshengwa; naanduka mwe mbali ya Isilayeli mwe chengo cha Benyamini, ni Mwebuleyo ṅwenye, kwa viya ndivyo nikitongela mulomongwa ne nii Faliseyo,

⁶ kangi ne nikikihima kuγulusha bumbangwa, ne nii kishimasa kwa utanda wa mulomongwa.

⁷ Miya viya, ndivyo nikiitanga kuti: Vina kuwo, navifanyanya lushe kuti: Vyahosa, kwa mbuli ya Kilisito.

⁸ Kangi ivi lushe naisiiza kuvifanyanya viya vyoshe kuti: Vyahosa, kwa kuti kumtaila Zumbe ywangu Yesu Kilisito ni mbuli nkulu kuzinka mbuli zoshe; kwa mbuli ya uyu nizaviasha viya vyoshe nikivifanyanya kuti:

⁹ Ni mantu, kangwe nimumote Kilisito, kangwe nioniγwe, kuti nina naye, kuti uja utanda wangu uandukewo kwe mulomongwa, sina nawo, miya utanda niwona nawo ni uja uandukewo mwe kumtozesha Kilisito, ni uja niinkiγwewo ni Mulungu kwa mbuli ya inu mitozesheze,

¹⁰ kangwe nimtaile ṅwenye na nguvu ya ufufuki wakwe na ya milumilwe yakwe nikiipangilwa nami,

¹¹ mifile yangu ifanane na yakwe, niiγalwe kwe ufufuki wa wafilewo.

Hangilizai viya vya utana.

¹² Siγamba kuti: Aha niibindile kutoza, kuti: Aha niibontole, miya nakihima kutoza kwa viya, nivyotoziγwa ṅwenye ni Kilisito Yesu.

¹³ Wanduγu, sizati nikitale ṅwenye ivyoho kuti: Niibindile kutoza, miya nilonga inu mbuli ṅwenga du kuti: Najala viya vye nyuma, nahangiliza viya vye mazu,

¹⁴ viya nitaγulukila tuvo, kangwe niinkwe chiya kitumulo cha uja mwitango ulawilewo kwa Mulungu na kwa Kilisito Yesu.

Kaya kwetu ni mwe lwingu.

¹⁵ Toshe tekunda kubontola tifanyanye ivyoho! Ati mbuli ntuhuntuhu mwazifanyanya vyenyu, hata inu Mulungu nezeaimifumbwile.

¹⁶ Komo aha tibuzizeho, tiangile haha!

¹⁷ Wanduγu, niiγai, mwolele waja weanga iviho, sa muvyotiona ishwi, tivyoanga!

¹⁸ Hambu wangi waanga, sa nivyomiγambila kangi muno, miya lushe nalonga na kulila kuti: Niwankuluwa muti Kilisito akomiγwewo nawo.

¹⁹ Bindilizo jawe ni kubanika, hambu Mulungu wawe ni ifu, ntana wawe ni vintu vyena shoni, ni waja wefanyanya mbuli za kiinushi.

²⁰ Kangi kaya kwetu ni mwe lwingu, tikomwafiza mhonya ywetu Yesu Kilisito,

²¹ aγalamushe mili yetu yena unyonge, ifanane na ṅwili wakwe mtana kwa nguvu yakwe yedaha kuvola vyosheni, vimwitike.