Waefeso 5 - Kishambala New Testament 2005

Kumtongela Mulungu ni kukiusha mwe mbuli mbada.

¹ Mwiγei Mulungu, sa wana wekundishiγwa ndiye!

² Angai na kukundishana! Hambu hata Kilisito azamikundisha,

³ azakiinkila ṅwenye kwa mbuli ya ishwi, aγaluke ṅombe ya mviko, akakoṅwe, Mulungu aive mzingo mtana.

⁴ Miya mbuli za kilanga na za usaba woshe na za ubuγe zishezalangwa kwenyu, sa vivyoagiza waṅazi, hata mbuli za lukanko na za mhembo na za ufyosi ubada nkaziagiza, zeagiza ni za ntogolo du.

⁵ Hambu tailai vyedi kuti: Mtesi na mhuza na mubuγe nkana kifu mwe uzumbe wa Kilisito na Mulungu! Hambu mwe ivyoho ni mvika mizimu.

⁶ Kusheoneke mwemiazaγanya na mbuli za bule du! Hambu ne vyeleka, maya ya Mulungu yakiizila wanangwa we upapala. Kwa ivyoho msheangilane nawo!

⁷ Hambu ne mwi lwiza, miya lushe mu langaila, kuti muna Zumbe.

⁸ Angai vivyoagiza wana wa langaila!

Kuwo ja langaila.

⁹ Hambu kitende cha langaila ni utana na utanda na ukweli woshe.

¹⁰ Fanyanyai, ati ni mbwai vyemtamila Zumbe!

¹¹ Miya mshekigele mwe ndima za lwiza zishinazo kuwo, shuti mzibunkule.

¹² Hambu vyeγosholwa ndiwo na kufishafisha, hata kuvilonga vina shoni.

¹³ Miya vyoshe vyamanyika vikibunkulwa ni langaila; hambu vyoshe vyemanyika ni langaila.

¹⁴ Ne viholongwa: Viluka, iwe wesisila! Inuka kwa wafilewo! Ne ndivyo Kilisito akumulikile. Oleleshai, ndivyo mwange!

¹⁵ Mshetende udashi, tendai viyuγo! Manyai mishi mwinkiγweyo!

¹⁶ Hambu mishi inu ni mibada.

¹⁷ Kwa ivyoho msheγaluke wababashi, miya tailai, Zumbe avyokunda!

¹⁸ Mshetengele mkinywa mpombe! Hambu yaγenyeza uhuza, miya gisai mpehongwa!

¹⁹ Mtamwilane mazumo na maimbo na mawila ya kimpeho,

²⁰ mkimwimbila Zumbe, mkimtowela mazumo mwe myoyo yenyu, mkimlaviliza Mulungu Tate ntogolo mwe zina ja Zumbe ywetu Yesu Kilisito mishi yoshe kwa mbuli zoshe!

²¹ Kwa viya muvyomwogoha Kilisito itikanai!

Utanda wa wanyumba.

²² Wavyele waitike walume wawe viya watamwitika Zumbe!

²³ Hambu mγoshi ni mutwi wa mvyele, sa Kilisito avyo mutwi wa bumbangwa, hambu ne mhonya ywa ṅwili.

²⁴ Sa bumbangwa jivyomwitika Kilisito, vivyoho hata wavyele waitike waγoshi wawe mwe mbuli zoshe!

²⁵ Inywi waγoshi, kundishai wavyele wenyu, sa Kilisito akundishevyo bumbangwa akikiinkila ṅwenye kwa mbuli yakwe,

²⁶ kangwe ajihoze na mbulingwa akijiṅaza na kujihaka mazi!

²⁷ Ne akundilevyo kukiliγanyiza ṅwenye bumba jetogolwa kuti: Nkajina danko ao nkunyankunya ao vyefanana na ivi, kuti: Ni bumba ṅazi kishimasa.

²⁸ Vivyoho vyaagiza, hatawaγoshi, wakundishe wavyele wawe, viya ni mili yawe. Hambu mwemkundisha muke akikundisha ṅwenye.

²⁹ Hambu kale hoshe nkakuna ashukileye ṅwili wakwe ṅwenye, miya aushuγa, aulela, sa Kilisito aγoshwelevyo bumbangwa.

³⁰ Hambu ti madango ya ṅwili wakwe.

³¹ Ne ndivyo vileke, mγoshi akiasha ishe na nine, aandakane na muke, awa waili waγaluke ṅwili muṅwe.

³² Ichi kihili ni kikulu, miya imi nilonga viya vya Kilisito na vya bumbangwa. Lushe vivyoho hata

³³ inywi kila muntu amkundishe muke, sa avyokikundisha ṅwenye, miya mvyele amwogohe mγoshi!