Waefeso 4 - Kishambala New Testament 2005

Paulo ashunda Waefeso watende mpeho ṅwenga.

¹ Imi nishungiγweye kwa mbuli ya Zumbe namihimila, mtende myangile yeivana na uja mwitango, mwitangwewo nawo,

² mγenyeze ukuwi na uhozu na uzizimizi, mzizimizizanye na kukundishana, mkihime kutozesha,

³ kuti mpehongwa ni ṅwenga, mwivane viya mteshunganyiγwa haṅwe.

⁴ Nwilingwa ni muṅwe, mpehongwa id ṅwenga, kangi kialilo muchoitangilwa ni chicho kiṅwe.

⁵ Zumbe ni muṅwe, mtozesho ni muṅwe, ubatizi ni uṅwe,

⁶ Mulungu ni muṅwe, ni ishe ja woshe, ne mweγoshola woshe, ne mwetenda nguvu kwa woshe, ne mweikala mwe woshe.

⁷ Miya ishwi tiigisiγwe mbazi, kila muntu yakwe, sa avyoliγanyiγwa ni Kilisito.

⁸ Ne viholongwa: Yuja akwezileye na mwe lwingu azataha nkolengwa, azainka wantu vya mbazi.

⁹ Lushe vikiγangwa; Azakwela, so kuγamba kuti: Azanasheela na mwe shi za kuzimu?

¹⁰ Yuja asheeleye ni yuyu akwezileye na ulanga kuzinka nyingu zoshe, kangwe akugise uko koshe.

¹¹ Ṅwenye azagimbika kuṅwe ntuṅwa, kuṅwe wateγanyi, kuṅwe wabilikizi,

¹² kuṅwe walishi nawafuzi, kangwe waṅazi waliγanyiγwe, wadaheγoshola ndima ya kutumikila, kangwe ṅwili wa Kilisito uzengwe mpaka toshe

¹³ nezetibule na kuivana mitozesheze na mitailileya ṅwanangwa ywa Mulungu, tiγaluke wantu wagima, tibule ha ukuluwa uzuliwa Kilisito.

¹⁴ Tishezaikala tumala kinkebe tikivuviγwavuviγwa, tikizungulushiγwa ni mbuli, wantu wazohinya, zikihitukila sa mpeho yekunta, hambu ni za lwufyo na za mihembo ya wantu, kangwe watiazaγanye na minyanyi.

¹⁵ Miya ishwi netiγambilane vye kweli kwaviya tivyokundishana, mwe mbuli zoshe timkulile yuja Kilisito, kwa kuti ni mutwi wetu!

¹⁶ Hambu uyu ne mweleka, ṅwili woshe ukigombekeziγwa, ukitoγeshiγwa ni vinko vyoshe vyeugela nguvu, sa kila fungu iṅwe jivyoliγanyiziγwa ndima yakwe; ne ṅwili uvyokula, uvyozifiγwa kwa kukundishana.

Tisheange kimzimu.

¹⁷ Inu mbuli lushe niilonga na kumlanga Zumbe, aγaluke mwona, mshezaanga, sa wamzimu wavyoanga na kufanyanya vishinavyo bontokelo;

¹⁸ hambu ntongonyezi zawe ni za lwiza, wenye ni waγeni na nkalamo ya Mulungu kwa mbuli ya tumala, wayoikala nayo, na kwa mbuli ya kuti watoγesha myoyo yawe.

¹⁹ Kwa kuti shoni nkawana, wazaγoshola vyoshe vyewaheheleza, hata usaba woshe wazauγoshola, kangwe waγenyeze mah.

²⁰ Miya inywi nkamhinile mbuli ya Kilisito, kuti ni ivyoho.

²¹ Hambu mzaiva, mzafuziγwa mbuli yakwe kuti: Kweli ṅwenye ioneke mwe Yesu.

²² Kwa viya mwangilevyo kale, mwashei muntu ywa, kale mwekihosa na kutongela tamaa za lwufyo!

²³ Kangi lekai, ntongonyezi za myoyo yenyu ziuziγwe uhya,

²⁴ mzwike muntu muhya aumbiγweye Kimulungu, mtende utanda na uṅazi we kweli!

Miangile mihya nkaina ulongo.

²⁵ Kwa ivyoho towai mbuli za ulongo hulu, mlonge vya kweli kila muntu na ṅwiyae! Hambu toshe ti madango kila na ṅwiyae. Mwina maya mshebane,

²⁶ msheleke, uwa jikishwa mwina maya vivyoho,

²⁷ kangi mshemhakanye yuja muleba!

²⁸ Ndiye akibawa ashezabawa vingi, miya aγoshole ndima, aone na mikono yakwe ṅwenye vyetama, kangwe adahe kumupangila muntu mwekosa!

²⁹ Kila mbuli mbada ishelawe mwe vyanwa vyenyu, miya ati kuna mbuli ntanayedaha kuzifya habanikeho, shuti ilongwe kangwe weiva watamilwe!

³⁰ Mpeho mṅazi ywa Mulungu mshemwonye ukiwa! Hambu ne mwinkiγweye, amiγalukile lwitangilo mushiwa ukombozi.

³¹ Miya mbifya na nkunguka na maya na vuzo na lukanko na mbuli mbada zoshe ziuke kwenyu!

³² Mγendelane na uhozu na utungu na mbazi, sa Mulungu amifilevyo mbazi na Kilisito!