Waefeso 3 - Kishambala New Testament 2005

Ufuṅwa wa Paulo va kubilikila wamzimu.

¹ Ne vilekilevyo, nikishungwa imi Paulo kwa mbuli ya Kilisito Yesu, kangi kwa mbuli ya inywi wamzimu.

² Minga mzaiva mbuli ya uja ufuṅwa wa mbazi ya Mulungu niinkiγwewo, niiiγale kwenyu,

³ kuti imi nizafumbwilwa kutaila viya vishivyotailikana kale hoshe, sa nigondilevyo hadodo aho ṅwande.

⁴ Mkivifyoma mwadaha kuona nitailevyo vihili vya Kilisito.

⁵ Mishi mituhu nkavitailikane kwa wanawantu, sa vifumbwilwevyo ivi lushe ni mpehongwa ntuṅwa na wateγanyi wakwe waṅazi kuti:

⁶ Wamzimu wohe niwapazi, kuti: Wohe wa mumo mwe ṅwiliwakwe, kuti: Wohe niwantuwa kilaγa, Kilisito Yesu atinkilecho na uja ulau wedi.

⁷ Ne niwotumikila kwa ludahile lwa nguvu yakwe, ne mbazi Mulungu anifileyo.

⁸ Imi ni mdodo ṅwenye kuzinka waṅazi woshe, kangi nizafilwa mbazi, nibilikile wamzimu uzuli wa Kilisito ushiwodosekana,

⁹ niukule utanda wa iyo mbuli ifishiγweyo aho kale hoshe ni Mulungu aumbileye vintu vyoshe,

¹⁰ kangwe mishi inu wazumbe na wafuṅwa woshe we uko ulanga waonyeshiγwe ni bumbangwa, viyuγo vya Mulungu vivyoγenela.

¹¹ Ṅwenye ne avifanyanyeye aho kale, vibontokele mwe Zumbe ywetu Kilisito Yesu.

¹² Mwe uyu taonela milongele yena nyemi na luhitile, kwa kuti tamwalila na kutozesha.

¹³ Kwa ivyoho namihembeleza, msheleγele kwa mbuli ya nkondo zangu, hambu ni ntogolo yenyu.

Paulo ahembeleza, muntu ywa ndai atende nguvu.

¹⁴ Ne nihomgintila mazwi, uyu Tate, mweleka kila mwe wana, ati ni mwe lwingu,

¹⁵ ati ni kunu shi, akiitangwa late,

¹⁶ amife mbazi kwa uzuli wa ulana wakwe, kangwe muntu ywenyu ywa ndai atende nguvu, atintimazwe ni mpeho yakwe,

¹⁷ kangwe Kilisito aikale mwe myoyo yenyu kwa viya muvyotozesha, kwa kuti mzakundishiγwa, msheleze mazindo, mshikiziγwe ndiyo,

¹⁸ kangwe mdahefanyanya haṅwe na waṅazi woshe uhanawa uzangalamu na wa ukuluna waule;

¹⁹ kangi mtaile kuti: Lukundisho lwa Kilisito ni lukulu muno kuzinka utalizi woshe, kangwe mgisiγwe viya vyoshe, Mulungu avyogisa.

²⁰ Miya yuja kwa viya, nguvu yakwe ivyotendesha kwetu, atadaha kuγoshola kuzinka vyoshe, tivyohembeleza ao tivyotaila.

²¹ Atogolwe mwe bumba jakwe kwa mbuli ya Kilisito Yesu mishi yoshe, ndiyo itongele kale na kale! Amini.