Waebuleyo 7 - Kishambala New Testament 2005

Yesu ni mvikizi sa Melikisedeki.

¹ Uyu Melikisedeki ne ai zumbe ywa Salemu, kangi mvikizi ywa Mulungu mwe uko ulanga; azamsingila Abulahamu, akiγotoka kwe nkondo ya wazumbe, azamhongeza.

² Abulahamu azamupangila fungu ja kumi ja mitahe yoshe. Bosi aitangwa zumbe mwe utanda, vikibinda aitangwa zumbe ywa Salemu, ni kuγamba: Zumbe mwe utondolo;

³ nkana ishe, nkana nine, wababa zakwe wohe nkawatailikana, hata mishi yakwe iandiileho, kangi ihitileho kwa heleia, vyoshe nkavitailikana, kwa ivyoho afanyanyiγwa na ṅwanangwa ywa Mulungu, ni mvikizi kale na kale.

⁴ Olelai, uyu muntu avyokula, baba ywetu mkulu Abulahamu yohena akimunka fungu ja kumi ja mitahe!

⁵ Kweli wana Lewi waγwilewo ndima ya uvikizi wazalaγiliziγwa kulavya mbalingwa, ni wanduγu wawe, fungu ja kumi kwa uwo mulomo, kangi ne walawilewo mwe ṅwili wa Abulahamu.

⁶ Miya yuja, ashiyetailikana kwawe wababa zakwe, azamlavya Abulahamu fungu ja kumi, azamhongeza yuja ṅwenye misuhi.

⁷ Nkavina mkanano kuti: Kidodo chiṅazwa mesho ni kikulu.

⁸ Ivyoho wantu wefa ne wekaγuwa mafungu ya kumi, miya uko ni mwelongelwa uwona kuti: A moyo.

⁹ Ati vyadahikana kulonga uko, haṅwe na Abulahamu hata Lewi mwekaja fungu ja kumi azalaviγwa ijo fungu ja kumi.

¹⁰ Hambu ake mumo mwe ṅwili wa ishe, aho Melikisedeki akimhongeza uyu.

Uvikizi, uvyohitulwa ni Yesu.

¹¹ Ati ndimangwa izadaha kubontoleziγwa ni uvikizi wa wana Lewi — kangi ija mishi yawe mbalingwa izainkwa milomongwa — anga vyalongwa vyai: Shuti kulawile mvikizi mtuhu, sa ndivyo Melikisedeki ailivyo? Vyangashelongwa: Sa ndivyo Aloni ailivyo?

¹² Hambu uvikizi ukihitulwa, mulomongwa wohe shuti uhituke.

¹³ Hambu yuja mwelongwa ivyoho, aanduka mwe mbali ntuhu ishiγosholeyo ndima ya uvikizi, hata muntu muṅwe.

¹⁴ Hambu vyatailikika, kuti Zumbe ywetu aanduka mwa Yuda, kangi inu mbali Mose nkailaγilize hata mbuli ya wavikizi. Inu mbuli yaisiiza kutailikika na aho,

¹⁵ kukilawila mvikizi mtuhu, ndiye afanane na Melikisedeki,

¹⁶ hambu uyu nkalawile kwa mulomo weanduka kwa miaγilizo wa kiinushi, miya alawile kwa nguvu ya nkalamo ishiyobanika.

¹⁷ Hambu alongelwa uwona kuti: Iwe u mvikizi kale na kale, sa ndivyo Melikisedeki ailivyo.

¹⁸ Na inu mbuli uwo mulomo wa kale uushiγwa kwa mbuli ya unyonge wakwe, kangi nkaudahile kubontola ndima yakwe; hambu mulomo nkaubontoleza;

¹⁹ ne kuhoingiziγwa kialilo chetama kuzinka, ichi ne ndicho timubwile Mulungu nacho. Kangi nkaviγosholwe na kushekilisha;

²⁰ hambu waja wazaγaluka wavikizi, Mulungu aishikilishize, miya kwa mbuli ya uyu azakilisha akimuti:

²¹ Zumbe azakilisha, kangi nkezeaihilwe ndivyo: Iwe u mvikizi kale na kale.

²² Kwa ivyoho Yesu azaγaluka mguha ywa kilaγa chekula kuzinka chiya.

Mvikizi ashiye mhuza mwekalama.

²³ Kangi waja ni wangi waγalukewo wavikizi, kwa kuti wazafingiziγwa nkalamo ni kifa;

²⁴ miya uyu, kwa kuti akalama kale na kale, atoza uvikizi wakwe vivyoho, nkaumambuka.

²⁵ Ne vyeleka, akidaha kuhonya kale na kale waja wemwizila Mulungu kwa mbuli ya uyu, hambu a moyo kale na kale, kangwe adahewalongela.

²⁶ Hambu mvikizi mkulu mwetiagiza ni yuja ashiye mhuza, ashiye mubada, ashiye mumasa, ashiyeangilana na wahuza, mwekula kuzinka lwingu,

²⁷ ashiyeagiziγwa sa waja wavikizi wakulu kila mushi kunakihozeza uhuza wakwe ṅwenye, akibinda uja wa mbalingwa wohe. Uyu azavibontola kamkaṅwe aho akizakiinkila ṅwenye.

²⁸ Hambu mulomongwa waγalusha wantu wena unyonge wavikizi wakulu, miya iyo mbuli, ndiyo akikilishiza, ndiyo ikitongela mulomongwa nyuma, yamgimbika ṅwanangwa, akalame kale na kale, kangi abontoleze.