Waebuleyo 2 - Kishambala New Testament 2005

Tiitike mbulingwa.

¹ Kwa ivyoho vyatiagiza, tiisiize kutozesha viya tiivilevyo, kangwe tishezaazaγanyiγwa.

² Hambu mbulingwa ilongiγweyo ni walau izatenda nguvu, kangi mzinkano na usheiva woshe nzaona mlaho weagiza.

³ Lushe ishwi titaunyilika zeez, ati tahela uhonya weinga aho? Uzaanda kubilikilwa ni Zumbe, vikibinda waja waivilewo wazatilonga uwona.

⁴ Kangi Mulungu azakanila uja uwona na kuγoshola vilozo na vimaka na nguvu nyingi na kuwapangila mpeho ṅazi, sa avyokunda ṅwenye.

Yesu azakoṅwa kwa mbuli ya ishwi.

⁵ Hambu shi, ndiyo ilawile, tiyolonga aha, nkaiinkila kwa walau.

⁶ Hana hantu helongwa uwona kuγamba: Muntu ni mbwai, ukimfukila? Ṅwana muntu yohena, ukimlela?

⁷ Uzamshiγaza hadodo, afanane na walau, uzamunka ufuṅwa na utana, uzamγalusha zumbe ywa viya viγosholwevyo ni mikono yako, vyoshe uzaviika shi he milundi yakwe.

⁸ Akikundila vyoshe kumwitika nkana alekilecho, chishemwitike.

⁹ Ivi lushe nkatizati tione kuti: Vyoshe vyamwitika. Kuja kuγamba: Azashiγazwa hadodo, afanane na walau, taona, vizabontoka kwa Yesu, akifa na kulumiziγwa, kangi akibinda azahambiγwa na utana, azagimbikwa, kangwe icho kifa achimdomelele kila muntu kwa mbazi ya Mulungu.

¹⁰ Ni kwa mbuli ya uyu, kuti vyoshe vi haha, kangi ivi vyoshe vizaumbiγwa ndiye; uyu azaiγala wangi kwe utana, viya ni wanangwa; miya kwa kuti ni mulongezi ywa uhonya wawe, vizanamtala, abontole ndimangwa na kulumiziγwa.

¹¹ Hambu yuja mweṅaza na waja weṅazwa waanduka kwa muṅwe, ne vyeleka, yuja akisheona shoni kuwaitanga wanduγu,

¹² akiγamba: Wanduγu wangu nitawabilikila zina jako, nitakuimbila mwe bumba gati.

¹³ Vituhu aγamba: Imi nezenimwalile uyu! Kangi vituhu: Shimi haṅwe na wana, Mulungu aninkilewo!

¹⁴ Kwa kuti awa wana woshe wana mili ye mpome na nyama, yohena azaγuwa ṅwili we ivyoho, kangwe na kufa kwakwe amubushe yuja mwena nguvu ya kifa, ni Satani,

¹⁵ kangwe awakombole waja, ndiwo wakitoziγwa mwe upuna ni woγa wa kufa mishi yawe yoshe.

¹⁶ Kumbe siwo walau, awopikila, miya ni mbeleko ya Abulahamu, ayopikila.

¹⁷ Kwa inu mbuli vizamtala kulanana na wanduγu wakwe mwe mbuli zoshe, kangwe awaγalukile mvikizi mkulu kwa Mulungu mwena utungu mwekoolela, adahehoza uhuza wa wantu.

¹⁸ Hambu viya, ndivyo akiγeziγwa navyo, ndivyo akilumiziγwa navyo, adaha kuwaambiza weγeziγwa.