Waebuleyo 13 - Kishambala New Testament 2005

Tikundishane, tishetende kilanga na luzisho lwa mali.

^1-2 Ikalai na kukundisha wanduγu! Mshejale kuhokela waγeni na kishe! Hambu ivyoho kuṅwe wazafikiza walaungwa, kangi wenye nkawataile.

³ Fukilaiwaja washungiγwewo, viya mteshungwa haṅwe nawo! Fukilai waja welumiziγwa, kwa kuti wenye mu mumo mwe mili!

⁴ Unyumba uγolokelwe ni wantu woshe na utanda, he lusazi lwa wanyumba hasheγosholwe vibada! Hambu Mulungu atazalaha watesi na weanga na wakaza weyae wawe.

⁵ Mwange na kushekundisha feza, mtamilwe ni viya muvyoinkwa du! Hambu ṅwenye azalonga: Sezenikuashe, sezenikuukile!

⁶ Kwa ivyoho myoyo yadaha kutiṅala, tadahalonga: Zumbe ne mweniambiza, sezeniogohe! Muntu anitende ze?

Tikumbuke wafuzi wa Yesu atihozizeye na mpome yakwe.

⁷ Kumbukai wafuzi wenyu, ndiwo wakimiγambila mbuli ya Mulungu! Olelai, myangile yawe ivyobontoka! Tongelai mitozesheze yawe!

⁸ Yesu Kilisito alivyo γulo na lelo, ne alivyo bata kale hoshe.

⁹ Msheazaγanyiγwe mkihinyiγwa mbuli nyingi ngeni! Hambu vyatamisha, moyo ukitenda nguvu kwa mbazi, so kwa miko ya nkande, hambu waja waibashizewo nkawana waonelevyo navyo.

¹⁰ Tina okelo ja ṅombe za mviko jena ṅwiko kujiilwa ni waja weγoshola ndima mwe hemangwa.

¹¹ Hambu mpome za nyama zikiingiziγwa ni mvikizi mkulu haja haṅazi kwa mbuli ya uhuza, izo nyama vimba vyawe viokelwa he malaγo cha se he nkili.

¹² Kwa ivyoho hata Yesu azalumiziγwa he nkili cha se, kangwe ahoze mbalingwa na mpome yakwe ṅwenye.

¹³ Ivyoho hata ishwi netimtimile na uko cha se kwe malaγo tikizizimiza milumilwe yeinga sa yakwe!

¹⁴ Hambu kunu shi nkatina muzi wa nkalamo, miya tilonda uja, ndiwo ulawile.

¹⁵ Tiina yuja tishetende dizo ja kumwiγaila Mulungu ṅombe za mviko za ntogolo,

¹⁶ ni kuwo ja milomo yebilikila zina jakwe! Mshejale kufilana mbazi na viya, muvyona navyo!

¹⁷ Ne ṅombe za mviko zemtamila Mulungu. Tongelai wafuzi wenyu, muwaitike! Hambu waakagona mesho kwa mbuli ya myoyo yenyu, kwa kuti watazauziγwa, kangwe waγoshole ndima yawe na nyemi, washeiγoshole na kugumila! Hambu ivi so vitana vyenyu.

¹⁸ Tihembelezezei! Hambu tataila, kwa vyoshe tiγosholevyo, myoyo yetu ni mitana, hambu mwe mbuli zoshe takunda kuanga na utanda.

¹⁹ Miya naisiiza kumihimila ivyoho, kangwe nezenimiuziziγwe kinyanyi.

²⁰ Zumbe ywetu Yesu Kilisito, yuja mulishi mkulu ywa ngoto, Mulungu ṅwenye utondolo azamlavya ha wafilewo kwa nguvu ya mpome ya kilaγa chekalama.

²¹ Uyu Mulungu aminke vitana vyoshe, mdaheγoshola avyokunda! Hambu aakaleka, titende viya vyemtamila ṅwenye kwa mbuli ya Yesu Kilisito; uyu atogolwe kale na kale!

²² Namihembeleza, wanduγu, msheihilwe ni viya, nimishundilevyo, hambu mzamigondela na kudwishadwisha.

²³ Tailai, kuti mnduγu ywetu Timoteyo azashungulwa! Ati afikaiza, nitamiona haṅwe naye.

Tulo.

²⁴ Niluγushizai wafuzi wenyu woshe na waṅazi woshe! Awa wa Italiya wamiluγusha.

²⁵ Mbazi imiikaile nyoshe! Amini.