Waebuleyo 12 - Kishambala New Testament 2005

Tizizimize na kumwoleia Yesu.

¹ Lushe ishwi, kwa kuti tina waona weγenela sa viyaho, viya ni zunde jetidenganila, tileke kuhikuka, titowe hulu uhuza wekatitoza, tiomane na kuzizimiza iyo nkondo yetitala,

² timwolele Yesu, kuti ne mweandiila, kangi mwebontola viya, tivyotozesha! Uyu azaasha nyemi, aliγanyiziγweyo, azakunda kukoṅwa mwe muti, kangi nkaene shoni navyo, akibontola, azahita kwa ikala kulume kwe kiti cha Mulungu.

³ Mfukilei yuja, ndiye akizizimiza akiikilwa nkani zeinga aho ni wahuza, kangwe mshezatibuka, myoyo yenyu ikivivilwa!

Shundwe zatinka kuwo ja utanda.

⁴ Hambu aho mwomaneho na uhuza, nkamzati mwike nkani kinkondo ya kutakoṅwa,

⁵ kangi mzajala uwo mhembulizo, awotihembuliza nawo, viya ti wanae, akiγamba: Ṅwanangu, ushebele shundwe ya Zumbe, ushevivilwe ukibunkulwa ndiye!

⁶ Hambu Zumbe ayemkunda, amshunda, amunyakuza kila ṅwana, ayemhokela. Zizimizai, mshundike!

⁷ Mulungu amitoza, viya mu wanae, hambu ṅwana ashiyelutwa ni ishe ni ndai?

⁸ Miya ati nkamshundwa, sa woshe wavyokashundwa, lushe mu wana mupuna, nkamu wana vyale.

⁹ Vikibinda ati ne tiina watate zeshu wativyelewo, wakitishunda, kangi tikishundika, lushe tisheisiize kumwitika tate yweshu ywa kimpeho, titende nkalamo?

¹⁰ Waja wazatishunda mishi miγeke kwa viya, wafanyanyevyo wenye, miya uyu atishundila vitana, kangwe nezetipale uṅazi wakwe.

¹¹ Kweli shundwe zoshe aho, tihokaziona, nkatizifanyanya kuti: Ni nyeml, miya tiγamba: Ni ukiwa, miya mishi ya nyuma waja weshundiγwa ndizo watazaona, zivyowavyaila kuwo ja utanda mpalahole.

Tiambize wanyonge.

¹² Ati mikono izamilela, ati mazwi yazafa, yagelei nguvu vituhu!

¹³ Kangi sila, ndizo mjate, zizifyei, kangwe chesika chishezahalata; miya chihonyiγwe!

¹⁴ Isiizai kulonda mwivano na wantu woshe, kangi londai, ndivyo mṅazwe! Hambu ivi viishiho, nkahana ndiye amwone Zumbe.

¹⁵ Oleleshai kusheoneke kwenyu ashiyebwila mbazi ya Mulungu kwa kuzuzulika! Kusheoneke mwefanana na nkolo ya muti wekavyala vye ushungu, akizamionya lulali, wangi wakigisiγwa vibada ndiye!

¹⁶ Kusheoneke mtesi ao mubela Mulungu sa Esau ataγileye ukulu wakwe kwa mbuli ya nkande!

¹⁷ Hambu mwataila kuti: Aho nyuma akizakunda kupala mṅazo wa mesho azabentiγwa, hambu nkaene luvotekele, hata akilulonda na kulila.

Utana wa kilaγa kihya na wa mlaho.

¹⁸ Hambu inywi nkamhitile kwa bula he mulima wedahikana kudowiγwa, weaka moto, kangi nkamubuzile he lwiza ludala na he mpeho yekuntisha na nguvu,

¹⁹ ndiho hakikema gunda, ndiho hakiivika mululumo wa milongele ilemileyowantu kuiteγeleza, washeγambilwe izo mbuli;

²⁰ hambu uja mlaγilizo uzawakila wa kuγangwa: Hata mbuzi ikijata mulimangwa, shuti ikoṅwe na kuhomelwa mawe ao ishoṅwe guha!

²¹ Viya waenevyo vizaisiiza kugwiza woγa, Mose ṅwenye azalonga: Nadidima kwa woγa.

²² Miya mzabula he mulima wa Siyoni, he muzi wa Mulungu mwe moyo, ni uja wa Yelusalemu wa kilwingu,

²³ he makulija na makulija ya walau, he bumba gima jiungananejo he nyemi ya wana nteluka wagondiγwewo mazina mwe lwingu; vikibinda muzamubwila Mulungu mwewalaha woshe masa na mpeho za wafanda wabindilewo kukombolwa.

²⁴ Hata Yesu mwetiletela kilaγa kihya mzamubwila na mpome ya hozeza yelonga na nguvu kuzinka mpome ya Abeli.

²⁵ Oleleshai, kangwe mshezamshwika yuja mwelonga! Hambu wajawakishedaha kumnyilika, ndiwo wakimshwika kunu shi, akiwalonga, lushe ishwi titadaha vivihi tikimtowa hulu, akitilonga ai mwe lwingu?

²⁶ Haja kale kanwa chakwe chizavuwanisha inu shi, miya ivi lushe vyabilikilwa, kuti aγamba: Nezenivuwanishe vituhu, kangi aho so inu shi ike du, hata lwingu.

²⁷ Akiγamba: Nezenivuwanishe vituhu, ni kwa kuti viya vyevuwanikana vyaγalamuka, hambu ni viumbiγwevyo, kangwe kukalame vishivyovuwanikana.

²⁸ Kwa kuti tainkwa uzumbe ushiwovuwanikana, netilavilize ntogolo, ne ndivyo titende mivikile yemtamila Mulungu tikimgimbika ivyoho na kumwogoha.

²⁹ Hambu Mulungu ywetu ni moto weisiiza kubinda.