Waebuleyo 11 - Kishambala New Testament 2005

Bontokelo ja kutozesha.

¹ Kutozesha ni kutailisha tivyoalila na kuvotiγwa ni viya vishivyooniγwa.

² Inu mitozesheze wakale watogolwa nayo.

³ Tikitozesha, tataila, kuti inu ngulu ngima iumbiγwe ni mulomo wa Mulungu; muntu asheγambe kuti: Vyeonekana vianduka mwe viya vyeoniγwa! Waisilayeli wa kale wavotilevyo na kutozesha.

⁴ Abeli kwa mitozesheze yakwe azalavya ṅombe ya mviko yekuia kuzinka ija ya Kaini, ne ilekileyo, akilongwa uwona kuti: Ni mtanda; hambu Mulungu azakunda viya, alavizevyo.

⁵ Azafa, miya kwa ivyoho akelonga. Henoki kwa mitozesheze yakwe azaushiγwa, asheone kifa; nkazaoniγwe, hambu Mulungu azamwusha; hambu ashizati aushiγwe, azalongwa uwona, kuti: Azamtamila Mulungu.

⁶ Miya nkavidahikana kumtamila Mulungu na kushetozesha; hambu mwemwizila Mulungu, shuti atozeshe kuti: A haho, kuti: Waja wemlonda awainka upokezi wawe.

⁷ Nowa kwa mitozesheze yakwe azaγambilwa mbuli zishizatizo zilawile, azaitika, azazenga kibweta, ahonye we nyumbai mwakwe; ne agezilevyo inu shi masa, miya ṅwenye azaγalkua mupazi ywa uja utanda weanduka mwe kutozesha.

⁸ Abulahamu kwa mitozesheze yakwe azaitika akiitangwa, alawe, ahite kuntu alongiγweko, kuti nezeakupale; azahita, kangi nkataile, akohita nako.

⁹ Kwa mitozesheze yakwe azaikala uγeni mwe ija shi alongiγweyo, kangi siyo yakwe, azaikala mwe mahema haṅwe na Isaka na Yakobo, ni wapazi weyae wa uwo msuhi muṅwe.

¹⁰ Hambu azaafiza muzi wena shikamilo, utuzilwewo, uzengiγwewo ni Mulungu.

¹¹ Hata Sala kwa mitozesheze yakwe azainkwa nguvu ya kutenda nda, aidalahale,

¹² hambu azamfanyanya yuja amunkileye unu msuhi kuti: Ni mkweli. Kwa ivyoho waja wavyelwewo ni uyu muṅwe, ṅwili wakwe ukibinda kufa, wazaγenela sa ntondwe za lwingu, ao sa mshangalaγala we nkandai ya bahali ushiwodahikana kutalwa.

¹³ Awa woshe wazafa na kutozesha, nkawaene, vilaγa vikibontoka, miya wazaviona, vike hale, wazavitimiia na nyemi, wakilonga na kulaviliza kuti: Kunu shi ti waγeni weikala mishi miγeke du.

¹⁴ Hambu welonga ivyoho wamanyisha, kuti watalonda kaya.

¹⁵ Ati wazakumbuka kaya, walawileko nako, anga wazaona luγotokele.

¹⁶ Miya aho wana nkwiṅa na kaya chetama kuzinka chiya, ni kaya cha kilwingu; nevyeleka, Mulungu akisheona shoni nawo akiitangwa Mulungu ywawe; hambu azawaliγanyiza muzi.

¹⁷ Abulahamu kwa mitozesheze yakwe aho akiγezwa azamlavya Isaka, azamγalusha ṅwanae mwe ike ṅombe ya mviko, kangi aiinkiγwe misuhi,

¹⁸ hambu vizalongwa: Ndiye aitangwe mbeleko yako, ni Isaka ike du;

¹⁹ miya azatongonyeza, kuti Mulungu hata kwa wafilewo adaha kumwinulila mbeleko. Kwa ivyoho azamwuziziγwa aho akimwinkila.

²⁰ Isaka kwa mitozesheze yakwe azawaṅaza Yakobo na Esau mesho kwa mbuli, ndizo waone.

²¹ Yakobo kwa mitozesheze yakwe akifa azamṅaza kila ṅwana Yosefu mesho, akiinamila kishoma shanga cha ngoda yakwe.

²² Yosefu kwa mitozesheze yakwe akifa azafukila, kuti wana Isilayeli nezewalawe mwe ija shi, ne ahowalaγiliza mbuli ya mavuha yakwe.

²³ Mose akivyalwa azanafishiγwa myezi mitatu ni wavyazi kwa mitozesheze yawe, hambu wazaona ako kazana kuti: Ni kanyanyi, nkawaogohe mulomo wa zumbe.

²⁴ Mose kwa mitozesheze yakwe akiγaluka muntu mgima azalemela kuitangwa ṅwanangwa ywa ṅwana Falawo,

²⁵ azakundisha kuγoshwelwa vibada haṅwe na mbalingwa ya Mulungu; nkakundile kuja nyemi ya uhuza yekanyashila,

²⁶ azafanyanya kuti: Kubelwa kwa mbuli ya Kilisito ni uzuli wekula kuzinka mali zoshe za Kiegiputa, hambu azaolela upokezi wa bindilizo.

²⁷ Kwa mitozesheze yakwe azalawa Egiputa, nkaogohe maya ya zumbe; hambu yuja ashiyeoniγwa azamtozesha, viya atemwona.

²⁸ Kwa mitozesheze yakwe azabinda Pasa na kushisha mpome, kangwe mtakukoma wana nteluka ashewadowe wenye.

²⁹ Kwa mitozesheze yawe wazaomboka mwe bahali yelungulika, viya ni shi nkazu, kangi Waegiputa wakiγeza ivyoho wazachwilimiziγwa.

³⁰ Kwa mitozesheze yawe maboma ya Yeliko yazagwa yakizungulukilwa mishi mfungate.

³¹ Lahabu kwa mitozesheze yakwe, hala ni mvyele mhuza, nkafile haṅwe na waja, ndiwo wakisheitika, hambu waziγani azawafikiza vitana, viya so wankondo.

³² Lushe nilonge mbwai vingi? Senione lulongele, ati nakunda kulaviliza vivyoho mbuli za Gideyoni na za Balaka na za Simusoni na za Yefuta na za Dawidi na za Samweli na za wateγanyi;

³³ wazadaha wazumbe na kutozesha kwawe, wazaγoshola utanda, wazabwila misuhi, wazabonda vyanwa vya mashimba,

³⁴ wazazimya moto we nguvu, wazanyilika mashime yekolesha, wai wanyonge wazatenda nguvu, mwe nkondo wazaγaluka wakali, nkondo ngima za watuhu wazaziγulusha.

³⁵ Wavyele wazainkwa wafilewo wawe, kuti wazafufulwa; watuhu wazatowiγwa mpaka wakifa, nkawakombolwe, kangwe nezewaone ufufuki wetama kuzinka unu!

³⁶ Watuhu wazakankwa, wazalutwa, wazashungwa, wazagelwa mwe vyumba;

³⁷ wazakoṅwa na kuhomelwa mawe, wazakaṅantwa, wazalumiziγwa bule du, wazafa wakitungwa matuni, wazaanga waikantile nkopa ze mayoya, waikiγubike mababu ya mbuzi,

³⁸ wazaikala na sala na ukiwa na sungu zishizobwila wa kiinushi, wazakifisha mwe nyika na mwe milima na mwe mpanga na mwe mabome ya shi.

³⁹ Awa woshe watogolwa kwa mbuli ya mitozesheze yawe, nkawaene, kilaγa chikibontoka.

⁴⁰ Hambu Mulungu azationela vyetamisha, kangwe waja mbuli yawe ishebontoke, tiishiho ishwi.