Tito 2 - Kishambala New Testament 2005

Ndivyo Tito ashunde wantu.

¹ Iwe longa viya vyeivana na mifuzize yeinka ugima!

² Waγoshi wakulu shuti waleke mpombe, wadaheshimilwa, watende viyuγo, waikaziγwe ni mitozesheze na mikundishize na mizizimizize yawe!

³ Vivyoho wavyele wakulu wohena shuti watende myangile yeagiza waṅazi, washekanke, washetumikile mpombe,

⁴ watende mihinyize mitana, kangwe wainke wavyele wadodo viyuγo, wakundishe waγoshi wawe na wana wawe,

⁵ watende viyuγo na myoyo yeṅala, waγolokele nyumba zawe, waγaluke wakuwi, waitike waγoshi wawe, kangwe mbulingwa ya Mulungu ishebeleke!

⁶ Vivyoho hata wabweni uwashunde, watende viyuγo mwe mbuli zoshe!

⁷ Ṅwenye uwaγalukile hinilo ja miγoshwele mitana, mifuzize yako iγaluke ya kweli, sa vivyomwagiza mγoshi mtana!

⁸ Ubilikile mbulingwa yeinka ugima, ishiyobeleka, kangwe mwetikeleza nkani aone shoni akishowa mbuli mbada, ndiyo atishinge nayo!

⁹ Watuṅwa shuti waitike wababa zawe, wawatamile mwe mbuli zoshe,

¹⁰ washelandule na nkani, washehakiγwila vyaugwa, miya wamanyike, kuti waγolokela viya vyangwa vitana, kangwe mwe mbuli zoshe wagimbike mbulingwa ya mhonya ywetu Mulungu, wafuziγweyo.

Mbazi ya Mulungu yehonya.

¹¹ Hambu mbazi ya Mulungu yehonya izalawila wantu woshe, yatishunda,

¹² titowe hulu myangile ya kimzimu na kihelehele ehoshe cha kiinushi, tiikale mwe inu shi na viyuγo na utanda na kumwogoha Mulungu,

¹³ tiafize kialilo chetu cha nyemi, chibontoke, kukizalawila utana wa Mulungu ywetu mkulu na wa mhouya ywetu Kilisito Yesu;

¹⁴ uyu azakiinkila kwa mbuli ya ishwi, atikombole mwe upuna woshe ushiwoagiza, akihozeze mbali yakwe ṅwenye yekihima ndima utana.

¹⁵ Ne ndivyo abilikile haṅwe na kushunda na kubunkula wahuza na nguvu zoshe; kangi kusheoneke mwekubela!