Ntuṅwa 7 - Kishambala New Testament 2005

Sitefano akikanila na kubilikila mbulingwa.

^1-2 Mvikizi mkulu azaγamba: Ni ivyoho? Yuja azahitula angwe: Waγoshi inywi, wanduγu na watate, teγelezai! Mulungu mwe utana azamlawila Tate yweshu Abulahamu, ake Mesopotamiya, ashizati aikale Halani,

³ azamγamba: Lawa mwe shi yako na mwe nduγu yako! Hita mwe shi, ndiyo nikuonyeshe!

⁴ Ne alawileho mwe shi ya Wakalideyo, akihita Halani. Kuja kohena, ishe akibinda kufa, azamshamiza na mwe inu shi, muyoikala inywi ivi lushe.

⁵ Kangi nkamunkile tongo mumo, ati ni heinga sa lwayo luṅwe du, miya azamwikila msuhi wa kuzaimunka, iγaluke yakwe ṅwenye na ya mbeleko yakwe, ndiyo imtongele, kangi ne aishina ṅwana.

⁶ Vikibinda Mulungu azamlonga kuγamba: Mbeleko yako nezeiikale uγeni mwe shi ngeni, kangi muja nezewaikundile upuna na kuiγoshwela vibada mavuli magana mane.

⁷ Kangi ija mbali, ndiyo watumikile, imi nezeniilahe, ne Mulungu alongilevyo, kangi vikibontoka, nezewakulawe, wanitumikile hantu aha.

⁸ Azamunka kilaγa cha kushenga wana, kwa ivyoho akimvyala ṅwanae Isaka azamshenga mushi wa mnane, Isaka azamγoshwela Yakobo sa ivyoho, kangi uyu Yakoho waja watate zeshu wakulu kumi na waili azawaγoshwela sa ivyoho.

⁹ Waja watate wakulu wazaingilwa ni wizu na Yosefu, wazamtaγa na Egiputa, miya Mulungu azaanga naye,

¹⁰ azamvunila mwe ukiwa wakwe woshe, azamwonela mbazi, adahelonga na viyuγo kwa Falawo, zumbe ywa Egiputa, ne uyu ahomunka ufuṅwa wa Egiputa hata wa nyumba yakwe yoshe.

¹¹ Sala izagwa mwe shi ngima ya Egiputa na ya Kanaani na ukiwa ungi, hata watate zeshu nkawaene vya ja.

¹² Yakobo akiiva kuti: Egiputa kuna nkande, azatuma watate zeshu ntambo ya bosi.

¹³ Mwe ntambo yawe ya mbili Yosefu azakilaviliza kwa wakuluwe, ne nduγu ya Yosefu ihotailwa ni Falawo.

¹⁴ Miya Yosefu azatuma, azamwitanga ishe Yakobo na chengo chakwe choshe, wazaγelemuka milongo mfungate na washano.

¹⁵ Yakobo azasheela Egiputa, ṅwenye azafa γuko na watate zeshu;

¹⁶ wazaiγalwa Sikemu, wazazikwa mwe ija mbila, Abulahamu aγuzileyo na feza kwa wana Hemoli kuja Sikemu.

¹⁷ Mishi ya uja msuhi, Mulungu amunkilewo Abulahamu, ikitimiza, iyo mbali izakula, izaγenela uko Egiputa,

¹⁸ mpaka kukiinuka zumbe mtuhu ywa Egiputa ashimlailaye Yosefu.

¹⁹ Uyu azaγendela inu mbali yetu na minyanyi, azaγoshwela watate zeshu vibada, akiwakundila kuasha vizana vyawe tunduwi, kangwe washeikale ugima.

²⁰ Mishi ija Mose azavyalwa, Mulungu akimwolela, ni ṅwana mtana; azakuziγwa myezi mitatu mwa ishe.

²¹ Uyu akiashiγwa, ṅwana ywa kindele ywa Falawo azamdodola, azamkuza, viya ni ṅwanae ṅwenye.

²² Mose azafuziγwa utalizi woshe wa Kiegiputa, milongele yakwe na miγoshwele yakwe izatenda nguvu.

²³ Akibinda mavuli milongo mine azakwela ṅwenye, akaolele wana Isilayeli, wanduγu wakwe.

²⁴ Akiona, muṅwe avyoγoshwelwa vibada, azakwelwa ni maya, azamlahiziza yuja aonyiγweye lulali, azamkoma yuja Muegiputa.

²⁵ Azaγamba, wanduγu wakwe newataile, kuti Mulungu akunda kuwainka uvunizi na mkono wakwe, miya waja nkawavitaile.

²⁶ Keloi jakwe azawalawila, wakiomana wenye, azakunda kuwatanya, waivane, akiwati: Waγoshi, mu wanduγu, nini mkiifyana?

²⁷ Miya yuja mwemwifya ṅwiyae azamshindika angwe: Ni ndai akugimbikeye zumbe na mlamuzi ywetu?

²⁸ Wakunda kunikoma nami, sa viyaho umkomilevyo γulo yuja Muegiputa?

²⁹ Kwa inu mbuli Mose azanyilika, azaγaluka mγeni mwe shi ya Midiyani, ne avyailweko wana waili.

³⁰ Mavuli milongo mine yakibontoka, azalawilwa mwe nyika ya mulima wa Sinai ni mlau ywa Zumbe mwe moto uakilewo mwe shafi.

³¹ Mose akiviolela azamaka viya, avyoona. Akibula hehi, aolele vyedi, kuzalawa kanwa cha Zumbe angwe:

³² Imi ni Mulungu ywa waisho, Mulungu ywa Abulahamu na ywa Isaka na ywa Yakobo; Mose azadidima, azatoγelwa ni kuhaolela.

³³ Zumbe azamuti: Shungula vilatu vya milundi yako! Hambu aha hantu, uhoγoloka, ni shi ṅazi.

³⁴ Imi nizaona sungu za mbali yangu ye kuja Egiputa, nizaiva midihile yawe, nizasheela, niwavunile. Lushe iwe hita, nikutume na kuja Egiputa!

³⁵ Yuja Mose, wamwikileye nkani kuγamba: Ni ndai akugimbikeye zumbe ao mlamuzi?, uyu Mulungu azamtuma, aγaluke zumbe na mvunizi akiambiziγwa ni mkono wa yuja mlau amlawileye mwe jiya shafi.

³⁶ Uyu azawalavya na kuγoshola vimaka na ntangilo mwe shi ya Egiputa na he bahali yelungulika namwe nyikamavuli milongo mine.

³⁷ Uyu Mose ne alongileye wana Isilayeli kuti: Mulungu nezeamifufwile mwe wanduγu wenyu mubilikizi mweinga sa imi.

³⁸ Uyu ne aangileye na jiya bumba ja watate zeshu mwe nyika haṅwe na yuja mlau alongileye naye mwe mulima wa Sinai, azainkwa mbulingwa ze moyo, aziminke;

³⁹ miya watate zeshu nkawakundile kumwilika, miya wazamshindika, myoyo yawe izahituka na kuja Egiputa,

⁴⁰ wazamγamba Aloni: Tiγoshwele milungu, ndiyo itilongwele! Hambu yuja Mose atilavizeye mwe shi ya Egiputa nkatitaila lushe mbuli yakwe, ati aenei.

⁴¹ Wazaγoshola mishi ija ndama ya nkambaku, chiya kinyuwa wazachiiγaila ṅombe ya mviko, wazatamilwa ni ndima za mikono yawe.

⁴² Miya Mulungu azahiluka akiwaleka, watumikile ntimizi za lwingu, sa vyagondwavyo mwe kitabu cha wateγanyi kuγamba: Inywi wa chengo cha Isilayeli, kuja nyika ne mkiniletela ṅombe za kukoma na za mviko mavuli milongo mine?

⁴³ Mzainula hema ja Moloki na ntondwe ya mulungu wa Lomufa, ne muγosholezo, mzivike; nezenimishamize na hale kuzinka Babeli.

⁴⁴ Hemangwa ja uwona watate zeshu ne waina najo uko nyika, sa viyaho yuja mtakulonga amlaγilizevyo Mose, ajiγoshole, ija fanyanyi aeneyo ilivyo.

⁴⁵ Jiya watate zeshu wazajiγuwa, wazajiingiza, waina Yosuwa, mwe shingwa za wamzimu, Mulungu aγulushewo, wahakanye watate zeshu mpaka mishi ya Dawidi.

⁴⁶ Uyu azaonela mbazi kwa Mulungu, azamhembeleza, ashungulwe kumwonela Mulungu ywa Yakobo ikailo.

⁴⁷ Miya Salomo azamzengela nyumba.

⁴⁸ Miya yuja mwe uko ulanga nkaikala mwe nyumba zizengiγwezo ni mikono ya wantu, sa mteγanyi avyolonga:

⁴⁹ Lwingu ni kiti changu, shi ne nimoikila milundi yangu; munizengele nyumba ani? Ne Zumbe avyolonga. Ni hantu ani, ndiho nihemele?

⁵⁰ Siwo mkono wangu uγosholewo ivi vyoshe?

⁵¹ Inywi watili, mshishengiγwewo myoyo na mashikilo, mishi yoshe mwamwikila Mpeho mṅazi nkani, watate zenyu walivyo, ne mulivyo nenywi.

⁵² Ni mteγanyingwa yuhi, walate zenyu washimγulusheye? Wazawakoma waja wabilikilewo aho kale, mbuli ya uyu mtanda ndivyo ibontoke; ne yuja, mumwinkileye mishi inu, mumkomileye;

⁵³ ni nywiyo mwahokelawo mulomongwa, kuti mzaulaγiliziγwa ni walau, miya nkamwuγolokele.

Sitefano akoṅwa.

⁵⁴ Wakiiva izi mbuli wazaihilishiγwa mwe myoyo yawe, wazaluma lusaya kwa mbuli yakwe.

⁵⁵ Uyu azamema mpeho ṅazi, azaolela na kwe lwingu, azaona utana wa Mulungu, azamwona Yesu, aiγoloke kulume kwa Mulungu.

⁵⁶ Ne aholonga: Shivyo naona, lwingu lwizuγuke, kangi namwona ṅwanangwa ywa muntu, aiγoloke kulume kwa Mulungu.

⁵⁷ Wazakema na vyanwa vikulu, wazashita mashikilo yawe, woshe wazamγulukila haṅwe,

⁵⁸ wazamshindika, alawe muja kaya, wazamhomela mawe. Waona wazaika shuke zawe he milundi ya mubwanga mweitangwa Sauli.

⁵⁹ Wazamhomela Sitefano mawe; uyu azainula kanwa, azalonga angwe: Zumbe Yesu, hokela mpeho zangu!

⁶⁰ Azaginta mazwi, azakema na kanwa kikulu angwe: Zumbe, ushewaikile unu uhuza! Akibinda kulonga ivyoho, ne ahosisila.