Ntuṅwa 5 - Kishambala New Testament 2005

Ananiya na Safila.

¹ Kuna mγoshi mweitangwa Ananiya, ana muke ndiye Safila.

² Yohena azataγa jakwe γisa; miya ziya shilingi, aonelezo, azafisha kuṅwe, hata muke aitaile, azaiγala kafungu du, azakaika shi he milundi ya ntuṅwa.

³ Petelo azamuti: Ananiya, nini Satani akigisa moyo wako, umhenyeze Mpeho mṅazi na kufisha shilingi kuṅwe, uonelezo na γisa jako?

⁴ Nkudahile kujitoza? Hambu ne jii jako; hata jiibindile kutaγwa, ṅwenye uzadaha kukifanyanyiza, ndivyo uγoshole najo. Nini ukifanyanya mbuli yeinga aho mwe moyo wako? Nkumhenyeze muntu, miya umhenyeze Mulungu.

⁵ Ananiya akiiva izi mbuli, azakina na shi, azadwika moyo. Woγa ukulu uzaingila woshe waviivilewo.

⁶ Wabwanga wazainuka wazamwinula, wazamlavya, wazamzika.

⁷ Saa ntatu zikizinka, muke yohena azaingila, miya nkataile viya viγosholekevyo.

⁸ Petelo azamγamba: Niγambila, ati γisa jenyu mujitaγile ivyoho? Angwe, Ehe, ne titaγilevyo.

⁹ Petelo azamuti: Nini mkiivana kuγeza mpeho ya Zumbe? Olela, milundi ya waja wamzikilewo mulumewo izabula haja he kifiγwe, newakulavye nawe!

¹⁰ Viya du lushe azakina he milundi yakwe, azadwika moyo; waja wabwanga wakiingila, wazamwona, kuti ni kimba, wazamlavya, wazamzika haja ha mulume.

¹¹ Woγa ukulu uzaingila bumba gima na woshe waivilewo izi mbuli.

Watamu wahonyiγwa.

¹² Ntangilo na vilozo vingi vizaγosholwa ni mikono ya ntuṅwa kwa wantu. Woshe wazaangilana haja he balaza ya Salomo na kutenda moyo muṅwe.

¹³ Miya waja watuhu nkakuna agumbileye moyo na kuwatongela, hambu wantu woshe wazawatogola vikulu.

¹⁴ Miya wemtozesha Zumbe wazaingila vivyoho, ni bumba kulu ja waγoshi na ja wavyele.

¹⁵ Hata watamu wawe wazawalavya na se, wazawaika mwe sazi na mwe nkingo, kangwe Petelo akizinka, kizuli chakwe du chiwabwile kuṅwe.

¹⁶ Hata wantu wangi wa mizi tanga ya Yelusalemu wazaunganana na kuleta watamu na waja welumiziγwa ni mpepo ze usaba, awa wosheni wazahonyiγwa.

Ntuṅwa mwe chumba.

¹⁷ Miya mvikizi mkulu azalawila na woshe, awona nawo, ne bumba ja Masadukeyo, woshe wana wizu ungi muno.

¹⁸ Wazagwila ntuṅwa na mikono yawe, wazawagela mwe chumba cha wantu woshe.

¹⁹ Miya mlau ywa Zumbe azazuγula nyuvi za chiya chumba na kilo, azawalavya, azawati:

²⁰ Hitai, mγoloke mwe vikilongwa, mubilikile mbalingwa mbuli zoshe za inu nkalamo!

²¹ Wazaiva, wazahita mwe vikilongwa na maziyeziye, wazabilikila. Mvikizi mkulu akiiza na bumba jakwe, azaitanga wafuṅwa wakulu nawanduγu woshe wa wana Isilayeli, azatuma na kwe chumba, waja waletiγwe.

²² Wafunguwo wawe wakibula nkawawaene mwe chumba; wazauya,

²³ wazalonga angwe: Tizaona, chumba chiizuγalwe na utanda woshe, kangi waluγojo waiγoloke kwe vifiγwe, miya tikizuγula muja ndai, nkatiene muntu.

²⁴ Mγolokezi ywa vikilongwa na wavikizi wakulu wakiiva izi mbuli, wazaaγilwa; nkawataile inu mbuli, ndivyo ibontoke.

²⁵ Miya kuzaiza muntu, azawaγambila kuti: Waja waγoshi, mugezilewo mwe chumba, wa muja mwe vikilongwa waiγoloke, wafuza mbalingwa.

²⁶ Lushe mγolokezi azahita na wafunguwo wakwe, azawaleta, miya so kwa nguvu, hambu wazaogoha wantu, washekoṅwe ndiwo na kuhomelwa mawe. Wakiwaleta wazawaika mwe kitala.

²⁷ Mvikizi mkulu azawauza angwe:

²⁸ Tizamilaγiliza uwo mulomo wa kuγamba: Mshezabilikila mbuli za iji zina! Kangi shivyo, muzi wa Yelusalemu uzagisa ubilikizi wenyu, mwakunda kutigela masa ya uyu muntu!

²⁹ Petelo na ntuṅwa weyae wazalandula, angwe: Shuti timwitibe Mulungu kuzinka wantu!

³⁰ Mulungu ywa watate zeshu azamfufula Yesu, inywi mumkomileye na kumholeza mwe muti.

³¹ Uyu Mulungu azamgimbika, aγaluke zumbe na mhonya, ainke Waisilayeli luvotekele, waushiliziγwe mahuza.

³² Kangi ishwi ti waona wa izi mbuli, hala Mpeho mṅazi, Mulungu ayoinka waja wemwitika.

³³ Wakiviiva wazaihilishiγwa, wazakunda kuwakoma.

³⁴ Miya kuja kitala kuzainuka Faliseyo mweitangwa Gamaliyeli, ni mfuzi ywa mulomongwa mwegimbikwa ni wantu woshe, azalaγiliza waja wantu, wanelaviγwa hadodo.

³⁵ Vikibinda azalonga weyae angwe: Waγoshi wa Kiisilayeli inywi, kiγojei kwa mbuli ya awa wantu, ndivyo mγoshole!

³⁶ Hambu mishi izinkileyo Toida azalawila, azakifanyanyiza ṅwenye, kuti ndiye, azatongelwa ni wantu weγelemuka hata magana mane; uyu azakoṅwa, ne waja woshe, ndiwo wakimwitika, wahoasakana, wazahakibanikila.

³⁷ Vikibinda kuzalawila Yuda ywa Galileya mishi ija, wantu wakigondwa kodi, uyu azabahula wantu wangi, wamtongele; yohena azabanika, kangi woshe, ndiwo wakimwitika, wazaasakana.

³⁸ Lushe namiti: Mbuli ya awa wantu ilekei, muwashungule! Ati ntongonyezi zawe na ndima zawe zianduka kwa wantu, nezichakuke.

³⁹ Miya ati zianduka kwa Mulungu, nkemdahe kuzichakula, kangwe mshezabunkuka kuti: Mwamwomanya Mulungu. Wazamwitikila.

Ntuṅwa washungulwa na kutowiγwa.

⁴⁰ Wazaitanga ziva ntuṅwa, wazawatowa na kuwalaγiliza, washezabilikila zina ja Yesu, vikibinda wazawashungula.

⁴¹ Waja wakilawa mwe kitala wazahita na nyemi, kwa kuti wazakundiziγwa kuγoshwelwa vibada kwa mbuli ya zinangwa.

⁴² Uja mushi mgima nkawadizile kufuza na kubilikila ulau wa nyemi wa Kilisito Yesu kuja vikiloi na kuja kaya.