Ntuṅwa 4 - Kishambala New Testament 2005

Petelo na Yohana washungwa.

¹ Waja wakilonga na wantu, wavikizi na mγolokezi ywa vikilongwa na Masadukeyo wazalawila.

² Hambu wazaihilwa, kuti waja wafuza wantu na kuwabilikila ufufuki wa wafilewo kwa viya, Yesu afufukevyo.

³ Wazawagwila na mikono yawe, wazawagela mwe chumba mpaka mhitu wa uja mushi, hambu ne kwishwele.

⁴ Miya wangi waivilewo ija mbuli wazatozesha, waγoshi du wazaγelemuka makulija mashano.

Wa Petelo wakikanila chasale.

⁵ Kukicha wazumbe wawe na watawa na watabaluwangwa wazaunganana Yelusalemu.

⁶ Hata wavikizi wakulu wa haho, wakina Ana na Kayafa na Yohana na Alekisando na waja woshe weanduka mwe mbali ya wavikizi wakulu.

⁷ Wazawaγolosha gati, wazawauza: Viya muviγoshole kwa nguvu ya ndai ao mwe zina ja ndai?

⁸ Ne Petelo ahogisa mpeho ṅazi, azawati: Inywi wazumbe wa mbalingwa na inywi waγolokezi!

⁹ Ati ishwi lelo talahiγwa, kwa kuti muntu mnyonge azazifiγwa, mkitiuza: Uyu ahonyiγwe ni nguvu ya ndai?,

¹⁰ tailai inywi nyosheni haṅwe na mbali ngima ya Isilayeli kuti: Viγosholwe mwe zina ja Yesu Kilisito ywa Nazaleti, mumkonteleye mwe muti, Mulungu amwinuleye kwa wafilewo! Kwa nguvu yakwe uyu aγoloka aha, muliho, ai mgima.

¹¹ Yuja ni jiya iwe jibezilwejo ni inywi wazengo, miya vikibinda jizaγaluka iwe ja heta.

¹² Kuluhu akakuoneka uvunizi, kangi ishwi wantu kunu shi nkatiinkiγwe zina tuhu, ndijo tihonywiγwe najo.

¹³ Wakiteγeleza ija milongele ya Petelo na ya Yohana, ivyona nyemi, kangi wakifanyanya kuti: Waja so mafundi ya ugondengwa, kangi so wavikizi, wazamaka, wazataila, kuti wana Yesu.

¹⁴ Kangi wakimwolela yuja muntu ahonyiγweye, akiγoloka haṅwe nawo, nkawaene vya landula.

¹⁵ Wazawalaγiliza, wamlawe muja mwe lahilo ja masa,

¹⁶ wazatambikilana inu mbuli angwe: Awa wantu tiwatende zeze? Hambu kilozo chetailikana chizaγosholwa ndiwo, chizalawila woshe weikala Yelusalemu, hata ishwi nkatidaha kukela nkani.

¹⁷ Miya kangwe inu mbuli isheisiize kugisa wantu woshe, tiwavaile, washezamubilikila muntu iji zina vituhu.

¹⁸ Wazawaitanga, wazawashunda, kangwe washezalonga hata na kubilikila mwe zina ja Yesu.

¹⁹ Miya Petelo na Yohana wazawalandulaangwe: Fanyanyai wenye, ati kwa Mulungu ni utanda kumiitika kumzinka Mulungu!

²⁰ Nkatidaha kuleka kulonga viya, tienevyo, kangi tiivilevyo.

²¹ Miya waja wazawavaila, wakibinda wazawashungula, hambu nkawaene mbuli ya kuwalaha kwa mbuli ya wantu, hambu woshe wazamtogola Mulungu kwa viya viγosholwevyo.

²² Hambu yuja muntu aγoshwelweye chiya kilozo cha kuhonyiγwa aibindile mavuli milongo mine.

Bumbangwa javika.

²³ Wakibinda kushungulwa wazahita kwa weyae wawe, wazawatamwila vyoshe, wavikizi wakulu na waγolokezi wawaγambilevyo.

²⁴ Waja wakiviiva, woshe wazainula vyanwa kiṅwe, wazamvika Mulungu angwe: Zumbe, iwe uzaγoshola lwingu na shi na bahali na vyoshe vye mumo.

²⁵ Uzaleka, mpeho ṅazi ilonge na kanwa cha baba ywetu, ṅwanao Dawidi, kuγamba: Nini wamzimu wakitula vuzo? Nini mbali za wantu zikipikapika bule?

²⁶ Wazumbe wa kunu shi waikazanya njama, wafuṅwa wakatozanya myoyo kwa mbuli ya Zumbe na ya Kilisito ywakwe.

²⁷ Hambu wazaunganana kweli mwe unu muzi kwa mbuli ya ṅwanawo mṅazi Yesu, ugimbikeye; Helode na Pontiyo Pilato, wamzimu na wa mbali ya Isilayeli wazaivana,

²⁸ waγoshole viya vyoshe, mkono wako na ntongonyezi zako ziteγanyevyo aho kale kuti: Nezevibontoke.

²⁹ Lushe Zumbe, olela ija mivailile yawe, uwafe wapuna wako mbazi, walonge mbuli zako na nyemi zoshe na kushetendwa ni shoni hata!

³⁰ Kusula mkono wako vivyoho, wantu wakahonyiγwe, kuγosholwe ntangilo na vimaka kwa nguvu ya zina ja ṅwanawo mṅazi Yesu!

³¹ Wakivika ivyoho, haja hantu waungananeho hazavuwanika, wosheni wazagisa Mpeho mṅazi, wazalonga mbuli ya Mulungu na nyemi.

Bumba jivyoivana.

³² Jiya bumba joshe ja waja wetozesha jizatenda moyo muṅwe na mpeho ṅwenga; nkakuna hata muṅwe mweγamba viya, avyona navyo, kuti ni vyakwe ṅwenye, miya vyashe ne vii vya bumbangwa.

³³ Ntuṅwa zizalonga na nguvu nyingi uwona wa ufufuki wa Zumbe Yesu, kangi waja woshe wazagisa mbazi nkulu.

³⁴ Kangi nkakuna wakiwa kwawe, hambu woshe, ndiwo waina maγisa na nyumba, wazavitaγa, wazaleta ija mali, waeneyo na viya vitaγiγwevyo, wazaiika shi he milundi ya ntuṅwa;

³⁵ kila azapangilwa, sa avyokosa.

³⁶ Kuna Mulewi, mbali yakwe ianduka mwe shi ya Kipulo, ndiye Yosefu, aitangwa ni ntuṅwa Balinaba, ni kuγamba: Ṅwamhembulizo.

³⁷ Uyu ne aina γisa, azajitaγa azaleta ziya shilingi, aonelezo, azaziika shi he milundi ya ntuṅwa.