Ntuṅwa 3 - Kishambala New Testament 2005

Petelo amhonya muntu ashiγendaye.

¹ Petelo na Yohana wazakwela haṅwe mwe vikilongwa saa kenda, wantu wahokavikila.

² Kuna muntu ashidahaye kuγenda, vivyo avyelwevyo, aakaletiγwa akiikiγwa kila mushi he kifiγwe cha vikilongwa cheitangwa kitana, alombeze vya mbazi kwa waja weingila vikiloi.

³ Uyu akimwona Petelo na Yohana, wakiunga kuingila mwe vikilongwa, azawahembeleza, wamunke cha mbazi.

⁴ Miya Petelo haṅwe na Yohana

⁵ wazamdulila angwe: Tiolele! Azawashungila, azaafiza, ndivyo wamunke.

⁶ Miya Petelo azamuti: Feza na zahabu sina, miya nivyona navyo, navikunka: Mwe zina ja Yesu Kilisito ywa Nazaleti inuka, uhite!

⁷ Azamtoza na mkono wakwe wa kulume, azamwinula. Viya du lushe milundi na nkungu zakwe zizatenda nguvu, azafikainuka,

⁸ azaγoloka, azaγenda, azaingila haṅwe nawo mwe vikilongwa, azahita na kuvinavina na kumtogola Mulungu.

⁹ Wantu woshe wazamwona, avyoγenda na kumtogola Mulungu, kangi wazamtaila,

¹⁰ kuti ni yuja, ndiye akiikala he kifiγwe kitana cha vikilongwa, akilombeza vya mbazi, wazamakisha na kushentuka kwa viya, aγoshwelwevyo.

Petelo abilikila kuhitula ntongonyezi.

¹¹ Yuja mkilema ahonyiγweye azamtongela Petelo na Yohana, ne wantu woshe wahowaγulukila na kwe ija halaza yeitangwa ya Salomo, hambu wazamakisha.

¹² Petelo akiwaona azawalonga waja wantu angwe: Waγoshi wa Kiisilayeli, nini mkimaka inu mbuli? Kangi nini mkitidulila, viya titeleka kwa nguvu yetu wenye ao kwa mivikile yetu, uyu akiγenda?

¹³ Mulungu ywa Abulahamu na ywa Isaka na ywa Yakobo, Mulungu ywa wababa zetu azamgimbika ṅwanae Yesu; kweli inywi mzamwinkila, muzamtowa hulu kwa Pilato, yuja akikunda kumshungula.

¹⁴ Miya inywi muzamhetela leba yuja mṅazi na mtanda, mzahembeleza, mwinkwe mkoma wantu.

¹⁵ Zumbe ywa nkalamo muzamkoma; Mulungu azamfufula uyu kwa wafilewo, waona ni shwiyo.

¹⁶ Kwa viya atozeshevyo zina jakwe, jiya zina jakwe jizamgela nguvu uyu, muyemwona, kangi muyemtaila; mitozesheze yakwe ainkiγweyo ndiye ne imunkileyo uyu unu ugima, muwoona nyoshe.

¹⁷ Lushe wanduγu, nataila, kuti muviγoshole kwa kushetaila kwenyu, sa viyaho vya wazumbe wenyu.

¹⁸ Mulungu azabontola viya, abilikilavyo aho kale na vyanwa vya wateγanyi woshe, kuti Kilisito ywakwe nezealumiziγwe.

¹⁹ Lushe hitulai ntongonyezi zenyu, kangi hitukai, uhuza wenyu uushiγwe, kangwe mishi idahekinta, wantu wahohemela he cheni cha Zumbe!

²⁰ Ne ndiho nezeamtumile Yesu Kilisito, muyemuliγanyiziγwa kale.

²¹ Uyu vyamtala kunaγuwa uzumbe wa lwingu mpaka mishi ija, vintu vyoshe vihozauya kwe chandusho chawe, sa Mulungu alongilevyo kale hoshe na vyanwa vya wateγanyi wakwe waṅazi.

²² Mose azalonga kuγamba: Zumbe Mulungu nezeamifufwile mwe wanduγu wenyu mubilikizi mweinga sa imi; ne ndiye nezemumwive mbulizoshe, ndizo amilonge.

²³ Miya kila muntu, ndiyc ashemwive yuja mubilikizi, atakoṅwa, auke mwe mbalingwa.

²⁴ Wateγanyi woshe, kuandiila kwa Samweli na waja woshe we nyuma walongilewo, wazabilikila mbuli za mishi imi.

²⁵ Inywi mu wauangwa wa waja wateγanyi na wa chiya kilaγa, Mulungu aikilecho na wababa zenyu akimγamba Abulahamu: Mwe mbeleko yako mbali zoshe za shi nezeziṅazwe mesho.

²⁶ Bosi ni nywiyo, Mulungu afufwilewo ṅwanae, azamtuma, amiṅaze mesho, kangwe kila muntu ahiluke, akileka mbuli zakwe mbada.