Ntuṅwa 27 - Kishambala New Testament 2005

Paulo aiγalwa Loma.

¹ Mbuli ikidumulwa na kuγamba, tihite Itahya, wazamwinkila Paulo na watuhu washungiγwewo kwa mkulu ywa washilikali mweitangwa Yuliyo, ni ywa humba jemγolokela Kaiza.

² Tizaingila mwe chombo cha Adalamiti cheunga kuhita kwe mizi ya Asiya, tizainuka tiina Alisitaliko ywa Tesalonike ya Makedoniya.

³ Mhitu wakwe tizafikila Sidoni, Yuliyo azamfila Paulo mbazi, azamkundiza kuhita kwa weyae watana, aneshuγwa ndiwo.

⁴ Tikiinuka haja tizagwila nkandankanda ya Kipulo kwa mbuli ya mpeho mbada.

⁵ Tizadwisha bahali ya Kilikiya na ya Pamufiliya, tizafikila Mila ya Likiya.

⁶ Kuja mkulu ywa washilikali akiolela azaona chombo cha Alekisandiliya chehita Italiya, azatiingiza na mumo.

⁷ Miya ichi nkachidahile kutambula hata, tizaγenda mishi mingi na kuchikungumiza, kangwe tibule Kinido, hambu ne tikikindiziγwa ni mpeho; vikibinda tizagwila nkandankanda ya Kaleta hehi na Salimone;

⁸ tizapisha kabisa kushweza chombo na kwe bahali, ne tihobula hantu heitangwa Mafikilo matana, ni hehi na muzi wa Laseya.

Paulo ahaza wantambo.

⁹ Ivyoho mishi izaγelemuka mingi, kangi kuanga mwe bahali mishi ija kuna nkondo nyingi, hambu hata mishi ya kufunga iizinkile, ne Paulo ahowahembeleza

¹⁰ akiwati: Waγoshi, naona kuti: Inu ntambo neiγende na lulali, kangi nekubanike vingi, so miziγo du na chombo miya hata ishwi wenye.

¹¹ Miya yuja mkulu ywa washilikali azamwitikila mγolokezi na ṅwenye chombo kuzinka viya vyelongwa ni Paulo.

¹² Kwa kuti haja wafikileho nkahatama vyedi ha bindila mishi ya kau, wangi wazakunda, wainuke haja, wapishepishe, ati wadaha kubula Fonike, wakabindile mishi ya kau γuko, kwa kuti ni fikilo ja vyombo mwe shi ya Kaleta jezuγuka na lwazu lweingila zuwa.

¹³ Kukioneka mpeho yelawa luja lwazu lwegwila zuwa mishi ya vuh, ne wahoγamba: Viya tikundilevyo, tizavimota, wazainuka, wazaγenda hehi hehi na Kaleta.

Kilazoni kikulu

¹⁴ Kafunda kakizinka, wazainukilwa ni mpeho ya kilazoni yeitangwa kiinula maimbi.

¹⁵ Chiya chombo chizagwilwa ndiyo, nkachidahile kuikila ija mpeho nkani na kuihitukila, ne tihoolela du, tivyoiγalwa ndiyo.

¹⁶ Tikizinka na kuγulushiγwa ni mpeho he kisiwa kidodo cheitangwa Kalauda tizapisha kahisa, tigwile chombo kidodo.

¹⁷ Tikichikombaγanya, tizachiγuwa, chitiambize; tizachikanta he chombo ṅwenye na kuchikingamusha; wakiingilwa ni woγa wa kuγamba: Netikinyiγwe na haja heitangwa Siliti, wazasheleza ziya shuke zeγesa chombo, wazahita vivyoho.

¹⁸ Mpeho ikiisiiza kutivengela na nguvu zoshe, mhitu wakwe wazaasha miziγo na mwe bahali,

¹⁹ mushi wa ntatu tizatambika na mikono yetu ntanu za chombo na mwe bahali.

²⁰ Mishi mingi zuwa hata ntondwe zikishetilawila, kangi ija mpeho ikiisiiza vivyoho, kialilo chetu choshe cha kuhona chizaaγa.

Paulo ashangalaza wantu.

²¹ Wantu wakisheona vya kuja mishi mingi, Paulo azainuka, azaγoloka gati kwawe, azawati: Waγoshi, ati mzaniitika na kusheinuka kuja Kaleta, anga nkatiene ulu lulali na inu mibanikile.

²² Kangi ivi lushe aha namishunda, mgumbe myoyo, hambu inywi nkakuna muntu, ndiye abanike, ni chombo du.

²³ Hambu ichi kilo mlau ywa Mulungu ywangu, niyemtumikila, azaniγolokela,

²⁴ azaniti: Paulo, usheogohe! Iwe shuti ubule kwa Kaiza! Kangi waja woshe we haṅwe na iwe mwe chombo Mulungu azawakunka.

²⁵ Kwa ivyoho, waγoshi, gumbai myoyo! Hambu imi nina ichi kialilo kwa Mulungu kuti: Nezevibontoke ivyoho, nilongiγwevyo.

²⁶ Miya shuti tifose na kwe kisiwa.

²⁷ Kilo cha kumi na ne chikibula, tikianga mwe bahali ya Adiliya, vikibula kilo kikulu, wandima wa chombo wazafanyanya, kuti wazabula hehi na shi;

²⁸ wakitambika luγole lwa kuhima na mwe bahali wazaona, kuti ni mikono milongo mtandatu; wakishweza hadodo wazahima vingi, wazaona, kuti ni mikono milongo mine na mishano.

²⁹ Wazaingilwa ni woγa wa kutambikwa na kwe mahambalawe, ne wahotambika kuja nyuma malama mane ya kutozeza chombo, wazaafiza, kuche.

³⁰ Miya waja wandima wa chonibo, wazalonda lunyilikile mwe chombo, wazasheleza chiya chombo kidodo na mwe bahali, wazaγamba: Kangwe tisheleze hata uko mazu malama ya kutozeza chombo.

³¹ Ne Paulo ahomγamba mkulu ywa washilikali na washilikali: Awa wakishenyamala mwe chombo, inywi nkamdaha kuhonyiγwa.

³² Lushe washilikali wazashenga ngole zetoza chiya chombo kidodo, wazachileka, chigwe na mwe bahali.

³³ Mpaka kukiunga kucha, Paulo azawahimila woshe, waje nkande, azawati: Lelo ni mushi wa kumi na ne, mkiikala na kuafiza na kusheja nkande, nkamna mjilevyo hata.

³⁴ Ne vyeleka, nikimihimila, muje nkande. Hambu inu mbuli neibontoke na kuhona kwenyu, hambu inywi nyoshe nkakuna ndiye aaγilwe ni luzwili luṅwe du lwa mutwi wakwe.

³⁵ Akibinda kulonga ivyoho, azaγuwa mgate, azamlaviliza Mulungu ntogolo, woshe waiolele, azaubendula, azaandiila kuja.

³⁶ Woshe wazatoγwa ni myoyo, wohe wazaγuwa nkande, wazaja.

³⁷ Ishwi toshe muja mwe chombo ti wantu magana maili na milongo mfungate na mtandatu.

³⁸ Wakiiγuta nkande, wazahuhiza chombo na kutambika ngano na mwe bahali.

Chombo chachakuka.

³⁹ Kukicha ija shi nkawaitaile, miya wazaona ha kuingiziza chombo, kwa kuti bana maimbi yahotulikila.

⁴⁰ Wazadwisha ngole za yaja malama ya kutozeza chombo, wazayaasha mwe bahali, kangi haho wazashungula ngole zitozizezo bala jegwiza chombo sila yakwe, wazakweza jiya shuke, wazajiivanya na mpeho, vikibinda wazatimila haja hantu, maimbi yahotulikila.

⁴¹ Miya wazatambikwa na hantu hena mazi maγeke, ne chombo chihotoziγwa uko shi, haja mazu chizafuka mwe shanga, chizatoγa, nkachivuwa hata, miya uko nyuma chizabondwa ni nguvu ya maimbi.

⁴² Washilikali lushe wazakunda kukoma waja washungiγwewo, kangwe kusheoneke mwenyilika na kutwela.

⁴³ Miya yuja mkulu ywawe azakunda kumhonya Paulo, ne ahowalemeza inu mbuli, wakundileyo, azalaγiliza waja wedaha kutwela, walongole kulumbila na mwe bahali, watimile kuja mpwai;

⁴⁴ waja watuhu waγuwe mabala ao mitimiti ya chiya chombo, wahite nayo. Ivyoho woshe wazahonyiγwa, wazabula kuja mpwai.