Ntuṅwa 26 - Kishambala New Testament 2005

Paulo akikanila ha zumbe Agilipa.

¹ Agilipa azamuti Paulo: Washungulwa kukikanila.

² Ne Paulo ahokusula mkono, azakikanila angwe: Zumbe Agilipa, kwa mbuli ya viya vyoshe, nivyoshingwa ni Wayuda, ṅwenye natamilishiγwa nikidaha kukikanila lelo kwako.

³ Hambu iwe watailisha misimo na mikanano yoshe ya Kiyuda, ne nivyokuhembeleza, ushebulwe ni futofuto, uniteγeleze.

⁴ Myangile yangu iandiilevyo kuγenda mwe inu mbali yangu uko Yelusalemu, nike mubwanga, Wayuda woshe wataila.

⁵ Hambu wazanitaila aho kale; anga wenye wanikanila mwe izi mbuli, kuti ne nikitongela mbuli za jiya bumba ja mivikile yetu ja kukihimisha, hambu ne nii Faliseyo.

⁶ Ivi lushe naγoloka aha nikilahwa kwa mbuli ya kialilo cha chiya kilaγa, watate zeshu wainkiγwecho ni Mulungu.

⁷ Kangi ziya mbuli zetu kumi na mbili zaalila, zichibwile na kushedila kuvika kilo na mushi. Zumbe, kwa mbuli ya ichi kialilo nafyaliṅwa ni Wayuda.

⁸ Lushe nini kwenyu kukilongwa kuti: Ni mbuli ishiyotozeshekana ija ya kuγamba: Mulungu afufula wafilewo?

⁹ Kweli hata imi ṅwenye nizafanyanya mwe moyo wangu: Shuti nikihime kuikila zina ja Yesu ywa Nazaleti nkani!

¹⁰ Nizaviγoshola uko Yelusalemu, waṅazi wangi nizawagela mwe chumba nikibinda kushungulwa ni wavikizi wakulu, kangi wakikoṅwa, nami nizauya na haja.

¹¹ Hata mwe mavikilo yoshe nizawatumiza kangi muno nikiwakundila kukanka; maya yangu yakiisiiza kukwezwa ndiwo, nizawaγulusha mpaka kwe mizi ye hale.

Avyohitwilwa moyo. 12-20.

¹² Kwa izi mbuli nizahita hata Damasiko niishungulwe na kulaγiliziγwa ni wavikizi wakulu.

¹³ Na mushi mkulu, zumbe, nizaona silai langaila jilawilejo mwe lwingu, jakulisha kuzinka langaila ja zuwa, jizanimulikila imi na waja, nitambilewo nawo.

¹⁴ Toshe tikikina na shi, nizaiva kanwa, chikinilonga Kiebuleyo: Sauli! Sauli! Nini ukiniγulusha? Ntoγo yako ni ukishampa vyetunga.

¹⁵ Imi nizaγamba: Zumbe, u ndai? Zumbe azaniti: Ni miyo Yesu, uyemγulusha.

¹⁶ Miya inuka, uγoloke na milundi yako! Hambu ne vilekilevyo, nikikulawila, nikuliγanye, utumikile na kulongela uwona viya, uenevyo, na viya, ndivyo nezeuone!

¹⁷ Nezenikuvunile kwe inu mbali na kwa wamzimu, ndiwo nikutume kwawe,

¹⁸ uwaγubwile mesho, walawe kwe lwiza, wahituke na kwe langaila, walawe kwe ufuṅwa wa Satani, wahituke na kwa Mulungu, waushiliziγwe mahuza yawe, wohe wapangilwe kifu cha waṅazi, wakinitozesha.

¹⁹ Aho, zumbe Agilipa, silemele kuitika viya vya kilwingu, nienevyo.

²⁰ Miya nizaandiila kubilikila waja we nko Damasiko, nikibinda hata Yelusalemu na shi ngima ya Wayuda, hata wamzimu nizawabilikila, wahitule ntongonyezi zawe, wahituke na kwa Mulungu, kangi waivanye miγoshwele yawe na kuja kuhitula ntongonyezi zawe.

²¹ Kwa ivyoho Wayuda wazanigwila muja mwe vikilongwa, wazaγeza kunikoma.

²² Miya kwa viya, mambiziγwevyo ni Mulungu, mpaka unu mushi wa lelo naγoloka haha, nalonga wadodo na wakulu uwona; kangi silonga mbuli ntuhu kushima viya, wateγanyingwa na Mose walongilevyo kuti: Nezevibontoke, kuti:

²³ Kilisito azatalwa ni kulumiziγwa, kuti: Kilisito ni mulimbulo wa ufufuki wa wafilewo, kuti: Ne ndiye abilikile mbalingwa na wamzimu, wabule be langaila.

Mbuli za Paulo zivyovota.

²⁴ Akikikanila ivyoho, Fesito azalonga na kanwa kikulu angwe: Paulo, utalaluka! Utalizi wako ungi wakulalusha.

²⁵ Angwe ni Paulo: Zumbe Fesito, sitalaluka, miya nitalonga mbuli za kweli na za viyuγo.

²⁶ Hambu uyu Zumbe, niyemubilikila na nyemi, ataila izi mbuli, hambu sidaha kufanyanya kuti: Izi mbuli zoshe kuna ashizitailaye, hambu nkaviγosholwe nkandai.

²⁷ Zumbe Agilipa, watozesha mbuli za wateγanyi? Nataila, kuti wazitozesha.

²⁸ Agilipa azamuti Paulo: Hadodo ani wanganivota, niγaluke Mkilisito.

²⁹ Angwe ni Paulo: Namhembeleza Mulungu, ati ni hadodo, ati ni hakulu, si weyo ike, miya woshe weniiva lelo waγaluke wantu we ivyoho, sa imi ṅwenye nilivyo, kushima du aya mazolo.

³⁰ Ne zumbe ahoinuka na mtoza shi na Belenike na waja waikalewo nawo,

³¹ wazahita he njama, wazalonga wenye na wenye kuti: Uyu muntu nkaγoshole mbuli yeagiza kukoṅwa ao du kushungwa.

³² Agilipa azamγamba Fesito: Uyu muntu angadaha kushungulwa, ati nkaγambile: Nakunda, masa yangu yabontokele kwa Kaiza.