Ntuṅwa 24 - Kishambala New Testament 2005

Wayuda wamshinga Paulo ha Feliki.

¹ Mishi mishano ikizinka, mvikizi mkulu Ananiya azasheela na waγolokezi na mtakulonga mweitangwa Telitulo, awa wazamlawila mtoza shi na kumfyalima Paulo.

² Akiitangwa, Telitulo azaandiila kumshinga masa, azamγamba: Kwa nguvu yako tizaona utondolo ungi, kangi kwa viyuγo vyako inu mbali izaγoshwelwa vitana vingi;

³ viya vyoshe tavihokela koshe koshe na kukulaviliza ntogolo yoshe yekuagiza iwe zumbe Feliki.

⁴ Miya kangwe nisheisiize kukubuza futofuto, nakuhembeleza: Titeγeleze hadodo kwa ukuwi wako!

⁵ Uyu muntu tizamwona, kuti ni mchakuzi, Wayuda woshe mwe ngulu ngima awagwishiliza nkondo, ni mkulu ywa jiya bumba ja Wanazaleti.

⁶ Kangi azaγeza kugela vikilongwa kisitama; lushe tizamgwila, tizakunda kumlaha kwa vitigo vyetu.

⁷ Miya Lisiya, mfuṅwa ywa washilikali, azaiza na nguvu nyingi, azamlavya mwe mikono yetu,

⁸ azalaγiliza waja wemfyalima, waize na kwako. Lushe iwe ṅwenye wadaha kuuzanya naye ziya mbuli zoshe, tizomfyalima ishwi, uzitaile.

⁹ Wayuda wohena wazabadikabadika mbuli, wazalonga, kuti ni vivyoho.

Paulo akikanila ha Feliki.

¹⁰ Mtoza shi akimkonyeza, kangwe alonge, Paulo azalandula, azaγamba: Kwa kuti nataila, kuti iwe u mlaha masa ywa inu mbali mavuli mangi, nitakikanila aya masa yangu kishiwoγa.

¹¹ Ṅwenye wadaha kulaila, kuti mishi, nikwezileyo Yelusalemu kwa vika, nkaizinka kumi na mili.

¹² Kangi nkawaniene muja mwe vikilongwa, nikishimwela na wantu, ao nikitunya wantu, ati ni mwe mavikilo yawe, ati ni muja kaya ṅwenye.

¹³ Kangi nkawadaha kunivota na viya, wavyonifyalima ivi lushe.

¹⁴ Miya nakuγambila na kulaviliza, kuti ija silangwa, wayoitanga kilingo, ne niyomtumikila nayo Mulungu ywa watate zeshu, nitozeshe viya vyoshe vigondiγwevyo mwe mulomongwa na kwa wateγanyingwa.

¹⁵ Kangi kwa Mulungu nina kialilo, awa wenye wachoafiza wohe, kuti nezekuoneke ufufuki wa watanda na wa wahuza.

¹⁶ Kwa inu mbuli ṅwenye nakihima kuanga kishimasa kwa Mulungu, hata kwa wantu mwe mbuli zoshe.

¹⁷ Mavuli mangi yakizinka, nizahita kwe mbali yangu, niwaiγaile mbazi na matulo ya weyae wawe watuhu.

¹⁸ Aho ne wanieneho muja vikiloi, nikiiapulwa; nkawaniene, nikianga na wantu wangi, nkawaniene, nikitula vuzo.

¹⁹ Miya kuna Wayuda walawilewo Asiya, anga waja wa kunu kwako wakinifyalima, ati wana masa na imi.

²⁰ Hata awa wenye newakuγambile, ati wazaona mbuli kwangu, nikilahwa ni wafuṅwa, ati so uja mulomo muṅwe du,

²¹ nilongilewo na kanwa kikulu, niiγoloke gati kwawe nikiγamba: Ni kwa mbuli ya ufufuki wa wafilewo, nikilahwa lelo kwenyu.

Feliki aakamwiva Paulo miya nkamshungula mavuli 2.

²² Feliki akiiva ivyoho azawazunganya, hambu azataila vyedi mbuli ya ija silangwa, azawati: Aho ndiho Lisiya, yuja mfuṅwa ywa washilikali, nezeasheele, nezeniuzanye naye izi mbuli zenyu.

²³ Azamlaγiliza mkulu, Paulo agelwe mwe chumba, miya ashemwonye sungu, kangi weyae ashewafingize, wekunda kumγoshwela ndima.

²⁴ Mishi miγeke ikizinka, Feliki azaiza na muke Dilusila, ni Muyuda, azamtumiza Paulo, azamteγeleza, akimwonyesha mbuli ya Kilisito Yesu.

²⁵ Miya akihuliza kumshimwela mbuli ya utanda na ya kukivota na ya masa, ndiyo yalawile, Feliki azaingilwa ni woγa, azamlandula angwe: Ivi lushe aha hita du! Aho ndiho nezenikombaγane, nezenikuitange vingi.

²⁶ Miya azaafiza, ainkwe masihilo ni Paulo, ne vilekilevyo, akishedila kumwitanga, akitamwilana naye.

²⁷ Mavuli maili yakizinka, Feliki azahokelwa uzumbe ni ṅwiyae, ndiye Polikiyo Fesito. Miya Feliki azakunda kutamila Wayuda, kwa ivyoho azamwasha Paulo, aishungiγwe.