Ntuṅwa 23 - Kishambala New Testament 2005

Ufufuki.

¹ Paulo azadulila waja wafuṅwa, azalonga angwe: Wanduγu wangu! Mpaka unu mushi wa lelo nizaanga na moyo woshe uṅazilewo kangi na kumwolela Mulungu.

² Miya mvikizi mkulu Ananiya azalaγiliza waja weγoloka naye, wamtowe mwe kanwa.

³ Ne Paulo ahomuti: Mulungu akatakutowa iwe lukando lwezifiγwa na kushishilwa! Iwe waikala, unilahe kwa mulomongwa, kangi wabana mulomongwa ukilaγiliza, nitowiγwe!

⁴ Waja waγolokewo haja wazamuti: Utamkanka mvikizi mkulu ywa Mulungu?

⁵ Angwe ni Paulo: Wanduγu, sitaile, kuti ni mvikizi mkulu; hambu kuigondiγwe: Zumbe ywa mbali yako ushezamlonga vibada!

⁶ Paulo akitaila, kuti waja bumba iṅwe ni ja Masadukeyo, bumba tuhu ni ja Mafaliseyo, azawalonga waja wafuṅwa na kuinula kanwa: Wanduγu, imi ni Faliseyo, kangi ni ṅwana Faliseyo; nifyalimilwa kialilo cha ufufuki wa wafilewo.

⁷ Akilonga ivyoho, Mafaliseyo na Masadukeyo wazaifyana, ne jiya bumba jipanganevyo.

⁸ Hambu Masadukeyo wazalonga kuti: Nkakuna ufufuki, nkakuna walau, nkakuna mpehongwa, miya Mafaliseyo walonga na kulaviliza kuti: Viyavyoshe vi haho.

⁹ Kuzatulika vuzo kulu; watabaluwangwa wa jiya bumba ja Mafaliseyo wazainuka, wazaomana na weyae wawe angwe: Uyu muntu nkatimwona mbuli mbada; ati mpehongwa ao du mlau azalonga naye, nketidahe kumkeleza Mulungu nkani.

¹⁰ Nkumbizi zikiisa kuγenela, yuja mkulu ywa washilikali azaogoha kuγamba: Paulo neatatulwe ndiwo, azalaγiliza washilikali, washeele, warawushe na nguvu kuja gati kwawe, wamwingize bomani.

¹¹ Kilo chiya chetongela Zumbe azamγolokela, azamuti: Gumba moyo! Hambu sa viyaho ulongelevyo mbuli zangu uwona kunu Yelusalemu, vivyoho shuti uzilongele uwona hata Loma!

Paulo ahetelwa leba.

¹² Kukicha Wayuda wazaunganana, wazakilisha kuγamba: Washeje, washenywe, washizati wamkome Paulo!

¹³ Waja waivanewo ivyoho wazaγelemuka kuzinka milongo mine.

¹⁴ Wazabasha wavikizi wakulu na waγolokezi, wazawati: Tizakilisha na kukilana, tishedowe nkande, tishizati timkome Paulo.

¹⁵ Lushe inywi haṅwe na wafuṅwa woshe mγambilei yuja mfuṅwa mkulu ywa washilikali, amsheleze keloi na kwenyu, kuti mwakunda kubunkula vyedi mbuli zakwe! Miya ishwi tiikiteγile kumkoma, ashizati abule kwenyu.

¹⁶ Ṅwana lumbuje ja Paulo akiiva inu leba azafikahita bomani, azavimwukwila Paulo.

¹⁷ Paulo azaitanga mkulu muṅwe, azamuti: Uyu mubwanga mwiγale kwa mfuṅwa mkulu ywa washilikah!

¹⁸ Hambu ana mbuli ya kumwukwila. Yuja azamγuwa, azamwiγala kwa mfuṅwa azamuti: Yuja Paulo azaniitanga mwe chumba, azanihembeleza, nimlete uyu mubwanga na kwako, kangwe: Ana ndivyo akuγambile.

¹⁹ Yuja mfuṅwa mkulu azamtoza mkono, azamwiγala he njama, azamwuza angwe: Ni mbwai, ndivyo uniγambile?

²⁰ Azamuti: Wayuda wazaivana, wakuhembeleze, kangwe umsheleze Paulo keloi na kwa wafuṅwa, viya utakunda kuuzanya naye vyedi mbuli yakwe.

²¹ Lushe iwe ushewaitikile! Hambu kuna wantu kuzinka milongo mine wemnyatila, wazakilisha, washeje, washenywe, washizati wamkome; awa waikiteγile, waafiza du kilaγa, ndicho uwainke.

Paulo aiγalwa Kesaliya.

²² Mfuṅwa mkulu ywa washilikali azamshungula yuja muhwanga akimlaγiliza kuγamba: Ushezamγambila muntu, kuti uzaniukwila izi mbuli!

²³ Azaitanga wakulu waili, azawati: Liγanyai washilikali magana maili, wahite Kesaliya, hatawepanda mafalashi milongo mfungate na wetoza maguha magana maili, wakiteγe saa ntatu ya kilo!

²⁴ Hata mafalashi wayatandike, wamkweze Paulo na mumo, wamwiγale kwa mtoza shi Feliki!

²⁵ Azagonda baluwa; mbuli agondilezo, shizi:

²⁶ Imi Kalaudiyo Lisiya, namluγusha mtoza shi Feliki mwena nguvu nyingi.

²⁷ Uyu muntu azagwilwa ni Wayuda, azaunga kukoṅwa ndiwo. Nikiviiva nizahita na bumba jawashilikali, nizamvunila, hambu nizaγambilwa, kuti ni muntu ywa Kiloma.

²⁸ Kwa kuti nizakunda kutaila, ati ni mbuli ani, wayomshinga, nizamsheleza na kwa wafuṅwa wawe.

²⁹ Ne nieneho, kuti ashingwa mbuli za mikanano ya mulomongwa, nkahana mbuli ya kumkoma ao du ya kumshunga.

³⁰ Miya nikiukwilwa, kuti uyu muntu ahetelwa leba, nizafikamtuma na kwako; hata waja wemfyalima, nizawalaγiliza, wakuγambile iwe mbuli yakwe.

³¹ Lushe ikala mpeho! Waja washilikali wazamγuwa Paulo, sa walaγiliziγwevyo, wazamwiγala na kilo mpaka Antipatili.

³² Keloi jakwe wazaleka, waja wapandilewo mafalashi wahite naye, wenye wazauya na bomani.

³³ Waja wakiingila Kesaliya wazainkila baluwa kwa mtoza shi, Hata Paulo wazamlaviliza kwakwe.

³⁴ Akibinda kufyoma ija baluwa azamwuza Paulo, ati aanduka mwe shi ya hi; akiiva, kuti aanduka Kilikiya,

³⁵ azamuti: Nezenikuteγeleze aho, ndiho waja wekushinga waize, azalaγiliza, agelwe mwe chumba mwe kitala cha Helode.