Ntuṅwa 22 - Kishambala New Testament 2005

Paulo alonga na kukikanila. 1-21.

¹ Waγoshi, wanduγu na watate, niteγelezai lushe, nikikikanila kwenyu!

² Wakiiva, kuti alonga nawo Kiebuleyo wazaisiiza kuleka lwashu.

³ Azawati: Imi ni mγoshi ywa Kiyuda, mvyelwe mwe muzi wa Taliso mwe shi ya Kilikiya, miya nikuziγwe mwe unu muzi he milundi ya Gamaliyeli, nizafuziγwa utanda woshe wa mulomongwa wa wahaha zetu, ne nikikihima kwa mbuli ya Mulungu, sa inywi nyoshe muvyoγoshola mpaka lelo.

⁴ Ija sila nizaitongela vivyoho, nizahuliza hata kukoma; hambu waγoshi na wavyele nizawashunga nizawagela mwe chumba,

⁵ sa muvikizi mkulu na watawa woshe wavyonilongela uwona. Kangi nizainkwa ndiwo baluwa kwa wanduγu, nizahita Damasiko, kangwe waja wohena we kuja niwalete na kunu Yelusalemu waishungiγwe, walahwe.

⁶ Miya nikihita, nikibula hehi na Damasiko, ni mushi mkulu, ne kuholawila langaila kulu mwe lwingu jizaisa kunimulikila,

⁷ nizakina na shi, nizaiva kanwa, chikiniti: Sauli! Sauli! Nini ukiniγulusha? Imi nizaitikiia: U ndai, Zumbe?

⁸ Azaniti: Ni miyo Yesu ywa Nazaleti, uyemγulusha.

⁹ Waja weyangu, niwona nawo, wazajiona jiya langaila, miya chiya kanwa chilongilecho na imi nkawachiivile.

¹⁰ Miya nizaγamba: Zumbe, nitende zeze? Zumbe azaniti: Inuka, uhite Damasiko! Ne ndiho uγambilwe vyoshe uinkiγwevyo, uviγoshole.

¹¹ Nikishedaha kuona kwa utana ungi wa jiya langaila, nizatoziγwa mkono ni weyangu, nizahita Damasiko.

¹² Kuna muntu, ndiye Ananiya, ni muntu mwetozesha mulomongwa woshe, ana kilango kitana kwa Wayuda woshe weikala kuja.

¹³ Uyu azaiza na kwangu, azaniγolokela na kuniγamba: Sauli, ona vituhu! Ne nihoona viya du lushe.

¹⁴ Yuja azaniti: Mulungu ywa watate zeshu azakushaγula aho kale, utaile kikundile chakwe, umwone yuja mtanda, uive mulomo welawa mwe kanwa chakwe.

¹⁵ Hambu iwe neuγaluke mwona ywakwe kwa wantu woshe, uwaγambile viya, uenevyo, na viya, uivilevyo.

¹⁶ Lushe uzuzulikai? Inuka, ubatizwe, uhakwe mahuza yako, ukemele zina jakwe!

¹⁷ Nikibinda kuuya Yelusalemu, mushi nikivika mwe vikilongwa nizashentukisha.

¹⁸ Hambu nizamwona, akiniti: Fikainuka, ulawe nguzu kunu Yelusalemu, kwa kuti nkezewahokele uwona wako, uwonilongela!

¹⁹ Nizalandula kuti: Zumbe, ṅwenye wataila kuti: Waja wekutozesha ne nikiwagela mwe chumba na kuwatowa, tikianga mwe mavikilo;

²⁰ hata haja mpome ya mwona ywako Sitefano ikiitilwa, imi niiγoloke haho nikitamilwa, kangi ne nikiγoja shuke za waja wamkomilewo.

²¹ Azaniti: Hita! Hambu imi nenikutume na hale kwa wamzimu.

Paulo alongwa masa kwa wafuṅwa wa Kiyuda.

²² Wazamteγeleza mpaka kwe inu mbuli, ne wahoinula vyanwa vyawe angwe: Mwushei uyu kunu shi! Hambu nkavimwagiza kuikala vivyoho.

²³ Wakitula vuzo kulu na kutatula shuke zawe na kutambika vumbi na ulanga,

²⁴ yuja mfuṅwa mkulu ywa washilikah azalaγiliza, Paulo aingiziγwe bomani, auziγwe na kutowiγwa, kangwe ataile, ati ni kwa mbuli ani, wajawakiisa kukema ivyoho.

²⁵ Wakimkanta, atowiγwe, Paulo azamwuza mkulu ywa washilikali mweγoloka haja: Mwishungulwe kumtowa muntu ywa Kiloma, masa yakwe yaishilahiγwe?

²⁶ Yuja mkulu ywa washilikali akiviiva azahita kwa mfuṅwa mkulu azavimwukwila na kumwuza: Lushe inga utende zeze? Hambu yuja muntu ni ywa Kiloma.

²⁷ Yuja mfuṅwa mkulu ywa washilikali azaiza, azamuti: Niγambila, ati u Muloma! Angwe: Ehe.

²⁸ Angwe ni mfuṅwa mkulu ywa washilikali: Unu Uloma imi nizauγula na mali nyingi. Angwe ni Paulo: Imi nivyelwe nawo.

²⁹ Ne waja waungilewo kumwuza wahomshungula kinyanyi; miya yuja mfuṅwa mkulu ywa washilikali azaingilwa ni woγa, akitaila, kuti ni Muloma, kwa kuti azamshunga.

³⁰ Keloi jakwe azakunda kubunkula vyedi viya, avyoshingwa ni Wayuda; azamlavya mwe chumba, azalaγiliza, wavikizi wakulu na wafuṅwa wawe woshe waunganane, azamwiγala Paulo na kuja, azamγolosha gati kwawe.