Ntuṅwa 19 - Kishambala New Testament 2005

Paulo abuliza Efeso webatizwa ubatizi wa Yohana du.

¹ Apolo akiikala Kolinto, Paulo azaangila shi ze kwe milima, akibinda azabula Efeso; kuja azaona wahina kuṅwe,

² azawauza, ati wazainkwa mpeho ṅazi aho wakiandiila kutozesha. Wazamlandula kuγamba: Nkataivile, kuti kuna mpeho ṅazi.

³ Azawati: Mubatizwe zeze? Angwe: Tibatizwe na ubatizi wa Yohana.

⁴ Angwe ni Paulo: Yohana abatize ubatizi wa kuhitula ntongonyezi, kangi azaγambila wantu, wamtozeshe yuja, ndiye nezeamtongele, ni uyu Yesu.

⁵ Wakiviiva wazabatizwa mwe zina ja Zumbe Yesu.

⁶ Paulo akiwabadikila mikono, Mpeho mṅazi azawaizila, wazalonga na vilosi haṅwe na kuteγanya.

⁷ Woshe waho waγoshi kumi na waili.

Paulo abilikila, ahonya Efeso watamu.

⁸ Vikibinda aakaingila vikiloi, akibilikila muja myezi mitatu, akitamwilana na wantu na kuwashunda na mbuli ya uzumbe wa Mulungu.

⁹ Miya haja kuṅwe wakitoγesha myoyo haṅwe na kulemela kuitika, kangi wakifyulila silangwa kwa wantu weunganana haja, azauka kuja kwawe, hata wahina azawausha, lushe kila mushi azashimwela mwe fyomelo ja Tilano.

¹⁰ Vizaγenda ivyoho mavuli maili, mpaka woshe weikala mwe ziya shi za Asiya wakiiva mbuli ya Zumbe, ati ni Wayuda, ati ni Wagiliki.

¹¹ Vimaka vikulu Mulungu azaviγoshola kuja na mikono ya Paulo, ne vilekilevyo,

¹² wantu wakiγuwa mihaluma na mademu azwikileyo, wakiyaiγala kwa watamu, ne waja waholekwa ni mahisho yawe, hata mpepo mbada zizalawa.

Wahunga mpepo.

¹³ Hana wahunga mpepo wa Kiyuda, wazaanga kuja, wohe wazaγeza kuwalangila zina ja Zumbe Yesu waja wehuma mpepo mbada wakiγamba: Namilaγiliza kwa nguvu ya Yesu, Paulo ayemubilikila.

¹⁴ Waja waγosholewo ivyoho ni wana mfungate wa mvikizi mkulu ywa Kiyuda mweitangwa Sikewa.

¹⁵ Miya ija mpepo mbada izawalanduia: Yesu namtaila, hata Paulo namtaila, miya inywi mu wa ndai?

¹⁶ Vikibinda yuja muntu mwena ija mpepo mbada azawalumbiila, azawavota, azawaγoshwela vibada kwa nguvu yakwe, mpaka wakinyilika mwe ija nyumba, waihokiγwe shuke zoshe, kangi waigisize vilonda.

¹⁷ Inu mbuli izatailikana kwa Wayuda na kwa Wagiliki woshe weikala Efeso, izawagwiza waja woshe woγa, izaleka, zina ja Zumbe Yesu jikiγaluka kulu.

¹⁸ Waja wahitukewo watakutozesha wangi wazaiza wakivoteka miγoshwele yawe na kuilaviliza.

¹⁹ Bumba gima ja waja, ndiwo wakiγoshola vye uhambanyi, wazaleta vitabu vyawe, wazavioka he wantu wangi. Wakitala kuwo jawe wazaona kuti jizaγelemuka feza makulija milongo mishano.

²⁰ Ivyoho mbulingwa izaγenda, izatenda nguvu kwa nguvu ya Zumbe.

Nkondo ya Demetiliyo.

²¹ Izi mbuli zikibontoka, Paulo azafanyanya mwe moyo wakwe, kuangaanga kuja Makedoniya na Akeya, na kuhita Yelusalemu, akiγamba: Nikibontola inu ntambo, shuti hata kuja Loma nikuone!

²² Waili wemtumikila, Timoteyo na Elasito, azawatuma Makedoniya, ṅwenye azanaikala badodo kuja Asiya.

²³ Mishi ija kuzagwa nkondo nkulu kwa mbuli ya silangwa.

²⁴ Hambu kuna muntu mweitangwa Demetiliyo, ni mshilaγi ywa feza, ne akiγoshola fanyanyi za feza za vikilo ja Alitemi, na inu ndima azaonela mafundi weyae kuwo kulu.

²⁵ Awa azawaunganyanya haṅwe na wandima woshe, ndiwo wakiambizanya nawo, azawati: Waγoshi, mwataila kuti: Kuwo jenyu jiandukamwe inu ndima.

²⁶ Lushe mwaona, kangi mwaiva, kuti so kunu kwetu Efeso du, miya mwe shi zoshe za Asiya yuja Paulo azavota wantu wangi na kuhitula myoyo yawe akiwati: Milungu iγosholweyo ni mikono ya wantu siyo.

²⁷ Lushe nkondo so ija du, kuti ndima yetu nezeibanike, miya hata vikilo ja Alitemi, mulungu wetu mkulu wa kivyele, nezejibelwe, hata uzumbe wakwe ukulu waunga kubanika, kangi shi zoshe za Asiya na za ngulu ngima ne zikiuogoha.

²⁸ Wakiiva izi mbuli woshe wazagisa kukwelwa ni maya, wazakema angwe: Alitemi ywa Efeso ni mkulu!

²⁹ Muzi woshe uzagisa jiya vuzo, woshe wazaγuluka haṅwe na lwazoi, wazamgwila Gayo na Alisitaliko weanduka Makedoniya, kwa kuti ne wakianga haṅwe na Paulo.

³⁰ Paulo akikunda kuingila mwe jiya bumba, wahina nkawamkundize.

³¹ Hata wafuṅwa wa Asiya kuṅwe, kwa kuti ni weyae watana, wazatuma na kwakwe, wazamhembeleza, ashezahita na kuja lwazoi.

³² Kuja wazahakikemela, kila muntu mbuli ntuhu, hambu jiya bumba joshe jizaisiiza kuchakuka, wangi nkawataile, ati ni mbuli ani ilekileyo, wakiunganana.

³³ Miya wantu kuṅwe wazamlavya Alekisando, azawakonyeza na mkono, azakunda kukikanila kwa wantu.

³⁴ Miya wakimtaila, kuti ni Muyuda, woshe wazakema na kanwa kiṅwe saa mbili zoshe angwe: Alitemi ywa Efeso ni mkulu!

³⁵ Kalani azatongomaza jiya bumba, azawati: Inywi waγoshi wa Efeso, kuna muntuashiyetaila kuti: Muzi wa Efeso ne weγolokela vikilo ja Alitemi mkulu na chiya kinyuwa chakwe chilawilecho mwe lwingu?

³⁶ Kwa kuti ivi vyoshe nkavikeleziγwa nkani, vyamiagiza kutongomala du, msheγoshole mbuli ya ntutuntutu.

³⁷ Hambu mzaleta awa wantu, kangi nkawabaile vikiloi, nkawakankile mulungu wetu.

³⁸ Ati Demetiliyo na wafundi weyae wana mbuli na muntu, mishi ya kulonga masa i haho, hata wafuṅwa wa haho, newafyalimane!

³⁹ Miya ati muna mbuli ntuhimtuhu, itadaha kubontoka, waja wena ufuṅwa wa kulonga wakizaunganana.

⁴⁰ Hambu tikikunda kuifiγwa titagelwa masa kwa mbuli ya ichi kiva cha lelo, kangi nkahana mbuli ye mkombaγano, ndiyo tikikanile nayo kwa mbuli ya inu nkondo.

⁴¹ Akibinda kulonga ivyoho azashungula jiya bumba.