Ntuṅwa 15 - Kishambala New Testament 2005

Mwunganano uko Yelusalemu.

¹ Kuṅwe wazalawa Yudeya, wazasheela na uko, wazafuza waja wanduγu kuγamba: Mkisheshengwa kwa msimo wa Mose nkemdshe kuvunilwa.

² Kuzaoneka nkumbizi na nkanani nyingi kwa waja na Paulo na Balinaba, ne wahomlaγiliza Paulo na Balinaba na weyae wawe watuhu kuṅwe, wakwele Yelusalemu kwa ntuṅwa na kwa watawa kwa mbuli ya unu mkanano.

³ Waja watumiγwewo ni jiya bumbangwa wazadwisha Fonike na Samaliya, wazagwishiliza wanduγu woshe nyemi wakiwashimwela, wamzimu wavyohituka.

⁴ Wakibula Yelusalemu wazahokelwa ni bumbangwa na ntuṅwa na waγolokezi, wazawashimwela vyoshe, Mulungu aγosholevyo nawo.

⁵ Miya kuṅwe wa bumba ja Mafaliseyo wahitukewo watakutozesha wazainuka angwe: Shuti washengwe! Shuti walaγiliziγwe kutoza mulomongwa wa Mose!

⁶ Ntuṅwa na waγolokezi wazaunganana, wafanyanye inu mbuli.

⁷ Wakiisiiza kukanana, Petelo azainuka azawati: Waγoshi, wanduγu, mwataila, kuti mishi ya kale kunu kwenyu Mulungu azashaγula kanwa changu, wamzimuwaive nacho mbuli ya ulaungwa wedi, waitozeshe.

⁸ Kangi Mulungu mwetaila myoyoyawantu azawalongela uwona na kuwainka Mpeho mṅazi, sa amtinkilevyo ishwi,

⁹ kangi nkakundile, tikizinkana nawo kwa viya, aṅazizevyo myoyo yawe kwa mbuliya kutozesha kwawe.

¹⁰ Lushe nini mkikunda kumγeza Mulungu na kuwainuza waja wahina mziγo, watate zeshu, hata ishwi tishidahilewo kuinula?

¹¹ Miya tatozesha, kuti tihonyiγwa ni mbazi ya Yesu vivyoho, sa waja wohena.

¹² Ne bumba gima jiholeka lwashu, wazamteγeleza Balinaba na Paulo, wakishimwela ntangilo zoshe na vimaka vyoshe, Mulungu aγosholevyo nawo kwa wamzimu.

¹³ Wakileka lwashu, Yakobo azaγuwa mbuli angwe:

¹⁴ Waγoshi wanduγu, niteγelezai! Simoni azashimwela, Mulungu aandiilevyo kuolela wamzimu, aonele zina jakwe mbali yakwe mumo.

¹⁵ Hata mbuli za wateγanyi zaivana na aho, hakigondwa kuγainba:

¹⁶ Vikibinda nezeniuye, nizenge nyumba ya Dawidi ichakukeyo, kuja kubanikeko nezenikuzenge vituhu,

¹⁷ nikuuze uhya, kangwe wantu washiγalewo wamlonde Zumbe haṅwe na wamzimu woshe weitangilwa zina jangu.

¹⁸ Ne avyolonga Zumbe alekileye, ivi vikitailikana aho kale hoshe.

¹⁹ Kwa ivyoho naγamba: Waja welawa kwa wamzimu, wakihituka na kwa Mulungu, tishewainuze miziγo,

²⁰ miya tiwalaγilize du, kuti wazile fika, kwa kuti zagela muntu kisitama, na kilanga na kibudu na mpome.

²¹ Hambu aho kale mpaka ivi lushe mwe mizi yoshe Mose ana webilikila mbuli yakwe, kangi kila sikunkulu yafyomiγwa mwe mavikilo.

²² Ne ntuṅwa na waγolokezi wahoivana na bumba joshe kushaγula weyae wawe kuṅwe na kuwatuma Antiyokiya haṅwe na Paulo na Balinaba, ni Yuda mweitangwa Balisaba na Sila, ni waγoshi wena kilango kitana kwa wanduγu. Wazagonda baluwa,

²³ waiiγale; shinu: Ishwi ntuṅwa na waγolokezi tamiluγusha inywi wanduγu mulawilewo kwa wamzimu uko Antiyokiya na Siliya na Kilikiya.

²⁴ Tizaiva, kuti weshu kuṅwe wazamiazaγanya na kugela myoyo yenyu futofuto, miya nkatiwalaγilize ivyoho.

²⁵ Ne vilekilevyo, toshe tikiivana kushaγula waγoshi na kuwatuma na kwenyu haṅwe na weshu wa Balinaba na Paulo, tiwokundisha;

²⁶ hambu awa ni wantu wakiinkilewo wenye kwa mbuli ya zina ja Zumbe ywetu Yesu Kilisito.

²⁷ Tizamtuma Yuda na Sila; awa newamiγambile viya, tivyogonda.

²⁸ Hambu Mpeho mṅazi na ishwi tizaivana, tishemiinuze mziγo mtuhu kushima izi mbuli zeagiza,

²⁹ mzile nyama za fika na mpome na kibudu na kilanga. Wenye mkikilemeza izi mbuli mtazifyal.

³⁰ Awa wakibinda kushungulwa wazasheela Antiyokiya; wantu woshe wakiunganana, wazainkila ija baluwa.

³¹ Wakiifyoma, wazatamilwa wakishangalaziγwa ivyoho.

³² Yuda na Sila wenye ni wahilikizi, wazawashangalaza waja wanduγu na mbuli nyingi, wazawagela nguvu.

³³ Wakiikalaikala wazashungulwa na waja wanduγu, wahite mpeho kwa waja wawatumilewo.

³⁴ Miya Sila azatamilwa ni kuhumula γuko.

³⁵ Paulo na Balinaba wazaikala Antiyokiya wakifuza, kangi wakihilikila haṅwe na weyae wawe wangi mbuli ya Zumbe.

Paulo ahita ntambo yakwe ya 2.

³⁶ Mishi ikizinka, Paulo azamuti Balinaba: Netihite vituhu, tikaule wanduγu mwe mizi yoshe, tibilikilemo mbuli ya Zumbe, ati wa zeze!

³⁷ Balinaba azakunda kumγuwa Yohana mweitangwa Maliko, wahite naye.

³⁸ Miya Paulo azalemela kuhita naye vituhu, kwa kuti azawaasha kuja Pamufiliya, nkahitile nawo kwe ija ndimangwa.

³⁹ Ivyoho kuzaoneka mkanano, mpaka wakipangana; Balinaba azamγuwa Maliko, azaingila naye mwe chombo, wahite Kipulo.

⁴⁰ Paulo azamγuwa Sila; azahita naye, akihembelezeziγwa ni wanduγu, Zumbe awafe mbazi.

⁴¹ Azadwisha Siliya na Kilikiya akigela mabumbangwa nguvu.