Ntuṅwa 14 - Kishambala New Testament 2005

Nkondo Paulo aenezo Ikoniyo.

¹ Kuja Ikoniyo wantu wakiunganana mwe vikilo ja Wayuda, wazawahilikila sa viyaho, humba kulu ja Wayuda na ja Wagiliki jizatozesha.

² Miya Wayuda waja walemelewo kutozesha wazatunya na kushongeleza myoyo ya wamzimu, waomane na wanduγu wawe.

³ Wazahumula γuko mishi mingi na kuhilikila mbuli ya Zumbe, kangi Zumbe azalongela mbuli ya mbazi yakwe uwona akileka, ntangilo na vimaka viγosholwe ni mikono yawe.

⁴ Wantu wa uja muzi wazapangana, kuṅwe wazauya na kwa Wayuda, kuṅwe wazauya na kwa ntuṅwa.

⁵ Kuzainuka nkondo nkulu ya wamzimu na ya Wayuda haṅwe na wazumbe wawe, wawasilimize na kuwahomela mawe.

⁶ Wakivitaila wazanyilika na mwe mizi ya Likaoniya, Lisitila na Delibe na mizi yawe ye tanga.

⁷ Kuja wazaikala na kubilikila mbulingwa.

Paulo aunga kubindiγwa fika Lisitila.

⁸ Kuja Lisitila kuna mγoshi, ni mnyonge ywa milundi, vivyo avyelwevyo nkadahile kuγenda hata.

⁹ Uyu azamteγeleza Paulo, akibilikila; uyu akimwolela azamwona, kuti atozesha, kangwe ahonyiγwe.

¹⁰ Ne aholonga na kanwa kikulu angwe: Inuka, uγoloke na milundi yako! Ne ahoinuka akilumbila na kujatajata.

¹¹ Wantu wakiona, Paulo aγosholevyo, wazainula vyanwa vyawe, wazalonga Kilikaoniya angwe: Milungu izaγaluka sa ishwi wantu, izasheela kwetu!

¹² Balinaba wazamwitanga Zeu, Paulo wazamwitanga Helime, kwa kuti ne mwelonga mbuli.

¹³ Mvikizi ywa vikilo ja Zeu je he nkili ya muzi azaiγala mpalala na malinga na kwe nkili, azakunda kubinda fika haṅwe na wantu.

¹⁴ Ntuṅwa Balinaba na Paulo wakiviiva wazatatula shuke zawe, wazafikaγulukila waja wantu, wazalonga na vyanwa vikulu angwe: Waγoshi! Muγosholai aha?

¹⁵ Hata ishwi ti wantu wanyonge sa inywi, kangi tamibilikila, lekai izi mbuli za bule, mhituke na kwa Mulungu mwe moyo aγosholaye lwingu na shi na bahali na vyoshe vye mumo!

¹⁶ Mishi izinkileyo azaleka, wamzimu woshe watongele sila zawe.

¹⁷ Kangi nkalekile ashetailikike kwenyu, hambu azamifila mbazi, aakaminka fula yeanduka mwe lwingu na mishi ya ulozo, myoyo yenyu azaiiγusha nkande na nyemi.

¹⁸ Wakilonga ivyoho wazaona ntoγo nyingi kabisa kufingiza wantu, washewakomele ṅombe za mviko.

Paulo ahomelwa mawe.

¹⁹ Miya kuzaiza Wayuda walawilewo Antiyokiya na Ikoniyo, wazatunya waja wantu, vikibinda wazamhomela Paulo mawe, wazamlavya mwe muzi na kumhuna, wazafanyanya kuti: Azafa.

²⁰ Miya wahina wakimdenganila, azainuka, azaingila na muja kaya; keloi jakwe azamlawa haṅwe na Balinaba, wazahita Delibe.

²¹ Wakibilikila uja ulau wedi, wazaγalusha wangi wahina, wakibinda wazauya Lisitila na ikoniyo na Antiyokiya

²² wakigela myoyo ya wahina nguvu na kuwahimila, waikale na kutozesha vivyoho, kangi wazawaonyesha kuti: Vyatitala kuona ukiwa ungi, tikiingila mwe uzumbe wa Mulungu.

²³ Miya mwe mabumba yoshe wazawagimbikila waγolokezi, wazawamwiγaila Zumbe, wamtozesheye, wazawahembelezeza na kufunga.

²⁴ Wakidwisha Pisidiya wazabula Pamufiliya.

²⁵ Wakibinda kubilikila mbulingwa kuja Pelige, wazasheela na Ataliya;

²⁶ uko wazaingila mwe chombo, wazahita Antiyokiya, washungwilweko kwa mbazi ya Mulungu, watimile iyo ndima, wabontoleyo.

²⁷ Wakibula kuja wazaunganyanya bumbangwa, wazawaukwila vyoshe, Mulungu aγosholevyo nawo, avyozuγwila wamzimu luvi, wohe wadahetozesha.

²⁸ Mishi wahumuleyo γuko haṅwe na wahina, so miγeke.