Ntuṅwa 12 - Kishambala New Testament 2005

Yakobo akoṅwa, Petelo ashungwa.

¹ Mishi ija zumbe Helode azagwila wantu kuṅwe wa bumbangwa, kangwe awaγoshwele vibada.

² Yakobo, mkuluwe ja Yohana, azamkoma na shime.

³ Akiona, kuti vizatamila Wayuda, azatongela iyo mbuli vivyoho, azamgwila Petelo yohena, ni mishi ya migate ishigelwayo shimbi.

⁴ Akimgwila azamgela mwe chumba, azamwinkila kwe mabumba mane, kila bumba jina washilikali wane wemγoja; hambu mishi ya Pasa ikizinka, azakunda kumlaviliza kwa wantu.

⁵ Petelo azaγojiγwa muja mwe chumba; miya Mulungu azahembeleziγwa ni bumbangwa na kushedila kwa mbuli yakwe.

Petelo alaviγwa mwe chumba.

⁶ Helode akiunga kumlavya, kilo chiya Petelo azasisila ailele gatigati kwa washilikali waili, aishungiγwe na mazolo maili, kangi kuja kwe nyuvi waluγojo waiγojize.

⁷ Ne kuholawila mlau ywa Zumbe, muja nyumbai mzagwa langaila kulu, azamtowa Petelo he lubazu, azamwinula angwe: Inuka nguzu! Mazolo ya mikono yazagwa.

⁸ Yuja mlau azamuti: Kanta shuke na vilatu vyako! Azaγoshola ivyoho. Azamγamba vituhu: Kiγubike na guni jako, unitongele!

⁹ Azamlawa, azamtongela, miya nkataile, kuti viya vyeγosholwa ni yuja mlau ni vya kweli, azaγamba, ateona sozi.

¹⁰ Wazaomboka he luγojo lwa bosi na lwa mbili, wazabula he nkili ya kilama, ni ya kulawila na kaya; inu izawazuγukila ṅwenye, wazalawa, wazahita sila du, ne yuja mlau ahomwasha.

¹¹ Petelo akiviluka vyedi azaγamba: Lushe nataila kweli, kuti Zumbe azamtuma mlau ywakwe, azanivunila mwe mikono ya Helode na kwe ziya ngojo zoshe za Wayuda.

¹² Akitongonyeza ivyoho azahita kwe nyumba ya Maliya, nine ja Yohana mweitangwa Maliko, ne mwungananemo kabumba kedi kwa vika.

¹³ Akigoṅonda luvi lwa nkili, kuzaiza mndele kwa teγeleza, aitangwa Lode.

¹⁴ Akitaila, kuti ni kanwa cha Petelo, nkazuγule nkili kwa nyemi, azaγuluka na nyumbai, azawaukwila kuti: Petelo aiγoloke he nkili.

¹⁵ Waja wazamuti: Walaluka! Miya yuja azalongesha kuti: Ni vivyo. Waja wazaγamba: Ni mlau ywakwe.

¹⁶ Petelo azagoṅonda vivyoho; wakizuγula, wazamwona, wazashentuka,

¹⁷ azawakonyeza na mkono, waleke lwashu; azawatamwila, Zumbe amlavizevyo mwe chumba, azawati: Vimwukwilei Yakobo na wanduγu woshe! Vikibinda azalawa, azahita na hatuhu.

Helode abanika.

¹⁸ Kukicha washilikali wazaingilwa ni woγa ukulu wa kuγamba: Mbuli ya Petelo iγendile vivihi?

¹⁹ Helode akimlonda, akishemwona, waja waluγojo azawauza, azalaγiliza, washungwe; ṅwenye azalawa Yudeya, azahita Kesaliya, azanaikala γuko.

²⁰ Azagomba kuomanya Watilo na Wasidoni; miya woshe haṅwe wazamwizila, wazamsibila Bulasito, ni mγolokezi ywa kitala cha zumbe, wazasemba, kwa kuti nkande za shi yawe zianduka mwe shi ya zumbe.

²¹ Mushi waivanilanewo nawo, Helode azazwika shuke za kizumbe, azaikala mwe kiti cha lahila masa, azawaγambila mbuli.

²² Wantu wazaitikila angwe: Kanwa ichi ni cha Mulungu, so cha muntu.

²³ Viya du lushe mlau ywa Zumbe azamtowa, kwa kuti nkamgimbike Mulungu, azajiγwa ni funyo, azafa.

²⁴ Miya mbuli ya Zumbe izaγenda, izagisa kosheni.

²⁵ Balinaba na Sauli wazalawa Yelusalemu, wazaγotoka, hambu wazabinda ija ndimangwa ya mbazi, wazamγuwa Yohana mweitangwa Maliko, wazahita naye.