Ntuṅwa 10 - Kishambala New Testament 2005

Kolineliyo, mγoshingwa ywa kimzimu, amtumiza Petelo.

¹ Kesaliya kuna mγoshi, zina jakwe ndiye Kolineliyo, ni mkulu ywa ntimizi yeitangwa ya Italiya,

² ni muntu mwetozesha na kumwogoha Mulungu haṅwe na chengo chakwe kigima; wakiwa azawafila mbazi nyingi, nkadizile kumvika Mulungu.

³ Uyu azaona ai mesho, mlau ywa Mulungu akimlawila, ni saa kenda za mushi, akiingila na mwakwe, akimγamba: Kolineliyo!

⁴ Yuja azamdulila, azaingilwa ni woγa, azaγamba: Zumbe, ni mbuli ani? Azamuti: Mihembelezeze yako na mbazi zako zizabula kwa Mulungu, azifukila.

⁵ Ivi lushe aha tuma wantu Yope, wamlete Simoni mweitangwa Petelo!

⁶ Uyu afikile kwa mnyukula mababu mweitangwa Simoni, nyumba yakwe i he bahali.

⁷ Mlau alongileye naye akibinda kuhita, azaitanga wantu waili, awoshuγa, na mshilikali muṅwe mwetozesha, ni ywa waja awoanga nawo,

⁸ azawashimwela mbuli zoshe, azawatuma na uko Yope.

Petelo avyoona.

⁹ Mhitu wakwe wakiγenda silai, wakibula hehi na kaya, Petelo azakwela talai kwa vika, ni saa mtandatu.

¹⁰ Akibulwa ni sala azakunda kuja.

¹¹ Wakemuliγanyiza nkande, azashentukisha, hambu azaona, lwingu lwizuγuke, kuzasheela bwesuna jefanana, viya ni shuke nkulu muno ikantiγweyo miswa mine, ikisheleziγwa na shi.

¹² Umo ndai muna nyama nyingi za kunu shi zena milundi na mikono na zetambala na madeγe yeanga ulanga.

¹³ Kanwa chizamwizila angwe: Petelo, inuka, ukome, uje!

¹⁴ Petelo azalandula: Zumbe, kale hoshe sajile chena kisitama ao chena ṅwiko.

¹⁵ Vituhu kanwa chizamwizila ka mbili angwe: Viya, Mulungu aushizevyo ṅwiko, iwe ushevizile!

¹⁶ Ivi vizaγosholwa katatu; vikibontoka, viya du lushe jiya bwesuna jizainulwa na mwe lwingu.

¹⁷ Petelo akeganyaganya, ati ijambuli, aeneyo, ina bontokelo ani, ne waja waγoshi watumiγwewo ni Kolineliyo wahouza nyumba ya Simoni, wazaγoloka he kifiγwe,

¹⁸ wazaitanga, wazauza, ati Simoni mweitangwa Petelo afikile mumo.

¹⁹ Petelo akelongonyeza ija mbuli, aeneyo, mpehongwa izamγamba: Shawa waγoshi watatu wekulonda!

²⁰ Miya inuka, usheele, uhite nawo, ushezakalakasha! Hambu imi nizawatuma.

²¹ Petelo azasheela, azawati waja waγoshi: Shimi, muyelonda! Ni mbuli ani yeleka, mkiiza?

²² Wazamγamba: Kolineliyo, mkulu ywa ntimizi, muntu mtanda mwemwogoha Mulungu, mwena kilango kitana kwe mbali ngima ya Wayuda, azalaγiliziγwa ni mlau mṅazi, akutumize, uhite mwe nyumba yakwe, akuteγeleze mbuli, ndizo ulonge.

²³ Azawaitanga na nyumbai, azawafikiza. Mhitu wakwe azainuka, azalawa haṅwe nawo, hata wanduγu kuṅwe we uko Yope wazahita naye.

Petelo mwa Kolineliyo.

²⁴ Keloi jakwe azaingila Kesaliya; Kolineliyo ne akiwaafiza, aiunganyanye wanduγu wakwe na wambuyae watana.

²⁵ Petelo akiingila, Kolineliyo azamsingila, azamkinila he milundi, azamluγusha.

²⁶ Miya Petelo azamwinula, azamuti: Inuka! Hambu imi nami ni muntu.

²⁷ Azaingila na nyumbai akitamwilana naye, azaona wangi waungananewo mumo,

²⁸ azawati: Inywi mwataila kuti: Muntu ywa Kiyuda ana ṅwiko wa kuangilana na kuingila mwa muntu ywa mbali ntuhu, miya imi Mulungu azanionyesha, nishezaγamba: Muntu ana kisitama ao ṅwiko!

²⁹ Ne vilekilevyo, nikiiza kishi nkani aho nikitumiziγwa. Lushe namiuza: Munitumizize mbuli ani?

³⁰ Kolineliyo azaitikila angwe: Nizaikala mishi mine, niifungile mpaka ivi lushe aha, saa kenda nizavika mwe nyumba yangu, nizaona mγoshi, aiγoloke he mesho yangu, aizwikile shuke yenamanika,

³¹ anili: Kolineliyo, mihembelezeze yako na mbazi zako zizaiviγwa, zizafukilwa ni Mulungu.

³² Tuma na Yope, umwitange Simoni mweitangwa Petelo! Uyu afikile mwe nyumba ya mnyukula mababu mweitangwa Simoni, he bahali. Ne nihokutumiza viya du lushe, miya iwe uzazifya ukifikaiza.

³³ Lushe ishwi toshe tiiunganane he mesho ya Mulungu, tileγeleze vyoshe, ulaγiliziγwevyo ni Zumbe.

³⁴ Petelo azazuγula kanwa chakwe, azaγamba: Natailisha lushe kuti: Mulungu nkaolela cheni cha muntu;

³⁵ miya mwe mbali zoshe mwemwogoha na mweγoshola utanda amtamila.

³⁶ Mbuli yakwe azaituma kwa wana Isilayeli, akiwabilikila mpolele ionekeyo mwe Yesu Kilisito, uyu ni Zumbe ywa vyoshe.

³⁷ Inywi mwataila, iyo mbuli igisizeyo shi ngima ya Yudeya izaandiila Galileya, izatongela uja ubatizi, Yohana abilikilewo,

³⁸ ni ija ya Yesu ywa Nazaleti; uyu Mulungu azamwambwila mpeho ṅazi na nguvu, azaanga na kufila wantu mbazi, azahonya woshe wavotiγwewo ni yuja ṅwenye leba, hambu Mulungu azaanga naye.

³⁹ Kangi ishwi ti waona wa viya vyoshe, aγosholevyo mwe shi ya Yudeya na Yelusalemu. Uyu wazamkoma wakimholeza mwe muti,

⁴⁰ miya Mulungu azamfufula mushi wa ntatu, azaleka, alawile,

⁴¹ miya so wantu woshe, ni waja waona du washaγulwewo aho kale ni Mulungu, ni shwiyo tijilewo naye, kangi tinywelewo naye, akibinda kufufuka kwa wafilewo.

⁴² Azatilaγiliza ishwi, tibilikile wantu na kuwalongela uwona, kuti uyu ne aikiγweye ni Mulungu, kangwe nezealahe we moyo na wafilewo.

⁴³ Uyu wateγanyi woshe wamlongela uwona kuti: Kila ndiye nezeamtozeshe, ataushiliziγwa uhuza kwa mbuli ya zina jakwe.

⁴⁴ Petelo akelonga izi mbuli, Mpeho mṅazi azagwa mwe waja woshe waivilewo mbulingwa.

⁴⁵ Washengiγwewo wetozesha, waizilewo haṅwe na. Petelo, wazamakisha, kuti wamzimu wohena wafilwa mbazi na kuinkwa mpeho mṅazi.

⁴⁶ Hambu wazawaiva, wakilonga na milongele miγeni na kunitogola Mulungu. Ne Petelo aholonga:

⁴⁷ Kuna mwedaha kulemela na mazi, awa washebatizwe? Kangi wazainkwa mpeho mṅazi sa ishwi!

⁴⁸ Azalaγiliza, wabatizwe mwe zina ja Yesu Kilisito; wazamhembeleza, aikale kwawe mishi kuṅwe.