Mfumbulo 5 - Kishambala New Testament 2005

Kilabu chena magongezo 7 ya wafu.

¹ Mwe mkono wa kulume wa yuja aikaileye kitingwa nizaona kitabu chigondiγwecho uko ndai na kwe mγongo, chiigezilwe magongezo mfungate ya wafu.

² Nizaona, mlau mwe nguvu akibilikila na kanwa kikulu angwe: Ni ndai mweagiziγwa ni kuγubula ichi kitabu na kushungula magongezo yakwe?

³ Miya uko kwe lwingu, hata kunu shi, hata uko kuzimu nkakuna adahileye kuγubula icho kitabu ao du kuchiolela.

⁴ Nizalilisha, kuti nkakuoneke mweagiziγwa ni kuγubula icho kitabu ao du kuchiolela.

⁵ Miya waja waγolokezi ṅwiyae ywawe muṅwe azaniti: Ushelile! Kaula, kuzavota shimba yeanduka mwe kolwa ja Yuda, ni nkolo ya Dawidi, aγubule ichi kitabu na kushungula magongezo yakwe.

⁶ Ne nihoona: Gatigati he chiya kitingwa na he ziya nyama ne na he waja waγolokezi hazaγoloka ṅwangoto sa vivyoho, akomiγwevyo, ana feya mfungate na mesho mfungate, ne ziya mpeho mfungate za Mulungu, zitumiγwezo na mwe shi zoshe.

⁷ Azaiza, azahokela icho kitabu mwe mkono wa kulume wa yuja aikaileye kitingwa.

Ngotongwa aγuwa kitabungwa.

⁸ Aho akichiγuwa icho kitabungwa, ne ziya nyama ne na waja waγolokezi milongo mili na wane wahokinila yuja ṅwangoto, waitozize kila muntu pango na ntungo ya zahabu, ziimemile uvumba, ni miviko ya waṅazi.

⁹ Wazaimba imbo hya angwe: Iwe waagiziγwa ni kuγuwa kitabungwa na kushungula magongezo yakwe! Hambu waakoṅwa, waamkombwela Mulungu na mpome yako wantu wa makolwa yoshe na wa vilosi vyoshe na wa mbali zoshe na wa wamzimu woshe, uzaleka,

¹⁰ waγaluke wazumbe na wavikizi wa Mulungu, watoze uzumbe mwe shi.

¹¹ Nikiolela vituhu nizaiva vyanwa vya walau wangi wadenganilewo icho kitingwa na ziya nyama ne na waja waγolokezi; nikiwatala, wazaγelemuka makulija na makulija na makulija.

¹² Wazalonga navyanwavikuluangwe: Ṅwangoto akomiγweye vyamwagiza kuγuwa ufuṅwa na uzuli na viyuγo na nguvu na tae na utana na ntogolo!

¹³ Hata vyumbo vyoshe vye uko kwe lwingu na kunu shi na uko kuzimu na uko kwe bahali haṅwe na vyoshe vye mumo nizaiva vikilonga: Yuja mweikaila kitingwa haṅwe na yuja ṅwangoto watogolwe, wagimbikwe, wainkwe utana na nguvu kale na kale!

¹⁴ Ziya nyama ne zizaitikila: Amini, ne waja waγolokezi wahogwa na kumvika yuja mwekalama kale na kale.