Mfumbulo 3 - Kishambala New Testament 2005

Salide.

¹ Mlau ywa bumbangwa ja Salide umgondele kuγamba: Ne avyolonga yuja mwetoza ziya mpeho mfungate za Mulungu haṅwe na ziya ntondwe mfungate: Nataila miγoshwele yako, kuti una ijo zina kuti: U moyo, kangi u kimba. Viluka, ugele viya vyekunda kufa nguvu!

² Hambu siene, kuti ndima zako zizabontoka he mesho ya Mulungu.

³ Kumbuka viya uhokelevyo, uivilevyo, uvitozeshe ukihitula ntongonyezi zako! Ati washekiγoja, nezeniize sa mubavi, nkoutaile aho, ndiho nezenikuizile.

⁴ Miya kwako Salide una mazina ya kuṅwe washikandanyewo shuke zawe, nezewaange na imi waizwikile shuke zeṅala, hambu viyawaagiza.

⁵ Ndiye avote, nezeazwikwe ivyoho shuke zeṅala, sezenifute zina jakwe mwe kitabu cha nkalamo, nezenilonge zina jakwe na kulaviliza ha Tate na ha walau wakwe.

⁶ Mwena mashikilo aive, mpehongwa avyolonga mabumbangwa!

Filadelifiya.

⁷ Mlau ywa bumbangwa ja Filadelifiya umgondele kuγamba: Ne avyolonga yuja mṅazi, yuja mkweli mweloza funguwo ya Dawidi, mwezuγula, kangi nkakuna ndiye azuγale, mwezuγala, kangi nkakuna ndiye azuγule:

⁸ Nataila miγoshwele yako; kaula! Nizakuirka luvi luzuγukelo, muntu ashilodaha kuluzuγala. Kweli una nguvu ngeke, miya uzatozesha mbuli yangu, kangi nkufishize zina jangu.

⁹ Kaula! Nalavya kuṅwe wafuziγwewo ni Satani weγamba, kuti ni Wayuda, kangi siwo, watahenya. Kaula! Imi nezenileke, waiawile, wakukinile he milundi yako, wataile kuti: Nizakukundisha.

¹⁰ Hambu uzatozesha mbuli ya mizizimizize yangu, lushe nami nenikutozeshe, haja ha kuγezwa hakizabula heunga kulawila shi zoshe zeikala wantu, kangwe weikala kunu shi waγezwe.

¹¹ Naiza nguzu tozesha viya, uvyona navyo kangwe muntu ashezakuhoka linga jako!

¹² Ndiye avote, nezenimγalushe mkola mwe vikilo ja Mulungu ywangu, nkezeamlawe vituhu, nezenimgonde zina ja Mulungu ywangu na zina ja muzingwa wa Mulungu ywangu, ja uja muzi muhya wa Yelusalemu, ndiwo usheele ukilawa mwe lwingu kwa Mulungu ywangu, kangi nezenimgonde zina jangu hya.

¹³ Mwena mashikilo aive, mpehongwa avyolonga mabumbangwa!

Lawodikiya.

¹⁴ Mlau ywa bumbangwa ja Lawodikiya umgondele kuγamba: Ne avyolonga mwamizi, yuja mwona mtanda na mkweli, chandilo cha vyoshe viumbiγwevyo ni Mulungu:

¹⁵ Nataila miγoshwele yako, kuti nkulota, kangi nkuhisha. Ukatalota ao ukatahisha!

¹⁶ Miya shivyo: Walenguka, nkuhisha, nkulota, nezenikushwe mwe kanwa changu.

¹⁷ Waγamba: Ni mzuli, niiγenyeze, sina nivyokosa, kangi nkutaila, kuti iwe u mnyonge, kuti wagwiza mbazi, kuti u mkiwa, kuti uzafa mesho, kuti u lushi.

¹⁸ Nakunka viyuγo nikikuti: Γula zahabu kwangu iokiγweyo na moto, uγaluke mzuli, na shuke zeṅala, uzwike, viya vye shoni vya ulushi wako vishemanyike, na mavuta, ushishe mesho yako, kangwe uone.

¹⁹ Woshe, niwokundisha, nawashunda, nawaluta. Kihime lushe kuhilula ntongonyezi zako! Shimi!

²⁰ Niiγoloke he luvi nikigoṅonda. Ati muntu aiva kanwa changu, akizuγula luvi, nitaingila niwakwe, nije nkande zakwe, yohe aje zangu.

²¹ Ndiye avote, nezenimfile mbazi, aikale na imi mwe kiti changu, sa imi ṅwenye nivotilevyo, nikibinda nikiikala na Tate mwe kiti chakwe. Mwena mashikilo aive,

²² mpehongwa avyolonga mabumbangwa!