Mfumbulo 22 - Kishambala New Testament 2005

Muto na miti ya nkalamo.

¹ Azanionyesha muto mkulu wa mazi ya nkalamo yeengemala sa kazanga; ulawa he kitingwa cha Mulungu na yuja ṅwangoto.

² Lwazoi gati masheja yoshe maili ya unu muto kuna miti ya nkalamo yevyala matunda ka kumi na mbili, kila ṅwezi yavyala matunda, kangi mahungo yawe ne yeinka wamzimu ugima.

³ Vye kisitama vyoshe nkezevimwoneke. Kitingwa cha Mulungu na yuja ṅwangoto chitaikala mumo, wapuna wakwe watamtumikila,

⁴ wataona cheni chakwe, kangi zina jakwe jiigondiγwe he vyeni vyawe.

⁵ Kilo nkezemugwe, nkawaagiziγwa ni langaila ja taa ao langaila ja zuwa, hambu Zumbe Mulungu atawapwinkukila, watatoza uzumbe kale na kale.

Mishi i hehi

⁶ Azaniti: Izi mbuli zaagiza kutozeshiγwa; ni za kweli; Zumbe, Mulungu ywa mpeho za wateγanyi, azamtuma mlau ywakwe, aonyeshe wapuna wakwe vyeunga kuγosholeka kinyanyi.

⁷ Shimi! Naiza nguzu! Mwe nyemi ni yuja mwetozesha mbuli za uteγanyi za ichi kitabu!

⁸ Kangi imi Yohana ni miyo niivilewo, ni miyo nienewo. Nikiviiva, nikiviona nizakina funi haja shi he milundi ya yuja mlau avinionyesheye.

⁹ Miya azaniti: Leka ivyoho! Hambu iwe na wanduγu wako, wabilikizi na waja wetozesha mbuli za ichi kitabu, imi ni mupuna ṅwenyu. Mvike Mulungu!

¹⁰ Azaniti: Ushefishe mbuli za uteγanyi za ichi kitabu na kuzigongeza wafu! Hambu mishi i hehi.

¹¹ Mwetunguluka weyae neawatunguluke vivyoho! Mhuza neahimile uhuza wakwe vivyoho! Miya mtanda ahimile utanda wakwe! Mṅazi aisiize kukiṅaza!

¹² Shimi! Naiza nguzu! Vitumulo vyangu nina navyo, ndivyo nimwuzize kila muniu, sa viya miγoshwele yakwe ilivyo.

¹³ Imi ni A na O, ni kuγamba: Ni ywa bosi na ywa shilikiza, ni chandiilo na bindilizo.

¹⁴ We nyemi ni waja wetozesha milomo yakwe, kangwe nezewashungulwe kuja muti wa nkalamo na kuingila mwe nkili za muzingwa.

¹⁵ Uko se kuna makuli na washai na watesi na wampoko na wavika fika na woshe wakundilewo, kangi watendilewo mambeza.

Iza Zumbe Yesu!

¹⁶ Imi Yesu nizamtuma mlau ywangu, avimilongele uwona, muviukwile mabumbangwa. Imi ni nkolo ya mbeleko ya Dawidi, imi ni ntondwe ya mbalakele.

¹⁷ Mpehongwa na yuja bilumbu waγamba: Iza! Kangi ndiye aive, neaγambe: Iza! Mwena nkilu aize, mwekunda aleke mazi ya nkalamo bule du! Woshe, ndiwo waive mbuli za uteγanyi za ichi kitabu,

¹⁸ nawalonga uwona kuγamba: Muntu akibadika mbuli, Mulungu atamubadikiia ija milaho igondiγweyo mwe ichi kitabu.

¹⁹ Muntu akiusha mbuli kuṅwe za ichi kitahu cha uteγanyi, Mulungu atausha fungu jakwe ja muti wa nkalamo, ashezaingila uja muzi mṅazi, sa vigondiγwevyo mwe ichi kitabu.

²⁰ Mwevilongela uwona aγamba: Kweli naiza nguzu. Amini; iza, Zumbe Yesu!

²¹ Mbazi ya Zumbe ywetu Yesu imiikaile nyoshe! Amini.