Mfumbulo 19 - Kishambala New Testament 2005

Zumo ja wantu wa Mulungu.

¹ Vikibinda nizaiva vuzo kulu mwe lwingu ja bumba kulu ja wantu welonga kuγamba: Haleluya! Uvunizi na utana na ufuṅwa ni wa Mulungu ywetu!

² Hambu milahile yakwe ni ya kweli, yaagiza. Hambu azamlaha yuja mvyele mweγenyeza kilanga, ndiye akibana shi na kilanga chakwe, azalahiza mpome ya wapuna wakwe mwe mkono wa yuja.

³ Vituhu wazaγamba: Haleluya! Moshi wakwe wakwela kale na kale!

⁴ Waja waγolokezi milongo mili na wane na ziya nyama ne zizakina funi, zizamvika Mulungu mweikala mwe kiti angwe: Amini. Haleluya!

⁵ Haja he kitingwa hazalawa kanwa angwe: Mtogolei Mulungu ywetu, inywi wapuna wakwe woshe mwemwogoha Mulungu, wadodo na wakulu!

Nteγuzi ya ṅwangotongwa izabuia.

⁶ Nizaiva, viya ni vuzo ja bumba kulu, kangi viya ni vuzo ja mazi mangi, kangi viya ni vuzo ja lubambala lwe nguvu, angwe: Haleluya! Hambu Zumbe Mulungu ywelu mwena nguvu zoshe azaγuwa uzumbe.

⁷ Netitamilwe, titowe mazumo, timgimbike, hambu nteγuzi ya ṅwangotongwa Izabula, mkaziye azabinda kukiteγa,

⁸ azainkwa shuke za halili zeṅala na kunamanika, azwike; hambu inu halili ni utana wa waṅazi.

⁹ Ne nihoγangwa: Gonda kuγamba: We nyemi ni waja waitangilwewo nkande za nteγuzi ya ṅwangolo! Vituhu naγangwa: Izi ni mbuli za Mulungu kweli!

¹⁰ Nizamkinila he milundi yakwe, kangwe nimvike, miya azaniti: Leka ivyoho! Iwe na wanduγu wako watozeshewo uwona wa Yesu imi ni mupuna ṅwenyu. Mvike Mulungu! Hambu uwona wa Yesu ni mpehongwa ya uteγanyi.

Kilisito alawila.

¹¹ Nizaona, lwingu lukizuγulwa, kuna falashi yeṅala, aipandileye aitangwa mtanda na mkweli, alaha masa, kangi agomba nkondo na utanda.

¹² Mesho yakwe viya ni bilibili ja moto, mwe mutwi wakwe ana malinga mangi, ana zina jigondiγwejo, miya nkakuna mwejitaila kushima ṅwenye.

¹³ Aizwikile nkazu igezilweyo mpome, zina jakwe aitangwa; Mbuli ya Mulungu.

¹⁴ Ntimizi ze kuja kwe lwingu zamtongela, waipandile mafalashi yeṅala, waizwikile halili zeṅala na kunamanika.

¹⁵ Mwe kanwa chakwe mzalawa shime yekola, kangwe atowe wamzimu nayo. Ṅwenye nezeawalishe na ngoda ya kilama, kangi ne mwetwa mwe iyo ntuli ya mvinyo wa maya na wa kileya cha Mulungu mwena nguvu zoshe.

¹⁶ Ana zina jigondiγwejo mwe nkazu yakwe he vindi jakwe: Mfuṅwa ywawafuṅwa, Zumbe ywa wazumbe.

Salani atambikwa mwe ziwa ja moto.

¹⁷ Nizaona mlau, aiγoloke mwe zuwa, azabohela na kanwa kikulu ndeγe zoshe zepulika mwe lwingu lwe gati, angwe:

¹⁸ Soi, mwunganane kwe nkande za Mulungu mkulu, muje nyama za wazumbe, nyama za wafuṅwa, nyama za wanguvu, nyama za mafalashi na za waja wayapandilewo, nyama za wana vyale wosheni na zawadodo na zawakulu!

¹⁹ Nizaona, ija nyama nawazumbe wa shi na ntimizi zawe wakiunganana, kangwe waomane na yuja apandileye inu falashi na ntimizi yakwe.

²⁰ Ne ihogwilwa ija nyama haṅwe na mubilikizi ywa ulongo, ndiye akiγoshola viya vilozo he mesho yakwe, aazaγanyevyo navyo waja wakigezilewo nyindi ja ija nyama na kuvika kinyuwa chakwe. Wake moyo, awa waili wazatambikwa na mwe ziwa ja moto uvanganewo na vibilitibiliti.

²¹ Waja watuhu wazakoṅwa na ija shime ilawileyo mwe kanwa cha yuja apandileye ija falashi; ndeγe zoshe zizaiγuta nyama zawe.