Mfumbulo 18 - Kishambala New Testament 2005

Kanwa chaiza kuti muzi wa Babeli uzachakuka.

¹ Vikibinda nizaona mlau mtuhu, azasheela mwe lwingu, ana ufuṅwa ukulu, kangi shi izagwa langaila kwa utana wakwe.

² Azakema na kanwa kikulu angwe: Uzachakuka! Uzachakuka uja muzi mkulu wa Babeli, uzaγaluka ikailo ja mpepo na ja mpeho mbada zoshe na fikilo ja ndeγe mbada zoshe zeshukwa.

³ Hambu mvinyo wa maya ya kilanga chakwe wamzimu wazaunywa, wazumbe wa shi wazatenda kilanga naye, wachuluzi wa shi wazaγaluka wazuli kwa mbuli ya viya, avyoisiiza kubanabana viya vyakwe.

⁴ Nizaiva kanwa kituhu chelawa mwe lwingu, angwe: Inywi wa mbali yangu, lawai mwakwe, kangwe uhuza wakwe ushezamitoza, kangwe ija milaho yakwe ishezagwa kwenyu kohe!

⁵ Hambu mibanile yakwe izatailikana hata uko kwe lwingu, Mulungu akumbuka utungulu wakwe. Mulihei, sa ṅwenye alihilevyo!

⁶ Kangi mulihei kaili kwa viya, miγoshwele yakwe ilivyo! Mwe chiya kinywelo, ndicho akitekela nacho, mtekelei kaili!

⁷ Sa viya aisiizevyo kukihamba na kubanabana viya vyakwe, isiizai kumswilimiza sa viyaho na kumwonya ukiwa! Hambu mwe moyo wakwe aγamba: Niikala viya ni mkezumbe, siashiγwa ike, ukiwa sezeniuone!

⁸ Kwa ivyoho milaho yakwe nezeimgweele mushi muṅwe, kifa na ukiwa na sala, kangi nezeaokwe na moto, hambu Mulungu ne ndiye amlahe, ni Zumbe mnguvu.

Kwamanyika kuti utana woshe wa Babeli uzabanika.

⁹ Ndiwo wamlilile, ndiwo waone sungu kwa mbuli yakwe, ni wazumbe watendilewo kilanga naye na uhambanyi woshe, wakizaona moshi, ukikwela haja, ndiho aokwe na moto.

¹⁰ Wataγoloka hale kwa mbuli ya woγa na ija milumilwe yakwe wakikema: Nkondo! Nkondo! Uja muzi mkulu, uja muzi, ndiwo uina nguvu, uja muzi wa Babeli, mlaho wakwe uzagwa kamkaṅwe!

¹¹ Hata wachuluzi wa shi watalila, wataona ukiwa kwa mbuli yakwe, kwa kuti nkakuna ndiye lushe akeγula ntanu zawe,

¹² za zahabu na za feza na za viiwe vyena kima na mashalu na ziya shuke ntana za kisutu na za halili na za suli na ija miti mitana yoshe na ziya ntanu zoshe za meno ya ntembo na ntanu zoshe za miti yena kima na za ṅandu na za kilama na za nyanga na kelefu

¹³ na maludufu na miti yena zumba tana na mafutilo ya miti yehumpuntika vitana na uvumba na mvinyo na mavuta na unga na ngano na ṅombe na mbuzi na ngoto na mafalashi na magaii na mili na myoyo ya wantu.

¹⁴ Hata matunda ya miti, ndiyo moyo wako ukitamilwa ndiyo, yazakuaγila, viya vitana vyoshe vya nyemi yako vizakuaγila, nkezevioneke.

¹⁵ Waja ndiwo wakichuluza navyo, ndiwo wakionela mali yakwe, wataγoloka hale kwa mbuli ya woγa na milumilwe yakwe wakilila na kukema kwa mbuli ya ukiwa wawe,

¹⁶ kuti: Nkondo! Nkondo! Uja muzi mkulu, ndiwo ukivuta halili na kisutu, ndiwo ukikihamba na zahahu na viiwe vyena kima na mashalu,

¹⁷ uja uzuli woshe weinga haja uzabanika vivi du lushe! Hata wenye melikebu na woshe weanga na vyombo na wantu wa bahali woshe na weγoshola ndima uko kwe bahali wazaγoloka hale wakiona,

¹⁸ moshi ukikwela haja, ahookwa na moto, wazakema angwe: Kuna ndai, ndiye afanane na unu muzi mkulu?

¹⁹ Wazakitambikila vumbi mwe mitwi yawe, wazakema na kulila kwa ukiwa angwe: Nkondo! Nkondo! Uja muzi mkulu, ndimo woshe weanga na melikebu mwe bahali wakiγaluka wazuli, na uγoli wakwe, uzabanika vivi du lushe!

²⁰ Tamilwa kwa mbuli yakwe, iwe lwingu na inywi waṅazi na ntuṅwa na wabilikizi, kuti Mulungu azalahiziza masa yenyu!

²¹ Mlau muṅwe mwe nguvu azainula iwe, ukulu wakwe ji inga sa mkungo wa gali, azajitambika na mwe bahali angwe: Ne uja muzi mkulu wa Babeli uvyotambikwa kwa nguvu ṅwenga du, kangi nkauzaoneka.

²² Kangi mulilo wa waja wetowa mapango na mazumali na miluli na magunda nkezeukeivika kwako, hata mafundi ya ndima zoshe nkezeyakeoneka kwako, hata vuzo ja kubunduγa nkezejikeivika kwako!

²³ Hata langaila ja taa nkezejikepwinkuka kwako, hata lukeleγele lwa wali wa kiγoshi na wa kivyele nkezelukeivika kwako! Hambu wachuluzi wako ne wai wakulu wa inu shi, hambu wamzimu woshe ne wakiazaγanyiγwa ni ushai wako,

²⁴ kangi mwako ne mkioniγwa mpome ya wabilikizi na ya waṅazi na ya woshe wakomiγwewo kunu shi.