Mfumbulo 17 - Kishambala New Testament 2005

Mvyele mbada apandileye nyama.

¹ Waja walau mfungate watozizewo ziya ntungo mfungate ṅwiyae ywawe muṅwe azaiza, azanilonga angwe: So, nikuonyeshe mlaho wa yuja mvyele mweγenyeza kilanga, mweikala ulanga mwe mazi mangi.

² Uyu ne wazumbe wa inu shi watendileye naye kilanga, wantu weikala kunu shi wazatengeziγwa ni mvinyo wa kilanga chakwe.

³ Azaniiγala kimpeho na mwe nyika; nizaona mvyele apandileye nyama yelungulika mpome, igisizeyo mazina ya lukanko, ina mitwi mfungate na feya kumi.

⁴ Yuja mvyele aivutile shuke ntana za kisutu na suh, aikihambile na zahabu na viiwe vyena kima na makalata, mwe mkono wakwe aitozize kinywelo cha zahabu, chiimemile vye useh na viya vibada vyoshe vya kilanga chakwe.

⁵ Kwe cheni chakwe kuigondiγwe zina jishijofumbulikana: Muzi mkulu wa Babeli, kinine cha watesi na useli woshe we uko shi.

Bontokelo ja nyama yena mitwi 7 na feya 10.

⁶ Nizaona, yuja mvyele akinywa mpome ya waṅazi na mpome ya waona wa Yesu; nizamaka nikiona ichi kimaka kikulu.

⁷ Yuja mlau azaniti: Umakai? Nenikufumbwile kihili cha uyu mvyele na cha inu nyama yemweleka, yena mitwi mfungate na feya kumi.

⁸ Ija nyama, ueneyo, ndiyo ii haha, nkaiho, miya inga ikwele ikilawa uko kuzimu, ihite kwa banika. Uko nezewashentuke weikala uko shi, washigondiγwewo mazina yawe aho, shi ikiumbiγwa, wakizaona iyo nyama, ndiyo ii haho, kuti nkaiho, kuti nezeilawile.

⁹ Bontokelo ja inu mbuli jikunda Iutwi: Ija mitwi mfungate ni milima mfungate, yuja mvyele ayoikaila, kangi ni wazumbe mfungate.

¹⁰ Washano wazabinda kukina, muṅwe a haha, mtuhu nkazati alawile, kangi akizalawila, shuti aneikala hadodo.

¹¹ Kangi ija nyama, ndiyo ii haha, ishiyo haha ivi lushe, ija ni ya mnane, waja mfungate ni ṅwiyae ywawe, yahita kwa banika.

¹² Ziya feya kumi, uenezo, ni wazumbe kumi washizatiwo kuγuwa uzumbe, miya waγuwa ufuṅwa wa kizumbe saa ṅwenga haṅwe na ija nyama.

¹³ Awa mbuli yawe ni ṅwenga, nguvu yawe na ufuṅwa wawe wauinka ija nyama.

¹⁴ Awa ne ndiwo waomane na yuja ṅwangoto, miya ṅwangoto alawavota, hambu ni Zumbe ywa wazumbe, ni Mfuṅwa ywa wafuṅwa woshe, ana waja waitangwewo, washaγulwewo, wetozesha.

¹⁵ Azaniti: Yaja mazi, ueneyo, yuja mvyele mtesi akiyaikaila ni mbali na mahumba na wamzimu na vilosi.

¹⁶ Ziya feya kumi, uenezo, na ija nyama, awa ne ndiwo wamwifye uyu mvyele mtesi, nezewaleke, aashiγwe, abunkuke, kuti nkana shuke, nezewaje nyama ya ṅwili wakwe, ṅwenye watamwoka mwe moto. Hambu Mulungu azawafanyanyiza kuγoshola inu mbuli,

¹⁷ ayokunda, waivane inu mbuli ṅwenga kuinkila uzumbe wawe na kwe ija nyama, mpaka mbuli za Mulungu zibontoke.

¹⁸ Yuja mvyele, umweneye, ni uja muzi mkulu wena uzumbe wa wazumbe wa inu shi.