Mfumbulo 14 - Kishambala New Testament 2005

Yuja ṅwangoto aimbilwa ni wakombolwawo.

¹ Nikiolela nizaona yuja ṅwangoto, aiγoloke mwe mulima wa Siyoni, ana wantu makulija gana na milongo mine na mane, waigondiγwe zina jakwe na zina ja ishe kwe vyeni vyawe.

² Nizaiva kanwa chelawamwe lwingu, viya ni chamazi mangi, kangiviya ni cha lubambala lukulu; vituhu ichi kanwa, niivilecho, chifanana viya ni cha mafundi ya mapango wetowa mapango yawe.

³ Waimba imbo hya haja hena kitingwa na ziya nyama ne na waja waγolokezi. Kangi nkakuna adahileye kuhina iji imbo kushima wajamakulija gana na milongo mine na mane wakombolwewo wakiushiγwa mwe shi.

⁴ Awa ni waja washikandanyiγwewo ni mwangilano na wavyele; ni wabweni; awa ne wemtongela yuja ṅwangoto, ndiko ahite nako; awa wazakombolwa kwa wantu, ni mulimbulo wemtala Mulungu na yuja ṅwangoto.

⁵ Mwe vyanwa vyawe nkamwoneke mambeza. Nkawana masa.

Walau 3 walonga ulau wawe.

⁶ Nizaona mlau mtuhu, akipulika mwe lwingu lwe gati, aitozize ulau wa ukalami wa kubilikila waja weikala mwe shi, mbali zoshe na makolwa yoshe na vilosi vyoshe na wamzimu woshe.

⁷ Azalonga na kanwa kikulu angwe: Mwogohei Mulungu! Munkei ntogolo! Hambu hakwe ha lahila masa hazabula. Mvikei aγosholeye lwingu na shi na bahali na mashoko ya mazi!

⁸ Mlau mtuhu ywa mbili azamtongela angwe: Uzachakuka! Uzachakuka uja muzi mkuluwa Babeli, ndiwo ukigisa wamzimu woshe mvinyo wa kilanga chakwe wekweza maya!

⁹ Mlau mtuhu ywa ntatu azawatongela akilonga na kanwa kikulu angwe: Muntu mwevika ija nyama na kinyuwa chakwe, mwegela nyindi jakwe mwe cheni chakwe ao mwe mkono wakwe wa kulume,

¹⁰ ne ndiye anywe mvinyo wa maya ya Mulungu ugezibwewo mwe kinywelo cha maya yakwe, ushivanganyiγwewo na mazi, ne ndiye aswilimiziγwe mwe moto wa vibilitibiliti, aiolelwe ni wantu waṅazi na yuja ṅwangoto.

¹¹ Moshi wa mlaho wawe wakwela kale na kale, nkawana luhemele kilo na mushi, ndiwo wakikigela nyindi ja zina jakwe.

¹² Aho habontoka mizizimizize ya waṅazi, ndiwo wakianga na milaγilizo ya Mulungu na kumtozesha Yesu.

¹³ Nizaiva kanwa chelawa mwe lwingu angwe: Gonda: We nyemi ni wafi wafilewo na kumtozesha Zumbe, buandiila haha! Kweli mpehongwa waγamba: Wahemela lulali lwawe, hambu ndima zawe ziyawatongela.

Ṅwana muntu na uhuluzi wakwe.

¹⁴ Nikiolela nizaona zunde jeṅala, mwe iji zunde mwiikale mwefanana viya ni ṅwana muntu, mwe mutwi wakwe ana bundu ja zahabu, mwe mkono wakwe ana luhamba lwekola.

¹⁵ Mlau mtuhu azalawa vikiloi, azamubohela yuja mweikaila jiya zunde na kanwa kikulu angwe: Lohola luhamba lwako, ushenge nalo! Hambu mishi ya uhuluzi izabula, kangi mbuwa za shi zizakalaγala.

¹⁶ Ne yuja mweikaila jiya zunde ahotambika luhamba lwakwe na uko shi, lushe shi izahululwa.

¹⁷ Mlau mtuhu azalawa mwe vikilo je uko kwe lwingu, yohena aitozize luhamba lwekola.

¹⁸ Mlau mtuhu azalawa kuja kwe okelo ja ṅombe za mviko, ne mwena ufuṅwa wa moto, azamubohela yuja atozizeye luhamba lwekola na kanwa kikulu angwe: Lohola luhamba lwako lwekola, ushenge vizeγembwele vya mizabibu uko shi! Hambu ntunda zawe zizaizwa.

¹⁹ Yuja mlau azatambika luhamba lwakwe na uko shi, azashenga mazabibu ya shi, azayatambika na mwe ntuli nkulu ya maya ya Mulungu.

²⁰ Mwe iyo ntuli yazatweiγwa uko se kwe muzi, ne kuholawa mwe iyo ntuli mpome, izabula he vihampa vya mafalashi na kudenganila haja hantu ntampo kulija na magana mtandatu.