Mfumbulo 12 - Kishambala New Testament 2005

Mvyele azwikileye zuwa aifiγwa ni zoka.

¹ Uko kwe lwingu kuzalawila lushe kilozo kikulu: Ni mvyele azwikileye zuwa, kangi ṅwezi u shi he milundi yakwe, mwe mutwi wakwe ana bundu ja ntondwe kumi na mbili;

² ana nda, akema kwa kulumilwa, akiona ntoγo za kuvyala.

³ Vikibinda, kuzalawila kilozo kituhu mwe lwingu: Ni zoka kulu ja moto, jina mitwi mfungate na feya kumi, kangi mwe mitwi yakwe muna malinga mfungate;

⁴ lunga lwakwe luzahuna fungu ja ntatu ja ntondwe ze mwe lwingu, luzazitambika na shi. Iji zoka jizamγolokela yuja mvyele mweunga kuvyala, kangwe aho, ndiho avyale, jimumeze ṅwanae.

⁵ Azavyala ṅwana ywa kiγoshi, mwegomba kulisha wamzimu woshe na ngoda ya kilama. Uyu ṅwanae azapakulwa, azaiγalwa kwa Mulungu na kwe kiti chakwe, yuja mvyele azanyilika na mwe nyika,

⁶ kuja ana hantu hakwe aliγanyiziγweho ni Mulungu, ahashuγwe mishi kulija na magana maili na milongo mtandatu.

Mikaeli avota jiya zoka.

⁷ Nkondo izagwa mwe lwingu: Mikayeli na walau wakwe wazaomana na jiya zoka. Jiya zoka johena na walau wakwe wazaomana,

⁸ miya nkawadahile, hantu hawe nkahaoneke vituhu mwe lwingu.

⁹ Ijo zoka kulu ni ija nyoka ya kale yeitangwa ṅwenye leba haidu Satani, kangi ne mweazaγanya ngulu ngima; lushe azatambikwa haṅwe naye.

¹⁰ Nenihoiva kanwa kikulu mwe lwingu angwe: Lushe uhonya na nguvu na uzumbe ni wa Mulungu ywetu, ufuṅwa ni wa Kilisito ywakwe, hambu kuzatambikwa yuja mtakufyalima wanduγu welu, ndiye akiwashembeka kwa Mulungu kilo na mushi.

¹¹ Weoye wazamvota kwa nguvu ya mpome ya yuja ṅwangoto na nguvu ya mbuli ya uwona wawe, kangi ne washikikundisha shuti kufa.

¹² Kwa ivyoho jai nyemi, inywi nyingu na nyoshe mweikala mumu! Nkondo izalawila shi na bahali, kwa kuti ṅwenye leba azasheela na kwenyu, ana maya mangi, ataila, kuti mishi yakwe ni miγeke.

Yuja mvyele avunilwa.

¹³ Jiya zoka jikiona, kuti jizatambikwa na shi, jizaγulusha yuja mvyelengwa avyeleye yuja ṅwana ywa kiγoshi.

¹⁴ Miya yuja mvyelengwa azainkwa mawawa maili ya ngwilizi nkulu, adahepulika na nyika, abule haja hantu hakwe, ahoshuγwa mishi inu na iyo, ndiyo iize, na kahindi ke nyuma, kangwe ashezaoniγwa ni jiya zoka.

¹⁵ Jiya zoka jizalavya mazi mwe kanwa chakwe, viya ni muto, jizayamtambikila yuja mvyelengwa, kangwe jimunywilimize.

¹⁶ Miya shi izamwambiza yuja mvyelengwa, izaashama, izanywa uja muto, jiya zoka jilavizewo mwe kanwa chakwe.

¹⁷ Jiya zoka jizakwelwa ni maya kwa mbuli ya yuja mvyelengwa, jizahita kwa omanya wanae watuhu wetozesha milaγilizo ya Mulungu, weanga na uwona wa Yesu.