Mfumbulo 11 - Kishambala New Testament 2005

Vikilongwa jahimiγwa.

¹ Nizainkwa lasi jefanana na ngoda, angwe: Inuka, ukahime vikilongwa ja Mulungu na okelo ja ṅombe za mviko na waja wevika mumo!

² Miya lwazo lwe se he vikilongwa ululeke, usheluhime! Hambu luzainkilwa kwa wamzimu, watajatajata muzingwa mṅazi myezi milongo mine na mili.

Waona 2 wa Mulungu wabililika, wakoṅwa, wafufuka.

³ Waona wangu waili neniwalaγilize, wabilikile mishi kulija na magana maili na milongo mtandatu, waizwikile maguniya.

⁴ Awa ne ija miziyaγembe mili na ziya taa mbili zeγoloka ha Zumbe ywa ngulu ngima.

⁵ Ati muntu akunda kuwaifya, moto utalawa mwe vyanwa vyawe, ntaja wankulu wawe; muntu akikunda kuwaifya, inu ni mikomelwe yemwagiza.

⁶ Awa wana ufuṅwa wa kuzuγala lwingu, fula ishegwe mishi ya ubilikizi wawe, kangi wana ufuṅwa wa mazi kuyaγalamusha mpome na ufuṅwa wa kulaha shi na milaho, ndiyo wakunde.

⁷ Wakibinda kulonga uwona wawe, kutakwela zama uko kuzimu, jitawaomanya, jitawakoma.

⁸ Vimba vyawe vitaashiγwa tanga he uja muzi mkulu weitangwa kimpeho Sodoma na Egiputa; kangi hata Zumbe ywawe ne akomelwaho.

⁹ Wantu kuṅwe wa mbali na wa makolwa na wa vilosi na wa wamzimu woshe wataolela vimba vyawe mishi mitatu na hindi, miya nkewaleke, vimba vyawe vikizikwa mwe mbila.

¹⁰ Weikala kunu shi watatamilwa kwa iyo mbuli yawe, wataja nyemi, watazuγilana, kwa kuti awa wabilikizi waili ne wakilumiza waja weikala mwe shi.

¹¹ Miya ija mishi mitatu na hindi ikizinka, kuzalawa mpebo ya nkalamo kwa Mulungu, izawaingila, wazainuka, wazaγoloka na milundi yawe, woγa ukulu uzagwila waja wewaolela.

¹² Wazaiva kanwa kikulu chelawa mwe lwingu, chizawalonga angwe: Kwelai na kunu! Wazakwela na zunde, mpaka wabule mwe lwingu, wankulu wawe waiwaolele.

¹³ Ija minga kuzaoneka mdidimo mkulu, uja muzi uzachakuka fungu ja kumi, wantu wakomiγwewo ni uwo mdidimo ni mazina makulija mfungate, waja washiγalewo wazaingilwa ni woγa, wazamlaviliza Mulungu ywa lwingu ntogolo.

¹⁴ Nkondo ya mbili izaomboka, kangi shivyo: Nkondo ya ntatu yafikabula.

Mlau ywa 7 atowa gunda, nkondo ya 3.

¹⁵ Mlau ywa mfungate azatowa gunda, ne kuhoiviγwa mwe lwingu vyanwa vikulu angwe: Uzumbe wa ngulu ngima uzaγaluka wa Zumbe ywetu na Kilisito ywakwe, ne ndiye atoze uzumbe kale na kale.

¹⁶ Kangi waja waγolokezi milongo mili na wane weikala mwe viti vyawe he mesho ya Mulungu wazakina funi, wazamvika Mulungu angwe:

¹⁷ Takulaviliza ntogolo, Zumbe Mulungu, wena nguvu zoshe, we haha, ndiwo ui haho, kuti uzaγuwa uzumbe kwa nguvu yako nkulu.

¹⁸ Wamzimu wakikwelwa ni maya, ne maya yako yalawileho, ne mushi ubuzileho, wafilewo waiahwe, upokeze wapuna wako, wabilikizi na waṅazi na weogoha zina jako, ati ni wadodo, ati ni wakulu, kangi ubane waja webana shi.

¹⁹ Vikibinda kuzazuγulwa vikilo ja Mulungu je mwe lwingu, mwe iji vikilo jakwe mzaoniγwa kibweta cha kilaγa chakwe; haho ne kumulika na kuγuγumuka na kubambaluka na kudidima na fula nkulu ya mawe.