Mateyo 3 - Kishambala New Testament 2005

Yohana mubatizi kilongolezi cha Yesu abilikila: Hitulai ntongonyezi. 1-12.

¹ Mishi ija Yohana Mubatizi ne akiikala mwe nyika ya Yudeya akibilikila angwe:

² Hitulai ntongonyezi zenyu! Hambu uzumbe wa lwingu u hehi.

³ Hambu uyu ni yuja ateγanyiγwaye ni mteγanyi Yesaya akiγamba: Kanwa cha mubilikizi chaivika mwe nyika angwe: Liγanyai sila ya Zumbe na kuγolosheza aho, ndiho agwile!

⁴ Yuja Yohana ṅwenye ana kizwiko cha mayoya ya ngameya, aichikantile na kikowe; nkande zakwe ni siγe na woki wa vambi.

Yohana abatiza mwe Yolodani.

⁵ Haja wa Yelusalemu woshe na wa Yudeya woshe na woshe weikala hehi hehi na Yolodani wazamlawila,

⁶ wazabatizwa ndiye mwe muto wa Yolodani wakilaviliza wabanilevyo.

⁷ Akiona, Mafaliseyo na Masadukeyo wangi wakiiza, wabatizwe, azawati: Wana nyoka inywi! Amionyesheye kuti: Mtazanyilika mayangwa, ndiyo yalawile, ni ndai?

⁸ Tendai kuwo jeivana na kuhitula ntongonyezi!

⁹ Mshefanyanye mwe myoyo yenyu kuγamba: Tina tate yweshu Abulahamu! Hambu namiti: Mulungu adaha kumwinulila Abulahamu wana mwe aya mawe.

¹⁰ Miti iiteγanyiziγwe hoya nkoloi, kila muti ushiwovyala matunda matana utakelwa, utatambikwa mwe moto.

¹¹ Imi nimibatiza na mazi, mhitule ntongonyezi, miya yuja mwenitongela anizinka nguvu nkaviniagiza nikimwinwila vilatu, yuja atazamibatiza na mpeho ṅazi na moto.

¹² Aitozize kihetelo mwe mkono wakwe, aṅaze twelo jakwe ja ngano, mshele atauingiza mwe ikilo, miya makanka atayaoka na moto ushizimawo.

Yesu abatizwa ni Yohana. 13-17.

¹³ Ne Yesu alawileho Galileya, azamwizila Yohana haja Yolodani, kangwe abatizwa ndiye.

¹⁴ Miya uyu azamfingiza angwe: Imi vyaniagiza, nibatizwe ni weyo, lushe iwe uiza zeze na kwangu?

¹⁵ Yesu azamlandula angwe: Leka du! Hambu ishwi vyatitala kubontola utanda woshe. Ne ahomkundiza.

¹⁶ Yesu akibinda kubatizwa azafikalawa mwe mazi; akiolela, lwingu luzazuγuka azaona mpeho ya Mulungu, ikisheela, ikimwizila ifanana na suwa;

¹⁷ kangi aho hazalawa kanwa mwe lwingu angwe: Uyu ni ṅwanangu, niyemkundisha, niyetamilwa ndiye.