Mateyo 27 - Kishambala New Testament 2005

Yesu alahiγwa kwa Pontio Pilato. 1-14.

¹ Kukicha wavikizi wakulu woshe haṅwe na watawa wa mbalingwa wazalonga njama kwa mbuli ya masa ya Yesu, wazaivana, wamkome.

² Wazamshunga, wazamwiγala, wazamwinkila kwa Pilato, yuja mtoza shi.

Yuda Isikaliyota afa.

³ Yuda amwinkileye akiona, kuti azabinda kulahwa, azaγuwa moyo mtuhu, azauza ziya feza milongo mitatu kwa wavikizi wakulu na kwa waγolokezi,

⁴ angwe: Nizabana nikiinkila muntu ashiyeagiziγwa ni masa ya kuitilwa mpome. Waja wazamuti: Inu mbuli tina mbwai nayo ishwi? Imanye ṅwenye!

⁵ Azatambika ziya feza na muja mwe vikilongwa, vikibinda azahita, azakifuwa.

⁶ Waja wavikizi wakulu wakiγuwa ziya feza, wazaγamba: Ni viwiwi, tikizigela mwe ntogolo, wantu wazomunka Mulungu, kwa kuti ni yombe ja mpome ya muntu.

⁷ Wakifanyanya mbuli yawe wazaγula nayo lubuwa lwa mwufi, luγaluke zikilo ja waγeni.

⁸ Kwa ivyoho luja lubuwa luzaitangwa lubuwa lwa mpome mpaka lelo.

⁹ Haja hazabontoka iyo mbuli ilongiγweyo ni mteγanyi Yelemiya ya kuγamba: Wataγuwa feza milngoo mitatu, ni yombe ja yuja ataγiγweye, wamγuzileye kwa wana Isilayeli,

¹⁰ wataγula nayo lubuwa lwa mwufi, sa viyaho Zumbe anilongilevyo.

Yesu afyulilwa, alumiziγwa ni washilikali.

¹¹ Yesu azaiγalwa kwa yuja mtoza shi; uyu mtoza shi azamwuza: Iwe u zumbe ywa Wayuda? Angwe ni Yesu: Uzalonga.

¹² Kangi akifyaliṅwa ni wavikizi wakulu na watawa nkalandule.

¹³ Ne Pilato ahomuti: Nkuiva viya vyoshe, wavyokushinga?

¹⁴ Miya nkamlandule hata mbuli ṅwenga du, ne yuja mtoza shi ahomakisha.

¹⁵ Miya mviko mkulu uhokakinta, mtoza shi azazwela kukawashungwila muṅwe ashungiγweye, ndiye wantu wakunde.

¹⁶ Mishi ija kuna muntu ashungiγweye mwena kilango kibada, aitangwa Balaba.

¹⁷ Wantu wakiunganana, Pilato azawati: Mukunda, nimishungwile ndai? Balaba hambu Yesu mweitangwa Kilisito?

¹⁸ Hambu aitaile, kuti wazamwinkila kwa wizu.

¹⁹ Miya akiikala mwe kiti chakwe cha lahila masa, muke azamtumila angwe: Ushezakigela mwe mbuli ya yuja mtanda! Hambu kilo cha lelo nizapishiγwa vikulu mwe sozi kwa mbuli yakwe.

²⁰ Miya wavikizi wakulu na watawa wazawatunya waja wantu, wamkunde Balaba, wadahemkoma Yesu.

²¹ Yuja mtoza shi azawauza vituhu angwe: Awa waili mumkunda ndai, nimumishungwile? Angwe ndiwo: Balaba.

²² Angwe ni Pilato: Lushe Yesu mweitangwa Kilisito nimγoshwele mbwai? Woshe wazalandula: Akatakontelwa mwe muti!

²³ Pilato awati: Abanilei? Miya waja wazaisiiza kukema angwe: Akatakontelwa mwe muti!

²⁴ Pilato akiona, kuti nkawavota, kuti vuzo jitaisiiza du, azaγuwa mazi, azahaka mikono, wantu woshe waiolele, angwe: Mwe aya masa ya mpome ya uyu muntu simo, yamanyei inywi wenye!

²⁵ Bumba joshe jizaitikila angwe: Mpome yakwe itiizile ishwi na wana wetu!

²⁶ Ne ahowashungwila Balaba, miya azalaγiliza, Yesu atowiγwe vibonko, vikibinda azamwinkila, akontelwe mwe muti.

Yesu afyulilwa, akontelwa mwe mti. 27-56.

²⁷ Lushe washilikali wa mtoza shi wazamγuwa Yesu na kitala, wazaitanga weyae wawe woshe na haho.

²⁸ Wazamhoka shuke zakwe, wazamzwika guni ja kizumbe jelungulika,

²⁹ wazaluka bundu ja miwa, wazajibadika mwe mutwi wakwe, mwe mkono wakwe wa kulume wazamunka ngoda ya lasi; wakibinda wazamgintila mazwi, wazamfyulila angwe: Mpongezi zumbe ywa Wayuda!

³⁰ Wa zamshwela mate, wazaγuwa ija ngoda, wazamtowa mwe mutwi.

³¹ Wakibinda kumfyulila wazamwusha jiya guni, wazamzwika shuke zakwe, wazamwiγala, wamkontele mwe muti.

³² Wakilawa kaya wazaona muntu ywa Kilene mweitangwa Simoni, uyu wazamkundila, amwinulile muli wakwe.

³³ Wakibula haja hantu heitangwa Gologota, ni kuγamba: He mazutwi,

³⁴ wazamnywesha mvinyo uvanganyiγwewo na mazi ya nyongo; akidomela nkakundile kunywa.

³⁵ Wakibinda kumwamba mwe muti wazapangilana shuke zakwe na kuzitowela lusolo, kangwe ibontoke ija mbuli ilongiγweyo ni mteγanyingwa kuγamba: Wazapangilana shuke zangu, guni jangu wazajitowela lusolo.

³⁶ Ivyoho wazaikala haho wakimγoja.

³⁷ He mutwi wakwe ulanga wazaika kibala chigondiγwecho masa yakwe kuγamba: Uyu ni Yesu, zumbengwa vwa Wayuda.

³⁸ Haja hazaambiγwa wampoko waili mwe miti haṅwe naye, muṅwe kulume, muṅwe kumosho kwakwe.

³⁹ Miya waja wezinka haja wazamkanka na kumzunguziza mitwi angwe:

⁴⁰ Iwe wechakula vikilongwa na kujizenga mishi mitatu, kihonye ṅwenye! Ati u ṅwana Mulungu, sheela mwe muti!

⁴¹ Vivyoho hata wavikizi wakulu haṅwe na watabaluwangwa na waγolokezi wazamvuluγila angwe:

⁴² Watuhu azawahonya, ṅwenye nkadaha kukihonya. Ati ni zumbe ywa Isilayeli, neasheele ivi lushe mwe muti, timtozeshe!

⁴³ Ne akimtozesha Mulungu, neamvunile lushe, ati amkunda! Hambu aakalonga kuti: Imi ni ṅwana Mulungu.

⁴⁴ Vivyoho hata waja wampoko wakontelwewo haṅwe naye mwe miti wazamfyulila.

⁴⁵ Saa mtandatu kuzagwa lwiza mwe shi ngima mpaka saa kenda.

⁴⁶ Saa kenda Yesu azakema na kanwa kikulu angwe: Eli, Eli, lama azabutani? Ni kuγamba: Mulungu ywangu, Mulungu ywangu, nini ukiniasha?

⁴⁷ Miya kuṅwe waγolokewo haja wakiviiva wazaγamba: Uyu amwitanga Eliya.

⁴⁸ Viya du lushe kuzaγuluka ṅwiyae ywawe muṅwe, azaγuwa fuli, azajigela mazi yenyeγela, azajitunga mwe lasi, azamnywesha najo.

⁴⁹ Miya waja watuhu wazaγamba: Leka, tiolele, ati Eliya aiza kwa mhonya.

⁵⁰ Miya Yesu azakema vituhu na kanwa kikulu, vikibinda azadwika moyo.

Ntangilo zionekezo Yesu akifa.

⁵¹ Ne jiya shuke kulu muno ja zuγaila haṅazi ṅwenye muja vikiloi jihotatuka gati, kuandiila ulanga mpaka shi. Hata shi izadidima, makungu yazabasuka,

⁵² mbila zizazuγuka, mili ya waṅazi wangi wasisilewo izafufuka,

⁵³ izalawa mwe mbila, ṅwenye akibinda kufufuka, izaingila mwe uja muzi mṅazi, izalawila wangi.

⁵⁴ Mγolokezi ywa washilikali na waja, awona nawo, wakimγoja Yesu, wakiona uja mdidimo na viya vituhu vionekevyo, wazaingiiwa ni woγa ukulu, wazaγamba: Kweli uyu ne al ṅwana Mulungu.

⁵⁵ Kuja kuna wavyele wangi waγolokewo hale wakiolela, ni waja ndiwo wakimtongela Yesu na kumγoshwela ndima, akilawa Galileya;

⁵⁶ wakina Maliya Magadalene na Maliya, nine ja Yakobo na ja Yose, na nine ja wana Zebedeyo.

Yesu azikwa. 57-61.

⁵⁷ Kukishwa kuzaiza mγoshi mzuli ywa Alimatiya, zina jakwe ndiye Yosefu, ṅwenye ni mhina ywa Yesu.

⁵⁸ Uyu azahita kwa Pilato, azamlombeza kimba cha Yesu; Pilato azalaγiliza, achiinkwe.

⁵⁹ Yosefu azaγuwa kimba chakwe, azachidenganyiza na shuke yeṅala,

⁶⁰ azachiika mwe mbila yakwe mpya, abongileyo mwe kungu, azashindika iwe kulu na kwe kifiγwe cha mbila, akibinda azahita.

⁶¹ Miya Maliya Magadalene na yuja Maliya mtuhu wa haja, waiikale sheja ja mbila.

Mbila yaγojwa.

⁶² Keloi jakwe, ni mhitu wa mushi wa liγanyiza ngoto ya Pasa, wavikizi wakulu na Mafaliseyo wazahita haṅwe kwa Pilato,

⁶³ wazamuti: Tafukila, kuti yuja mwazaγanyi azalonga, ake moyo kuti: Mishi mitatu ikizinka, nitafufuka.

⁶⁴ Laγiliza lushe, ija mbila iγojiγwe mpaka mushi wa ntatu, kangwe wahina wakwe washezaiza kwa bawa kimba chakwe, wakilonga kwa wantu kuti: Azafufuka kwa wafilewo! Ivyoho mwazaγanyo wa shilikiza utaisiiza kuzinka uja wa kuandiila.

⁶⁵ Pilato azawati: Shawa waluγojo! Hitai, mwiγoje sa muvyotaila!

⁶⁶ Waja wazahita, wazagongeza jiya iwe ja zuγaila, wazaika waja waluγojo, waγoje mbilangwa.