Mateyo 26 - Kishambala New Testament 2005

Wavikizi walonda ndivyo wamkome Yesu. 1-5.

¹ Yesu akibinda kulonga izi mbuli zosheni, azawati wahina wakwe:

² Mwataila kuti: Mishi mili ikizinka, ni Pasa; ne ndiho ṅwanangwa ywa muntu ainkilwe kwa koṅwa na kuambiγwa mwe muti.

³ Mishi ija wavikizi wakulu na watawa wa mbalingwa wazaunganana mwe kitala cha mvikizi mkulu mweitangwa Kayafa,

⁴ wazafanyanya, ndivyo wamgwile Yesu na minyanyi, wamkome.

⁵ Miya wazaγamba: Tishezamkoma mishi ya mviko, mushezagwa nkondo mwe bumbangwa!

Yesu aambwilwa mavuta Betaniya. 6-13.

⁶ Yesu akiikala Betaniya mwe nyumba ya Simoni Mkoma,

⁷ azaizilwa ni mvyele, aitozize kakomba ka mafutilo ya mluziluzi yaγuzilweyo na mali mangi, azayatununtila mwe mutwi wakwe, aiikale!

⁸ Wahina wakwe wakiviona wazaihilwa angwe: Unu ubanasi ni wai?

⁹ Hambu yaadaha kutaγwa kwa shilingi nyingi zikainkilwa kwa wakiwa.

¹⁰ Yesu akivitaila azawati: Nini mkimwonya uyu mvyelengwa sungu? Hambu azaγoshola ndima ntana mwe ṅwili wangu.

¹¹ Wakiwa muna nawo kwenyu mishi yoshe, miya imi nkamna na imi mishi yoshe.

¹² Uyu mvyelengwa akiambwila aya mavuta mwe ṅwili wangu azaupikila, udahezikwa.

¹³ Kweli namiti: Aho ndiho ulau wedi ubilikilwe mwe ngulu ngima, hata ivi, uyu aγosholevyo, nezevilongwe, kangwe yohe nezeakumbukwe.

Yuda Isikaliyota. 14-16.

¹⁴ Haho waja kumi na waili ṅwiyae ywawe mweitangwa Yuda Isikaliyota,

¹⁵ azahita kwa wavikizi wakulu, azawati: Mwakunda kuninkai, nimwinkile na kwenyu? Waja wazamwikila msuhi wa feza milongo mitatu.

¹⁶ Ne aandiileho kulonda lwinkilile.

Ngoto ya Pasa. 17-19.

¹⁷ Mushi wantu wahoandiila kuja migate ishigezilweyo shimbi wahina wakwe wazamwizila angwe: Ukunda, tikuliγanyizize hi ngoto ya Pasa?

¹⁸ Angwe: Hitai na muja kaya kwa ngatiyani, mumγambe: Kangwe ni mfuzi: Mishi yangu i hehi, nakunda, nijiile mwako ngoto ya Pasa haṅwe na wahina wangu.

¹⁹ Waja wahina wazaγoshola, sa Yesu awalaγilizevyo, wazaliγanya ngoto ya Pasa.

Yesu amlanga ndiye amwinkile. 20-30.

²⁰ Lwa ṅwiyaγulo azaikala na waja wahina kumi na waili, waje nkande.

²¹ Aho wakija azawati: Kweli namiti: Ṅwenyu muṅwe aunga kuniinkila.

²² Wazaona ukiwa ukulu, wazaandiila kumwuza muṅwe muṅwe angwe: Zumbe, hambu ni miyo?

²³ Azawahitwila angwe: Agintileye mwe lwiγa haṅwe na imi, uyu ne ndiye aniinkile.

²⁴ Ṅwanangwa ywa muntu ahita sila yakwe sa viyaho, mbuli yakwe igondiγwevyo, miya yuja muntu mwemwinkila ṅwanangwa ywa muntu nezeaone ukiwa; ati yuja muntu nkavyelwe, anga ni vitana vyakwe.

²⁵ Yuda, yuja ndiye amwinkile, azalandula angwe: Mkulu, hambu ni miyo? Amuti: Uzalonga.

Nkande ya Zumbe.

²⁶ Aho wakija, Yesu azaγuwa mgate, azalavya ntogolo, azaubendula, azawainka wahina wakwe angwe: Γuwai, muje! Unu ni ṅwili wangu.

²⁷ Vikibinda azaγuwa kinywelo, azalavya ntogolo, azawainka angwe:

²⁸ Nywai nyosheni mumol Hambu inu ni mpome yangu ya kilaγa kihya yeitilwa kwa mbuli ya wantu wangi, ya kuushiliza masa.

²⁹ Miya namiti: Kuandiila ivi lushe sezeninywe lute lwa mazabibu mpaka uja mushi, nihozalunyweela luhya haṅwe na inywi mwe uzumbe wa Tate.

Nkani za wahina. 30-35.

³⁰ Wakibinda kutogola wazamlawa, wahite kwe mulima wa miziyaγembe.

³¹ Haja Yesu azawati: Inywi nyoshe nemwihilwe ni miyo ichi kilo cha lelo, hambu kuigondiγwe: Nezenitowe mulishi, ngoto za chuma chakwe ziasakanyiγwe.

³² Miya nikibinda kufufuka nitamilongwela na Galileya.

³³ Petelo azamlandula angwe: Ati woshe waihilwa ni weyo, imi seniihilwe.

³⁴ Miya Yesu azamuti: Kweli nakuti: Ichi kilo cha lelo soγolo ishizati ikeme, utakela nkani katatu, kuti nku ywangu.

³⁵ Angwe ni Petelo: Hata nikibuza kukoṅwa haṅwe na iwe sezenikele nkani kuti: Si ywako! Wahina woshe wazalonga ivyoho.

Getisemane. 36-46.

³⁶ Vikibinda Yesu azahita hantu heitangwa Getisemane; haja azalonga wahina wakwe angwe: Ikalai aha, mpaka imi nihite na kuja kwa vika!

³⁷ Azamγuwa Petelo na waja wana waili wa Zebedeyo, azaandiila kubulilwa ni lusoyoyo na kuukwa ni vizingizo.

³⁸ Ne ahowati: Moyo wangu waisa kujiγwa ni lusoyoyo, ushiγaze kufa; ikalai aha, mgone mesho haṅwe na imi!

³⁹ Azahita na kamazu hadodo, azakina funi, azavika angwe: Tate, ali vyadahikana, ichi kinywelo chinizinke! Kangi imi nivyokunda sivyo, miya iwe uvyokunda vibontoke!

⁴⁰ Azahita kwa waja wahina, azawabulila, waisisile, azamuti Petelo: Nkamdahile kugona mesho na imi saa ṅwenga du?

⁴¹ Gonai mesho, muvike, kangwe msheγeziγwe! Moyo wakunda, miya ṅwili ni mnyonge.

⁴² Vituhu azahita ka mbili, azavika angwe: Tate, ati nkavidahikana chikinizinka, shuti nichinywe, viya uvyokunda vibontoke!

⁴³ Akiiza azawabulila vituhu, waisisile, hambu mesho yawe ne yaina usisiza ungi.

⁴⁴ Azawaleka, azahita vituhu, azavika ka ntatu, akilonga ija mbuli vituhu.

⁴⁵ Akibinda azaiza kwa wahina wakwe, azawati: Hayai sisilai, mwushe muku. Olelai, hazabula, ṅwanangwa ywa muntu ndiho ainkilwe mwe mikono ya wahuza!

⁴⁶ Inukai, tihite! Shuyuja mweniinkila! Azabula.

Yesu ashungwa. 47-56.

⁴⁷ Akelonga, kuzalawila Yuda, waja kumi na waili ni ṅwiyae ywawe; ana bumba kulu ja wantu watozizewo shime na vigongo weanduka kwa wavikizi wakulu na kwa watawa wa mbalingwa.

⁴⁸ Miya yuja mwemwinkila aiwainkile weyae lwitangilo kuγamba: Mwazahaona niyefyosana naye milomo, ndiye, mgwilei!

⁴⁹ Azafikamtimila Yesu angwe: Mkulu, mpeho na iwe!, akibinda azamfyosa milomo.

⁵⁰ Miya Yesu azamuti: Ṅwiyangu, uizilei? Ne weyae waholawila, wazamgwila Yesu na mikono yawe, wazamshunga.

⁵¹ Waja, Yesu awona nawo, ṅwiyae ywawe muṅwe azaiγala mkono, asholole shime, azamshenga mupuna ywa mvikizi mkulu shikilo, jizadwika.

⁵² Ne Yesu ahomlonga: Uza shime yako na hantu hakwe! Hambu woshe wetoza shime walazakoṅwa nazo.

⁵³ Hambu waγamba: Sidaha kumhembeleza Tate, akaninka ivi lushe aha kuzinka makulija kumi na maili ya walau?

⁵⁴ Miya baluwangwa zitabontoka vivihi? Shuti zibontoke iviho.

⁵⁵ Haho Yesu azalonga waja wantu angwe: Mulawile mwitozize shime na vigongo, viya mtabasha mumpoko, munigwile imi. Kangi mishi yoshe nizaikala kwenyu vikiloi nikifuza, miya nkamunigwizile.

⁵⁶ Ivi vyoshe vizaγosholwa, kangwe vibontoke viya, wateγanyingwa wagondilevyo. Haja wahina woshe wazamwasha, wazanyilika.

Yesu alahwa ni wavikizi wakulu. 57-75.

⁵⁷ Waja wamgwizilewo Yesu wazamwiγala kwa mvikizi mkulu Kayafa; hambu watabaluwangwa na watawa waiunganane kwakwe.

⁵⁸ Miya Petelo azamtongela hale hale mpaka kwe kitala cha mvikizi mkulu, azaingila na mumo, azaikala na wafunguwo, aone iyo mbuli, ndivyo ibontoke.

⁵⁹ Wavikizi wakulu haṅwe na wafuṅwa woshe wazalonda uwona wa lulimi, ndiwo wamshinge Yesu, kangwe wamkome. Waona wa lulimi wangi wazalawila,

⁶⁰ miya hata vivyo nkawaonele. Kushilikiza kuzalawila waili,

⁶¹ wazaγamba: Uyu azalonga kuti: Nadaha kuchakula vikilo ja Mulungu na kujizenga mishi mitatu.

⁶² Mvikizi mkulu azainuka, azamuti: Nkulandula ivi, awa wavyokushinga?

⁶³ Yesu azaleka lwashu. Ne mvikizi mkulu ahomuti: Mulungu mwe moyo akatakulaha, ukishetiγambila, ati ni weyo Kilisito, ṅwana Mulungu!

⁶⁴ Angwe ni Yesu: Uzalonga! Kangi namiti: Kuandiila ivi lushe nezemumwone ṅwanangwa ywa muntu, avyoikala kulume kwe nguvungwa, kangi avyoiza mwe mazunde ya lwingu.

⁶⁵ Ne mvikizi mkulu ahotatula shuke zakwe angwe: Atemweza Mulungu! Tishindalondelai waoua?

⁶⁶ Ivi lushe sha mzaiva mikankile yakwe. Muγambai? Waja wazaitikila angwe: Ni mumasa ywa kufa.

⁶⁷ Ne wahomshwela mate mwe cheni chakwe haṅwe na kumtowa nkonde; kuṅwe wazamtowa ngoda angwe:

⁶⁸ Kilisito, titeγanyize, ati ni ndai akulukuleye?

Petelo amtowa Yesu hulu.

⁶⁹ Miya Petelo azaikala mwe kitala kuja chengoi; kuzaiza mndele muṅwe na kuja aliko, azamuti: Hata iwe ne ukianga na Yesu ywa Galileya.

⁷⁰ Miya yuja azakela nkani, woshe waiivile, angwe: Sitaila uvyolonga.

⁷¹ Mndele mtuhu azamwona, akihalawa, akihita na uko nkilii; azalonga waja we kuja: Uyu ne akianga na Yesu ywa Nazaleti.

⁷² Azakela nkani vituhu azalonga na kukilisha kuti: Simtaila yuja muntu.

⁷³ Kafunda kadodo kakizinka, kuzaiza waja waγolokewo haja, wazamuti Petelo: Kweli hata iwe u ṅwiyae ywawe, hambu milongele yako yakubunkula.

⁷⁴ Haja azaandiila kukilaγilila na kukilisha angwe: Simtaila yuja muntu. Viya du lushe soγolo izakema.

⁷⁵ Ne Petelo ahofukila ija mbuli ya Yesu kuti: Soγolo ishizati ikeme, neukele nkani katatu, kuti nku ywangu. Azalawa na se, azalilisha.