Mateyo 24 - Kishambala New Testament 2005

Yelusalemu neuchakulwe.

¹ Yesu akilawa mwe vikilongwa azahita. Wahina wakwe wazamwizila, wamwonyeshe mizengele ya vikilongwa.

² Miya yuja azawalandula angwe: Nkamwona ivi vyoshe? Kweli namiti: Nkezehalekwe iwe, jikiandakana na ṅwiyae, jikishechakulwa.

³ Akiikala he mulima wa miziyaγembe, wahina wakwe wazamlawila he njama angwe: Utiγambile, ati ni lini, ziya mbuli zikizabontoka! Kangi lwitangilo lwa kuuya kwako na lwa bindilizo ja inu ngulu ngima yoshe ni luhi?

⁴ Yesu azawahitula, azawati: Oleleshai, muntu ashezamiazaγanya!

⁵ Hambu wantu wangi watazalawila mwe zina jangu wakiγamba: Imi ni Kilisito, wataazaγanya wangi ivyoho.

⁶ Shuti muneiva mbuli za nkondo na ulongo wa nkondo; violelei, mshevishentuke! Hambu viya shuti vibontoke, miya hata aho bindilizo nkajizati jibule.

⁷ Hambu mbali na mbali zitainukilana, hata wazumbe na wazumbe weyae wawe, hantu haṅwe na haṅwe hatagwa sala, hata mididimo neizinke.

⁸ Viya vyoshe ne chandilo cha mishango.

Wahina watalumiziγwa.

⁹ Haja watamigela ukiwa, wamikome; nemshukiziγwe ni mbali zoshe kwa mbuli ya zina jangu.

¹⁰ Ne ndiho wangi nezewaihilwe, wainkilane wenye na wenye kwa kushukizanya.

¹¹ Wateγanyi wangi wa ulongo watainuka, wataazaγanya wangi.

¹² Kwa kuti ubezi wa mbulingwa utagisa koshe koshe, wangi lukundisho lwawe lutahola.

¹³ Miya ndiye azizimize mpaka bindilizo, ne ndiye ahone.

¹⁴ Kangi unu uiau wa uzumbengwa unebilikilwa mwe ngulu ngima, uγalukile mbaii zoshe uwona! Ivi vikibontoka, bindilizo jitakinta.

Uchakuzi webuza useli.

¹⁵ Aho ne ndiho nezemwone, uja uchakuzi webuza useli ukilawila hantu haṅazi, sa vilongiγwevyo ni mteγanyi Danyeli; mwefyoma aha hantu ateγeieze vyedi!

¹⁶ Mishi ija we mwe shi ya Yudeya wanyilike kwe milima!

¹⁷ Mwebulilwa aiikale mwe nyumba ulanga, asheshindeingila kwa γuwa ntanu ze nyumbai!

¹⁸ Mwe nkoi asheuye kwa γuwa shuke zakwe!

¹⁹ Wena nda na weonkeza wataona ukiwa mishi ija.

²⁰ Hembelezai, kuja kunyilika kwenyu kusheteγane na mishi ya nyota ao mushi wa sabato!

²¹ Hambu haja hatagwa ukiwa ukulu washaonekawo kale hoshe, vikiandiila haja, shi ikiumbiγwa, mpaka ivi lushe, kangi nkezeuoneke vingi.

²² Ati mishi ija nkaidwishiγwa, anga nkakuna muntu mwehona; miya kwa mbuli ya waja washaγulwewo ija mishi yadwishiγwa.

²³ Haja muntu akimiti: Shuyu Kilisito!, ao: Shuyuja!, mshetozeshe!

²⁴ Hambu Wakilisito wa ulongo na wateγanyi wa ulongo watazainuka, watazaγoshola vilozo na vimaka vikulu, waazaγanye, ati vyadahikana, hata waja washaγulwewo.

²⁵ Shivyo, nizavimiγambila, vishizati vikinte.

²⁶ Lushe wakizamiti: Shuyuja, a mwe nyika!, mshezahita! Ao du: Shuyuja, a mwe nyumbangwa!, mshetozeshe!

²⁷ Hambu sa viyaho lumuli luvyolawa kuja kwelawa zuwa lukimulika he lwingu lwoshe mpaka kuja kweingila zuwa, ne ndivyo kuuya kwa ṅwanangwa ywa muntu kulawile.

²⁸ Hena vundile, ne ngwilizi zihokaungananilana.

Kuuya kwa ṅwanangwa.

²⁹ Ukiwa wa mishi ija ukizinka, haho du zuwa jitagwa lwiza, hata ṅwezi utaleka kuaka, hata ntondwe zitauka mwe lwingu, hata nguvu za lwingu zitavuwanika.

³⁰ Ne ndiho lwitangilo lwa ṅwanangwa ywa muntu lulawile he lwingu, ne ndiho mbali zoshe za shi zitule ndilo zikimwona ṅwanangwa ywa muntu, avyoiza mwe mazunde ya lwingu na nguvu nyingi na utana ungi.

³¹ Ne atatuma walau wakwe, waitozize magunda makulu, waunganyanye waja washaγulwewo ndiye wakiwalavya kwe nyazu zoshe, mpeho ihokalawa, kuandiila lwingu lukoandiila mpaka kuja lukohelela.

³² Hinai lushimo mwe mkuyu: Ntimbwati zakwe zikikwela matumba, zikivungula, mwataila kuti: Vuli ji hehi.

³³ Vivyoho hata inywi mkizaona viya vyoshe tailai kuti: Bindilizo ji hehi!

³⁴ Kweli namiti: Inu mbali nkeibanike, mpaka izi mbuli zoshe zinebontoka.

³⁵ Lwingu nezelubanike, hata inu shi, miya mbuli zangu nkezezibanike.

³⁶ Miya mbuli ya mushi ao ya saa nkakuna mweitaila, hata walau wa lwingu nkawaitaila, hata ṅwanangwa nkaitaila, ni Tate ike du.

³⁷ Sa mbuli ziγendilevyo mwe mishi ya Nowa, ne ndivyo ziγende, ṅwanangwa ywa muntu ahozauyiya.

³⁸ Hambu sa viyaho waikalevyo mishi ija ilongoleyo uja mlaho wa mazi, wakija, wakinywa, wakiteγula, wakiteγulwa mpaka uja mushi, Nowa akiingila mwe chiya kibweta,

³⁹ wakishetaila iyo mbuli, mpaka mlaho wa mazi ukigwa na kuwabinda woshe: Ne ndivyo mbuli ziγende hata aho, ṅwanangwa ywa muntu ahozauyiya.

⁴⁰ Haja hatazaoneka waili we haṅwe nkoi, muṅwe atahokelwa, muṅwe ataashiγwa.

⁴¹ Waili webunduγa mwe ntuli ṅwenga, muṅwe atahokelwa, muṅwe ataashiγwa.

Gonai mesho.

⁴² Kwa ivyoho gonai mesho! Hambu nkamtaila mushi, ndiwo Zumbe ywenyu alawile nawo.

⁴³ Iyo mbuli mwataila kuti: Ati ṅwenye nyumba ataila, mubavi ndiho aizile, anga agona mesho, asheleke nyumbai mwakwe mukibaiγwa.

⁴⁴ Kwa ivyoho hata inywi kiteγei! Hambu ṅwanangwa ywa muntu atazaizila, mushihomwafiza.

⁴⁵ Ni ndai mweγaluka mupuna mkweli mwena viyuγo, baba yakwe akimgimbika mγolokezi ywa nyumba yakwe, ainke wabwanga wakwe nkande, zihokateγana naho?

⁴⁶ Mupuna mwezaona nyemi ni yuja, baba yakwe ayemubulila, akiγoshola ivyoho, ndiho kiawile.

⁴⁷ Kweli namiti: Atamgimbika, aγolokele viya vyakwe vyoshe, avyona navyo.

⁴⁸ Miya ati yuja mupuna ni mubada, akifanyanya mwe moyo wakwe kuγamba:

⁴⁹ Baba yangu nkeaize nguzu, kangi akiandiila kutowa wapuna weyae, aje,

⁵⁰ anywe haṅwe na waja wetengela, baba ywa yuja mupuna atazalawila mushi, ashiwomwafiza, atazaiza ashihotaila;

⁵¹ ne atamkoma na shime, amlavye nyazu mbili, upokezi wakwe atamunka haṅwe na waja wehemba. Ne ndiko kuivike kuiila na kukemeza meno.